Ôi ơm ta ƀon Tơ Drăh, xă Bờ Ngoong, n’gor Gia Lai, cán bộ công an xă tât khâl rnăk wâl wa Bái, 43 năm, nuĭh Ba Na, ôp nău bôh ba lŏ mir, săk soan n’hanh nău nti nsơm bah ăp kon. Rlău du năm bah năp, wa Bái tă tĭng djăt chroh nklă “Ba Na Đêga Kon Kông” yor ăp nuĭh dun rlơn ndâk ƀư gay kuăl jă nuĭh ƀon lan.

Wa nkoch tay, rnôk mhe ntoh, ăp nuĭh nkoch trêng aơ lah “chroh êng bah nuĭh Ba Na”, lĕ dơi kơp dơn jêng âk nuĭh djăt tĭng. Knŭng tât rnôk n’gâng kan ƀon lan n’hanh rmôt công an rblang, nchrŏng nău ngăn dun rlơn, nău mplư rlăm chroh rƀŭn gay phah bah ăp nuĭh djôt bôk, wa mư gĭt saơ nơm geh rlăm.

Chroh rklă Ba Na Kon Kông lah tih hôm. Tih yor pơng tâm nkhah rnoi nuĭh, Ngih dak he mô an. Gâp gĭt tih lah gâp jăng lơi. Nuĭh Ba Na n’hanh Jarai ta nkual gâp dơi ngih dak uănh kơl âk ngăn, kop ji geh bảo hiểm dak si.

Tĭng ngih pah kan công an, bah khay 7 tât khay 9 năm 2025, rmôt chroh rklă “Ba Na Đêga Kon Kông” lĕ kuăl jă rlău 350 nuĭh ta 22 ƀon tâm 7 xă ta n’gor Gia Lai râng. Jêh uănh nđôi năl lah, ăp nuĭh lĕ ndâk njêng nău kan rjăp, mpôn săk nău ƀư chroh rƀŭn gay nkoch trêng nău mĭn tâm rkeh, nsŭk nsôr tâm nkhah rnoi nuĭh, dun n’gang n’gâng kan ƀon lan n’hanh rgŏ jă rgop prăk mô tâm gay rhŏ an nău ƀư dun n’gang.

Thượng tá Phan Thanh Hải, Groi Kruanh jrô kan Rnă njrăng tâm dak, Công an n’gor Gia Lai an gĭt, ngăn ngên “Ba Na Đêga Kon Kông” lah nău geh bah rmôt “Tin lành Đêga” yor ăp nuĭh Fulro gŭ ta dak bah dih kuăl dô̆t, ntĭm rđău gay ƀư roh đăp mpăn rnă njrăng ta ntŭk. Tâm n’gul khay 5 năm 2026, Công an n’gor Gia Lai lĕ phong nău tih gay uănh nđôi nău ƀư “Phah nău kơl tâm rnglăp”, nhŭp du đêt nuĭh tơm bah rmôt chroh rklă aơ.
 

Ăp nuĭh kuăl jă n’hanh hun hao rmôt lăp nkual ƀon lan rnoi mpôl đêt gay gay nuĭh geh nău mĭn dun rlơn, phah n’gâng kan ƀon lan, gay rlăm, nsŭk nsôr, mbơh nu nău an nuĭh rlăng bah dih, rklă nu nău rnă njrăng chính trị, n’hanh nău rêh bah ƀon lan, uănh nĕ lah nău an saơ phong Việt Nam tih ƀon lan ƀư tơm, nău dơi kon nuĭh, gay ƀư n’hŭch nău ƀư tơm n’hanh nsing nơm bah neh dak he.

Tâm rnôk njrăng n’gang, n’gor Gia Lai lĕ nsrôih rmal rjăp ăp nuĭh djôt bôk, n’gâng tơm. Tâm ban đah nĕ, trong kan rgŏ jă, nkoch trêng, rlăm nuĭh hăn tih trong dơi uănh khlay gay nuĭh ƀon lan plơ̆ tay gŭ âm chroh rƀŭn ngăn, di nău ntrŭnh pháp luật. Ta ăp ƀon lan, bu ranh ƀon, nuĭh geh nsing nơm, bí thư chi bộ, kruanh thôn jêng rmôt n’gâng tơm nkoch trêng, rgŏ jă kônh wa saơ nău rlăm bah ăp nuĭh dun rlơn rgâl nău chroh rƀŭn. Wa Đinh Chroh, Bí thư Chi bộ nkre ƀư Kruanh thôn ƀon Tơ Drăh, xă Bờ Ngoong an gĭt:

Gâp lah đah kônh wa Việt Nam geh 54 rnoi nuĭh oh nô. Mô dơi tâm nkhah nuĭh Ba Na, nuĭh Jarai mô lah nuĭh Yoăn jêng ăp nău kuăl lah chroh êng”, hăn rlơ̆ đah nău tâm rnglăp rnoi nuĭh.

Đại tá Phạm Hữu Trường, Groi Giám đốc Công an n’gor Gia Lai an gĭt, dun n’gang đah ăp nău rlăm chroh rƀŭn gay phah dơi Đảng ủy, Ban Mpôl Giám đốc Công an n’gor mĭn lah nău kan khlay tâm trong kan đăp mpăn rnă njrăng ngih dak, mât nâp đăp mpăn ta ntŭk. Rlău ma ăp nău way kan gay nking n’gang bah ơm, bah ngai nău jêng rmôt, hun hao rmôt tơm gay kuăl jă nuĭh ƀon lan, rmôt công an hôm ntrôl njrăng n’gang ta nău mĭn; mât ƀư tơm bah bu ranh ƀon, nuĭh nsing nơm n’hanh ăp nuĭh tă tih yơn lĕ kah rngăl, plơ̆ sĭt.

Njrăng n’gang, rmal rjăp gay đah ăp nău ƀư rdâk nsơm tay FRulro, Tin lanh Đêga đah săk kuăl Ba Na Đêga Kon Kông lĕ rgop mât nâp đăp mpăn rnă njrăng ta ntŭk. Lơn lah, ta ưbah njrăng n’gang, lĕ dơi rgâl du đêt nuĭh n’gâng tơm jêng rmôt dŭt n’hâm tâm ntrong leo lam ƀon lan mât njrăng rnă njrăng Neh dak, rgŏ jă âk nuĭh tih trong plơ̆ si\t tay gŭ âm chroh rƀŭn tĭng di.

Nău njrăng n’gang đah ăp rmôt mplư rlăm nău rnoi nuĭh, chroh rƀŭn gay dun phah ta Tây Nguyên lah nsum n’hanh Gia Lai lah êng dơi mĭn hôm e jŏ ông, jêr jŏt. Yor ăp nuĭh dun rlơn joi trong rgâl nău ƀư, mplư rlăm nău mô wât bah du đêt nuĭh ƀon lan gay kuăl jă nău mĭn tâm nkhah, tâm chrai tâm rnglăp rnoi nuĭh.

Yơn lah, đah nău lăp dŭt n’hâm bah rmôt kan dơi kan, ndrel nuih n’hâm bah gưl ủy, n’gâng kan ƀon lan n’hanh nuĭh ƀon lan, ăp nău rklă, dun rlơn mpôn tâm chroh rƀŭn mbra mô hôm geh ntŭk rêh; đăp mpăn mbra dơi mât nâp ta bri krŏng yôk prêh Tây Nguyên./.