Wa Hồ Văn Mười-Kruanh UBND n’gor Lâm Đồng mhe na nê̆ uănh nđôi ntŭk ƀư nău nchrăp nkra tay-ƀư uĕh Quốc lộ 28B, pah kan đah nuĭh tơm ntuh kơl n’hanh n’gluh an nău mbơh lor mbra rgâl nuĭh ndranh yor mbrơi ngăch.

Tât aƀaơ nău nchră ƀư nkra-ƀư uĕh Quốc lộ 28B lĕ ƀư cấp phối lŭ môi geh 44/62 km, tuh bê tông chay nklăp 37/62 km. Trong kan sŏk neh lĕ jêh 95%. Ngăch ƀư ndơ aơ lah mbrơi kôp đah nău đă. Nkô̆ nău tơm yor du đêt nuĭh ndranh mô hŏ kuăl jă tŏng măy mŏk, nuĭh kan, ndoh ndơ, tâm rnôk tơm ntuh kơl mô tŏng dŭt n’hâm ntĭm rđău.

Uănh nđôi na nê̆, Kruanh UBND n’gor Hồ Văn Mười lah rjăp, Quốc lộ 28B lah trong hăn khlay, “nsrôih an jêh dơi bah n’gor Lâm Đồng tâm năm 2026”, jêng mô dơi nklă yor nău mbrơi jao an neh gay ƀư uĕh an ngăch ƀư mbrơi. Wa mĭn lah: “Lah nuĭh ndranh mô blău, mô tâm di nău đă, an rgâl; lah nuĭh tơm ntuh kơl mô tŏng soan ƀĭt joet, mbra đă rgâl”.

Wa Hồ Văn Mười đă ăp ntŭk kan geh tât an jêh samƀŭt rhăch nău, uănh an trong trok hôm ƀa ƀaơ bah năp 30/10/2025. Nkre, tâm pơh ap an ƀư samƀŭt ngăch na nê̆, tŏng ăp jêh lĕ rngôch bah năp 31/12/2025 tĭng trong nchrăp.