Rmôt hăn kan bah nkuăl ƀon têh Hải Phòng hŏ tât tâm nkuăl dak lip tâm Dak Lak gay pă nklâm ndơ kơl an ndrel uănh nau nau tât gay nchrăp geh nau kơl an rjăp lơn ân kônh wa nkuăl dak lip băm. Nkuăl ƀon têh Hải Phòng mra leo 500 nai dak si tât n’gor Dak Lak gay rklaih ăp nau kan mpeh dak si jêh rnôk dak lip. Groi Kruanh UBND nkuăl ƀon têh Hải Phòng pă tay âk nklâm prăk kơl an 40 rmen, n’hao rnoh prăk kơl an bah nkuăl ƀon têh ân Dak Lak tâm rơh mih dak lip rnôk aơ hao tât 50 rmen. Ndrel ma nê, Hải Phòng kơl an ăp ndoh ndơ, dak si, máy trih dak...kơl an nau kan njrăng, rdâng srê jêh mih dak lip, rnoh rlau 2 rmen prăk. Bah năp măt, nkuăl ƀon têh leo 21 rmôt kan geh nau blau ngăn mpeh sê ji, nau ji tâm ntưp...tât kơl an Dak Lak. Wa Nguyễn Minh Hùng lah rjăp, nkuăl ƀon têh mra kơl an ân Dak Lak:

‘Jêh rnôk geh nau nchrăp bah Bộ chính trị, Ban Bí thư ri nkuăl ƀon têh Hải Phòng hŏ geh nau nchrăp ntrŭnh kơl an, tât kơl ân n’gor Dak Lak. Jêh dak bŭk, du đê̆ nau kan khlay lah rep răk ntŭk nti ndrel njrăng rdâng srê. Phung hên hŏ geh nau nchrăp ndal ngăn mpeh dak si, ndơ dŏng, nŭih kan. Phung hên mra leo 300-500 nŭih nai dak si gay hăn kơl an njrăng srê ji kŏ kơt lah săm nau ji”.

Nkuăl ƀon têh Hồ Chí Minh rgum lĕ rmôt kan kơl an Khánh Hoà jêh dak lop băm, ntơm bah nau khám săm ji, pă dak si dơm, pă ndơ sa, rep kloh ntŭk ntu tât nkra nâp ngih săm ƀŭt, ngih dak si ndrel mât ntŭk gâm sa kơl an ƀon lan nkuăl dak lip băm. Rmôt kan hŏ tât ntŭk dak băm jru tâm Nha Trang, Diên Khánh, Khánh Vĩnh. Nai dak si Phạm Minh Công, rmôt nai dak si mom tâm nkuăl ƀon têh Hồ Chí Minh nkoch, ăp nai dak si tâm rmôt hŏ ndơn nau đă ndrel ntơm hăn ndal, yơn hôm ncjhrăp tŏng ăp nau nau kan mra khám săm ji tâm nkuăl dak lip:

‘Tâm rnôk gleh nar, phung hên hŏ nchrăp rjăp, rgum rmôt nŭih nai dak si hăn tâm măng. Ŭch nau tâm kơl, tâm pă du gưl nau jêr khuch đah kônh wa nơm. Kŏ lah ntop tay nuih n’hâm ân nkuăl dak lip rlet nau jêr”.

Ndrel ma nê, rmôt kan hôm pơk ntŭk gâm ndơ sa, pă 10 rbăn tât 12 rbăn nklâm piăng/nar gay kơl an ƀon lan tâm xã, phường dôl geh khuch ndrel nŭih tât kơl. Trong tăch ndơ Co.oop Mart-ntŭk ƀư tâm boh nau kan nkuăl ƀon têh Hồ Chí Minh ta Nha Trang dôl  rvăt ndơ, đăp mpăn mô hao khlay, mô ân nau mô tŏng ndơ tâm rnôk ndal.  Wa Nguyễn Phước Lộc, Groi Bí thư Thành uỷ nkuăl ƀon têh Hồ Chí Minh, lah rjăp, nkuăl ƀon têh mra kơl an Khánh Hoà geh nau ngăn, ntŭk nsing ngăn, nkre n’hao rmôt hăn kơl an nkra ngih vâl gung trong:

‘Ăp rmôt kan mêt uănh, ndơn kơl an nkra ngih săm ƀŭt ndrel ngih dak si geh djơh khuch, đăp mpăn kon se nti ơm plŏ tay hăn nti ndrel ngih dak si pah kan rjăp nâm ơm đŏng”.

Ƀư tĭng nau kuăl jă bah Uỷ ban MTTQ Việt Nam n’gor Dak Lak, tâm ăp nar rlau aơ, ăp ntŭk kan, rmôt kan ndrel ma rbăn ƀon lan tâm mpeh bah dâng n’gor hŏ rgop ma rhiăng tấn ndơ sa, dak ngêt, kho ao...njoăl tât kơl an kônh wa nkuăl dak lip ba lơ. Wa Y Giang Gry Niê Knơng, Groi Bí thư n’gor uỷ, Kruanh Uỷ ban MTTQ Việt Nam n’gor Dak Lak mbơh, nau kan ndơn ndrel pă ndơ kơl an dôl geh ƀư ndal:

TĐ: ‘Đah nau tâm rnglăp, nsum ty rgop kơl bah kônh wa tâm ndrel bah dih n’gor, rgum ăp ntŭk ƀon lan, ntŭk rƀŭn rgum chroh ƀư n’gon piăng pă kơl an ma nklâm, nklâm bánh chưng, bánh tét...gay ma năn leo kơl an tât kônh wa tâm nkuăl geh dak lip băm nkhah, kol. Êp nê, phung hên kŏ lŏ kuăl jă, ndơn n’ăp ma prăk ndrel ndơ sa, ndoh ndơ gay ma kơl an kônh wa nơm ơm đăp mpăn nau rêh”./.