Ăp nar dja, ƀon lan lam dak ndrel mpôl kan dơi kan dôl rƀŏng sĭt miền Trung ndŭl mham ma ăp nău kan ngăn ngăn gay nkra bah khuch khat dak bŭk.

Ủy ban MTTQ Việt Nam nkual ƀon têh Hồ Chí Minh an gĭt, pah kan rgŏ jă n’hanh dơn ndơ ntop kơl an ƀon lan ăp n’gor miền Trung geh tât khuch dak bŭk hŏ geh nău dơi dŭt têh. Mpôl rgŏ jă ntop kơl Nkual ƀon têh hŏ dơn rlău 32.400 tơ̆ rgop đah lĕ rngôch rnoh prăk nklăp 245 rmen prăk. Ndrel đah nê lah nklăp 30.000 dŭng dak si rnăk wâl, 70 tấn phe n’hanh bơi 1.400 tấn ndơ dŏng sa khlay rnoh khlay rlău 140 rmen prăk. Nkual ƀon têh Hồ Chí Minh rgum lĕ ndơ dŏng, mpôl kan gay ntop kơl Khánh Hòa nkra bah khuch khat dak bŭk đŏng, tâm nê geh nău ndơ̆ kơl 50 rmen prăk ntop kơl jăch ndăn, ntop kơl nkra 23 nhih nti geh khuch khat n’hanh đă 650 nuĭh hăn kơl êng râng kuaih kloh uĕh ndŏk ta ăp ntŭk geh khuch khat jru.

Lơ 24/11, Bộ Tư lệnh Nkual 4 Hải quân đă tay bơi 1.000 cán bộ, tahen ndrel âk ndeh rklư, ndoh ndơ tât ăp nkual geh khuch hô yor mih dak bŭk ta Khánh Hoà n’hanh Dak Lak. Rmôt Hải quân dơi tâm pă jêng âk trong, ƀư răk rao lĕ rngôch âk km trong ƀon lan hăn; ntop kơl ƀư kloh, rwach koaih bŏk neh ta 12 ngih samƀŭt, 3 ngih UBND, 1 ngih dak si n’hanh bơi 100 jay nuĭh ƀon lan ta ăp ntŭk Đông Hòa, Tuy Hòa, Bình Kiến, Bắc Nha Trang n’hanh xă Diên Điền. Ndrel đah nĕ, ăp ntŭk kan tâm lam nkual lĕ rdêng tât nuĭh ƀon lan bơi 100 khối dak njŭng, 5.000 thùng mỳ tôm n’hanh âk ndơ dŏng geh phe, dak toh, kho ao, nah phôi. Bộ Tư lệnh Nkual 4 an gĭt rnoh nău kan hôm e dŭt têh n’hanh rmôt Hải quân mbra ntop kơl tay ăp ntŭk tâm ăp nar tât.

Ta Lâm Đồng, mih dak bŭk ăp nar rlău aơ lơh pĭch rlâm hô, ƀư kơl khan âk njăr trong me. Bộ Xây dựng kan nsum đah n’gor rgum mpôl kan, ndeh rklư gay rgum kuaih neh lŭ, bât nâp tay mbor dak sor, mbluh n’hong hoch n’hanh tĭng groi nđôi nău tât trôk nar lơh gay đăp mpăn an nuĭh ƀon lan. Thứ trưởng Bộ Xây dựng Lê Anh Tuấn an gĭt nhih pah kan dôl ndăn nkra bah khuch khat trong hăn gay ơm mbluh soih ndơ tăch n’hanh đăp mpăn pah kan jan sa. Êng ta Quốc lộ 20 sop Mimosa, ăp mpôl kan n’gluh tâm 10 nar mbra manh mbluh soih n’hanh wat jêh lĕ rngôch trong nchrăp kan tâm du khay. Lâm Đồng đă ăp n’gâng kan tâm dâng lor nchrăp rdâng lơh, ra uănh tay nkual geh ma nău pĭch rlâm ntrơn du ngăch rnôk geh nău khlay.