Tă bah mih têh ntoch jong, ta âk nkual ntơm bah yôk prêh tât dak lêng bah n’gor Lâm Đồng geh ndâp băm dak, pĭch rlâm neh. N’gâng kan ăp ntŭk tâm dâng ndrel mpôl kan dơi kan bah n’gor Lâm Đồng aƀaơ dôl nkre ndăn ngăch nkra bah khuch khat an tay bah kơi nkre lor nchrăp rdâng lơh đah mih dak bŭk. Ndrel đah nău băm dak trăm ta ăp xã, phường nkual mpeh luh nar, dak klôr rdu, pĭch rlâm neh geh ta nkual mpeh nhâp nar n’gor Lâm Đồng lơh du hê nuĭh khĭt n’hanh ƀư kol khan âk njăr trong hăn đŏng.

Gay lor nchrăp rdâng lơh tay bah ir tât khuch khat tă bah mih dak bŭk, pĭch rlâm neh, Ban rđău đă njrăng n’gâng ƀon lan n’gor Lâm Đồng đă 124 xã, phường, đặc khu ndrel mpôl kan dơi kan n’hao mpôl kan gŭ kâp ndăng măng nar; ôp uănh, ra joi tay ăp nkual ƀon lan gŭ meng dak me, dak diăng, nkual rđŭng dêh geh ma nău ndâp băm dak. Đah ăp nkual way geh pĭch  rlâm neh, ndâp băm dak kơt sop Đại Ninh- Quốc lộ 28B, sop Sông Pha- Quốc lộ 27, sop Gia Bắc- Quốc lộ 28… ăp xã mpeh luh nar rđŭng dêh ân nchrăp lor nuĭh, ndeh rklư hăn kơl nuĭh tât rmoh rmanh rnôk geh nău đă.