Ta nkual gŭ mhe thôn K’Nớ 5, xã Đam Rông 4, âk ntŭk đang geh ntoh ta ăp ntôr yôk văr nkual ƀon lan gŭ, mbra ƀư geh nău tât đah rlău 60 rnăk ƀon lan rêh ta aơ. Ta Quốc lộ 28, ntŭk hăn let yôk Gia Bắc, rhiăng mét khối neh lŭ lĕ rhung ta trong, ƀư kŏ bêng trong hăn dŭt âk. Ta năp trôk nar mô ueh, ăp n’gâng kan têh dôl ngăch ndăn uănh năl ăp nkual geh nău tât âk, n’hao nău uănh njrăng mih sial, leo mât đăp mpăn ăp dak bât n’hanh nchrăp ăp ntil ndơ dŏng, ndeh klư, nuĭh kan tĭng 4 ta ntŭk. N’gâng kan ta ntŭk lĕ geh uănh njrăng, mbơh lor ntŭk mbra geh nău tât, rdâk njêng ăp trong kan ntrơn ƀon lan n’hanh mbơh ƀư ăp nău kan nkra nâp ueh Taluy, njrăng rdâng rluh neh gay ma bah nău khuch khat mpeh nuĭh n’hanh drăp ndơ.