Lơ 17/9, ta Kuala Lumpur, Malaysia, tâm rnôk râng Đại hội đồng liên Nghị viện ASEAN tal 46 (AIPA 46), Kruanh Quốc hội Trần Thanh Mẫn hŏ geh rơh tâm mâp ma Kruanh Quốc hội Campuchia ndrel Kruanh Quốc hội Timor Leste. Tâm nar mâp Kruanh Quốc hội Campuchia, wa Khuon Sudary, bar rđau kan tâm ban nau tâm rơh tât bar ding ân lŏ ƀư nâp nau tâm rnơm chính trị, vay tâm nchră, tâm khâl, tâm mâp ăp ding ba lơ đah ăp ntrongl mât nau tâm mâp nghị viện bar dak gay tâm nchră nau blau nau kan ndâk njêng pháp luật, uănh ndrel ntrŭnh ăp nau kan khlay bah neh dak.

Tâm rơh tâm mâp Kruanh Quốc hội Timor Leste, wa Maria Fernanda Lay, Kruanh Quốc hội Trần Thanh Mẫn đă, bar ding ơm ƀư rơh rƀŭn bôk năp bah ntrong kan Uỷ ban tâm boh văng sa, nau kan Việt Nam-Timor Leste gay tâm nchră tât nau kan ƀư n’hêl dŏng săk tam ngăn bay dơi tâm boh tâm ăp nau kan hŏ ký ton; ntrŭnh ƀư ngăn ăp nau nchrăp tă ký ton kŏ kơt lah ƀư ơm, jêh, nsôih ký ton ăp nau kan bar ding tâm nau ntĭm nti, tăch rgâl mhe, nŭih kan ntoh măt, khoa học-công nghệ, pâl n’aih, ŭnh nar kloh./.