Rƀŏng tât rơh bầu cử đại biểu Quốc hội khóa XVI n’hanh đại biểu HĐND ăp gưl năm kan 2026 – 2031, n’gor Lâm Đồng dôl rgum rđău đă, nchŏng đă, an ƀư lam lĕ rngôch, ăp kôp ăp nău dơn kan tĭng di quy định bah pháp luật n’hanh rnoh ngăch ndơ̆ luh. Gay nar bầu cử đại biểu Quốc hội n’hanh đại biểu HĐND ăp gưl 15/3 tât ƀư đăp mpăn, geh nău tâm ban, lah rơh rgum chính trị jru hvi ngăn, lah “Nar rgum neh dak” ta n’gor, pah kan nkoch trêng mpeh nar chính trị khlay dja bah neh dak dôl dơi n’gor Lâm Đồng ntrôl dăng njêng nău tâm ban ŭch, dơn ngoăy tâm ƀon lan.

Bah âk khay aơ, nô K’Sáu, Kruanh thôn K’Rèn, xã Hiệp Thạnh, n’gor Lâm Đồng nkoch trêng mbro Luật Bầu cử, lah rjăp nău dơi tơm, tâm ban, na nê̆ n’hanh nklăch phiếu ndâp; nkre mbơh gĭt rnoh di dâk tâm rlong, rêng ƀư tâm ban ŭch lor, nchih săk cử tri. Tĭng nô K’Sáu, nău tĭng ƀư di quy định mbra rgop mât đăp mpăn rơh bầu cử ƀư tâm nar 15/3 tât aơ tay ƀư geh nău tâm ban, di pháp luật, đăp mpăn n’hanh cử tri bah thôn sơch dơi nuĭh ntơh măt tâm di:

“Đah nău dơi bah săk gâp nơm nkoch trêng kônh wa mpeh bầu cử, mpeh nuĭh kan. Saơ kônh wa rhơn rnôk tăng lư. Mhe aơ nơh tâm ban ŭch tâm thôn geh 2 hê bu klô n’hanh du hê bu ur gay bầu cử đại biểu HĐND xã bơi tât. Kônh wa dŭt tâm ban ŭch đŏng”.

Ta n’gor Lâm Đồng, gay cử tri n’hanh nuĭh ƀon lan rƀah gĭt nău lư mpeh bầu cử, Gưl uỷ Đảng, Mặt trận Tổ quốc n’hanh ăp nsum mpôl chính trị- rêh jêng kon nuĭh, hŏ đăm gĭt jru, ăp tŏng nău ntrŭnh mbrô 46 nar 16/5/2025 bah Bộ Chính trị, Nău ntrŭnh mbrô 02 nar 23/9/2025 bah Ban Thường vụ Tỉnh uỷ mpeh rđău đă rơh bầu cử đại biểu Quốc hội khóa XVI n’hanh đại biểu HĐND ăp gưl năm kan 2026 – 2031. Ntơm bah nê Mặt trận Tổ quốc, ăp nsum mpôl chính trị- rêh jêng kon nuĭh kan nsum đah n’gâng kan dơi kan rgum nkoch trêng ăp nkô̆ mhe bahh Hiến pháp năm 2013 lôch rgâl nkra, kơi ntop du đêt nkô̆ mpeh Luật tổ chức chính quyền địa phương (rgâl nkra); Luật rgâl nkra, kơi ntop du đêt nkô̆ bah Luật bầu cử đại biểu Quốc hội n’hanh đại biểu HĐND; ăp siƀŭt, rđău đă, ntĭm nti bah ăp nhih pah kan, ntŭk kan dơi kan, bah Hội đồng bầu cử Quốc gia… wa Mai Linh Sơn, Kruanh Ủy ban MTTQ Việt Nam xã D’ran, n’gor Lâm Đồng an gĭt:  

“Mặt trận kan nsum đah Uỷ ban, Jrô kan Văn hoá Thông tin ƀư nkoch trêng an saơ na nê̆ ta năp măt. Tâl bar lah nkoch trêng ma Zalo n’hanh nkoch trêng ma ăp rơh tâm nchră sŏk nău rgop bah cử tri ntŭk nơm gŭ gay cử tri tĭng ƀư đăp mpăn nău dơi tĭng di quy định bah Luật bầu cử. Đăp mpăn lah nuĭh ƀon lan wât lĕ nkô̆ nău geh tât nău dơn kan bah nuĭh râng tĭng ƀư nău dơn kan rdâk njêng n’gâng kan. Mhâm ƀư đại biểu HĐND ân di nuĭh ntơh măt ngăn an nău mĭn n’hanh nău mpŏng an ƀon lan”.

Wa Trần Hùng Dũng, Kruanh UBND xã Đơn Dương, n’gor Lâm Đồng an gĭt:

“Ma trong ƀư kơt loa pơk ƀoh nău ngơi ta Trang thông tin điện tử n’hanh ta ăp mbrô pơk ƀoh nău ngơi êng ƀa ƀă hŏ nkoch trêng jru hvi tât ăp rơh kơn ƀon lan ta ntŭk. Bah nê kônh wa ƀon lan hŏ năl gĭt nău khlay, nău dơn kan, nău têh khlay bah rơh bầu cử đŏng jêng râng ăp trong leo ƀư ma rgop an nău ƀư bầu cử Quốc hội n’hanh HĐND ăp gưl let năp tay mbra ƀư geh nău dơi uĕh lăng”.

Gay nar bầu cử đại biểu Quốc hội n’hanh đại biểu HĐND ăp gưl 15/3 tât ƀư đăp mpăn, geh nău tâm ban, lah rơh rgum chính trị jru hvi, lah “Nar rgum neh dak” ngăn, lôch Tâm nchră tâm ban ŭch tâl pe mhe aơ, pah kan nkoch trêng mpeh nar chính trị têh khlay dja bah neh dak dơi n’gor Lâm Đồng ntrôl dăng lơn đŏng gay njêng nău tâm ban ŭch, dơn ngoăy tâm ƀon lan.

Ndrel đah nkoch trêng na nê̆ tât cử tri n’hanh nuĭh ƀon lan, 124 xã, phường, đặc khu bah n’gor ntrŭp rlău 2.600 pa nô nkoch trêng mpeh bầu cử; yông rlău 3.000 cờ bok, cờ gŭr bi; sre ƀoh loa nkoch trêng tâm dâng pơk tât leh ăp nkô̆ mpeh Luật bầu cử, nău dơi n’hanh nău way bah cử tri. Ta ăp njăr trong me, ntŭk khuôn viên uĕh reh ta phường Xuân Hương- Đà Lạt, Bắc Gia Nghĩa, Phan Thiết, Hàm Thắng… jêng ăp ntŭk rgum nkoch trêng mpeh bầu cử njêng mông nar khuh n’gôr, rhơn mƀak n’hanh rgop n’hao nău gĭt êng mpeh nău ŭch, nkô̆ hôr, nău dơi, nău way bah cử tri.

Wa Phạm Thị Phúc, Groi Bí thư Tỉnh ủy, Kruanh Ủy ban MTTQ Việt Nam n’gor Lâm Đồng, an gĭt, ta ăp xã nkual jru, nkual ngai, ntŭk âk ƀon lan kon chroh n’hanh ƀon lan rnoi mpôl đê̆ gŭ rêh, gay pah kan nkoch trêng bầu cử geh nău tam ngăn ngăn, Mặt trận hŏ ntik n’hao nău khlay kan bah 900 nuĭh geh nsing nơm, ăp kruanh chroh, nuĭh kơl kan chroh rƀŭn tâm nău ndrel hăn n’gâng kan ta ntŭk:

“Mặt trận rgop khlay ƀư n’gâng tơm tâm nău kan nsum đah ăp n’gâng kan, ăp nhih pah kan dơi kan rgŏ jă, kơi năp nti mbơh gĭt nău lư gay rƀŏng trong an nuĭh geh nsing nơm, ăp kruanh chroh, nuĭh kơl kan tâm nkual ƀon lan kon chroh, rnoi mpôl đê̆ gay kan nsum pah kan nkoch trêng rgŏ jă. Way tâm ôp nău lư tâm ban kơt kơi năp nti gay ntik n’hao tay. Đah ăp kruanh chroh, nuĭh kơl kan way mât dơi bôk tâm boh tâm ban, tâm rnglăp n’hanh geh nău kan nsum lhăt ndrel hăn đah n’gâng kan ta ntŭk tâm nău rgŏ jă đăp mpăn dơi nău ŭch geh”.  

    Đah nău lăp kan ăp kôp, lĕ n’hâm suan bah lam trong kan chính trị; nău lor nchrăp, blău ƀư mhe tâm pah kan nkoch trêng; ndrel nuih n’hâm dơn kan, tâm ban ŭch âk bah cán bộ, đảng viên n’hanh ăp rơh kơn ƀon lan, n’gor Lâm Đồng dôl nchrăp an nar rgum têh bah lam ƀon lan 15/3. Ntơm bah nkual jru, nkual ngai tât đô thị, mông nar rƀŏng tât rơh bầu cử đại biểu Quốc hội khóa XVI n’hanh đại biểu HĐND ăp gưl năm kan 2026 – 2031 ta n’gor Lâm Đồng ring lam dăng.