Mhe aơ, n’gor Dak Lak ƀư Rƀŭn nchră boăt nthoi tour n’hanh hun hao ntŭk tât pâl nđaih gay uănh lah nău geh, nău dơh n’hanh nău ngăn bah nău kan pâl nđaih ta ntŭk; nkre geh rƀŭn nchră gay ăp nuĭh way kan, nuĭh mât uănh n’hanh doanh nghiệp ndrel tâm nchră, dăn đă trong hun hao pâl nđaih nâp nâl, n’hao dơi tâm rlong, rgop ƀư tĭng nău rƀŏng hao jêng wăng sa 2 rnoh mrô lvang 2026-20230

Ta rƀŭn nchră, âk nuĭh way kan n’hanh doanh nghiệp mĭn năl nău rgum nsum ntŭk ntô hun hao đah Tây Nguyên n’hanh duyên hải lĕ pơk luh nău dơi têh an nău kan pâl nđaih Dak Lak. Bah du ntŭk tât ntoh lư đah cà phê, v ăn hóa chĭng, ƀon lan, n’glău Lắk, Buôn Đôn n’hanh ntŭk rgum bri uĕh, Dak Lak aƀaơ hôm dơi ntop kơl ăp nău geh mhe bah dak lêng, yơn dak lêng, ndru lŭ ndrel ăp nău khlay văn hóa n’hanh ndơ sông sa nkual duyên hải.

Nău boăt nthoi đah dak lêng n’hanh bri krŏng yôk têh dơi uănh lah trong hăn dơi geh âk gay jêng ăp ndơ pâl nđaih ăp nkual êng êng, ntoch jong nar rlu rlău n’hanh n’hao ƀư ngăn an pâl nđaih. Yơn lah, tĭng ăp nuĭh way kan, nău ơh knŭng nău mât uĕh săk rnglăy rnôk dơi rgâl jêng ăp ndơ pâl nđaih uĕh, dơi tâm rlong âk. Wa Hữu Y Yên, Kruanh Hội đồng thanh viên Công ty TNHH MTV nău rhŏ pâl nđaih Saigontourist an lah:

Jêh rnôk trong têh hăn ngăch Nkual ƀon têh Hồ Chí Minh tât Tuy Hòa rhoăt đêt hôm 7 mông. M’hâm ƀư an Tuy Hòa geh ăp bôk nău kan dŭt uĕh, dŭt m’ak. Rlău ma nău ŭm dak lêng kơt aƀaơ ri he an ntuh kơl tay ăp nkual răm pâl rlưn têh, ri năch pâl n đaih mư hăn Tuy Hòa.

Bah meng nău dơh mhe, ăp đại biểu ntĭm luh âk ntŭk kol dôl nking n’gang nău hun hao bah nău kan pâl nđaih kơt ntung trong mô tâm ban, uĕh nâp nău rhŏ mô tâm di đah nău geh, trong kan ntrŭt ngăch mpla nsơ hôm e đêt n’hanh nău kơt dŏng công nghệ mrô mô tâm di nău ŭch hun hao tâm rnôk mhe. Âk nău rgop dăn đă n’gor an geh trong ƀư êng gay wăch rgum ntuh kơl an ntung trong pâl nđaih, ntop kơl doanh nghiệp ndâk njêng ndơ mhe n’hanh pơk hvi ăp trong, tour tâm rgop.

Tâm trong hun hao pâl nđaih kloh uĕh uĕh, gĭt blău mhe n’hanh nâp nâl, Dak Lak dơi mpŏng mbra dŏng săk rnglăy ntŭk ntô hun hao mhe gay jêng ăp ndơ uĕh êng, rgop n’hao dơi tât ntŭk pâl nđaih lam dak. Djăt ăp nău rgop ta rƀŭn nchră, wa Đào Mỹ, Groi Kruanh UBND n’gor Dak Lak an gĭt n’gor mbra rgum mbơh ƀư ăp trong mkra khlay gay ntop kơl doanh nghiệp n’hanh hun hao ntŭk tât.

Ndâk ƀư rup gui ntŭk tât bah pâl nđaih lah bôk năp. Tal 2 tay lah geh nău kơl ntop kơl pơk tour, gay ndâk njêng ntŭk tât. Dơi ƀư kơt nĕ ri doanh nghiệp mư đăp mpăn nsing nơm pơk tour, ndâk ƀư ntŭk tât gay wăch rgum năch pâl nđaih.

Mô knŭng rlu ta ăp trong nchrŏng têh, rƀŭn nchră hôm djôt dơn ăp trong hăn na nê̆ gay ntrôl tâm rgop hun hao pâl nđaih. N’gâng kan Văn hóa, Thể thao n’hanh pâl nđaih n’gor Dak Lak lĕ ký ton bôk nău kan ndrel đah du đêt doanh nghiệp pâl nđaih; nkre ăp doanh nghiewẹp pâl nđaih, ntŭk rlu rlău, nkual pâl nđaih, ngih sông sa n’hanh ntŭk kan nchoăn rdêng ký ton ăp nău tâm rgop, mbơh ƀư nău kơl an mpeh rnoh khlay n’hanh n’hao uĕh nău rhŏ gay ntrŭt ntrôl pâl nđaih.

Trong tâm rgop nkual dôl dơi âk ntŭk ntrôl dăng. Mhe aơ, Lâm Đồng n’hanh Khánh Hòa lĕ ƀư bôk nău kan tâm rgop ntrŭt ngăch ntuh kơl, tăch rgâl n’hanh pâl nđaih năm 2026, pơk hvi dơi kan ndrel đah Tây Nguyên n’hanh duyên hải Nam Trung Bộ. 2 ntŭk lĕ ký ton 8 samƀŭt kan ndrel đah ăp doanh nghiệp gay ntrŭt ntrôl ntuh kơl, tăch rgâl n’hanh pâl nđaih. Tâm rnôk Khánh Hòa lah ntŭk wăng sa dak lêng đah ntŭk ntô pâl nđaih hun hao, ri Lâm Đồng dŏng nău dơh trôk nar, pâl nđaih sinh thái, rlu rlău n’hanh lŏ mir công nghệ mhe. Nău boăt nthoi đah ăp trong khlay kơt Quốc lộ 1, trong têh Bắc-Nam, Quốc lộ 27C, trong ndeh treng Bắc-Nam ndrel ndrâm dak lêng n’hanh trong ndeh păr jêng dơh gay jêng ăp ndơ pâl nđaih, pơk hvi ntŭk ntô hun hao n’hanh wăch rgum ntuh kơl.

Bah bri krŏng tât dak lêng pŭt, nău tâm rgop đah ăp ntŭk Tây Nguyên n’hanh duyên hải Nam Trung Bộ dôl pơk luh ntŭk ntô hun hao mhe an pâl nđaih. Rnôk ăp nău dơh êng dơi boăt nthoi jêng soan dăng nsum, aơ mbra lah n’hâm soan khlay gay nkual ndrel hao mhe, rgop an trong hao êng nơm bah neh dak tâm rach năm mhe.