Nar (26/11) Ntŭk kan Ntrŭt nsôr tuch tăm mât rong n’gor Lâm Đồng mbơh ƀư nău ntop kơl nuĭh ƀon lan nkra khuch khat, rdâk nkra kơl mir sầu riêng geh dak băm yor mih dak lip âk nar bah năp. Nău rdâk nkra tơm tăm jêh dak băm dơi ntơm ƀư ta xă Cát Tiên n’hanh Cát Tiên 2, ntŭk geh hang rhiăng ha sầu riêng geh dak băm.

Cán bộ Ntŭk ntrŭt nsôr tuch tăm mât rong n’gor Lâm Đồng na nê̆ ntĭm nkra n’hoch dak kơl mir tơm, nkre ƀư ăp gưl nkra n’gu bu tuh, rdâk nkra reh, mât chăm n’ging, poh an ndơ kah n’hanh njrăng n’gang bu tuh jŏ jong. Ndrel đah ntĭm kỹ thuật, Ntŭk kan ntrŭt nsôr tuch tăm mât rong n’gor Lâm Đồng ndrel tâm rgop đah ăp ntŭk kan, doanh nghiệp ntop kơl du đêt chế phẩm sinh học, phân poh lŏ mir kơl kônh wa ngăch rdâk nkra mir tơm. Lam n’gor Lâm Đồng aƀaơ geh 42.500 ha sầu riêng, tâm nĕ âk rnoh neh dơi tăm ta ăp nkual rđŭng nkual mpeh bah dâng n’gor.