Ƀư tĭng Nghị quyết mrô 57 bah Bộ Chính trị mpeh rgâl hun hao khoa học, công nghệ, rgâl mĭn ƀư mhe n’hanh rgâl mrô lam dak, ôi nđaơ (14/8), ta Đà Lạt, UBND n’gor Lâm Đồng ƀư rgŏ jă ntrong leo ƀon lan nti mrô.

Ta ƀư rgŏ jă, Kruanh UBND n’gor Lâm Đồng Hồ Văn Mười kuăl jă lĕ rngôch cán bộ, công chức, viên chức, nuĭh pah kan n’hanh lĕ rngôch nuĭh ƀon lan mĭn joi gĭt, lăp du trong rĭng ăp, nchrăp lor, dŭt n’hâm đah ntrong leo ƀon lan nti mrô; ăp n’gâng kan, ban, nău kan, ƀon lan uănh tât ntuh kơl ndoh ndơ tŏng ăp tơm prăk, kơp uănh tay bôk nău kan ntĭm nti, ƀư ăp jrô mbơh rblang kỹ thuật mrô tâm di đah tĭng nuĭh mô tâm rkeh năm deh n’hanh gưl kon nuĭh. Jêh ƀư rgŏ jă ntrong leo ƀon lan nti mrô, hang rbăn cán bộ, công chức, viên chức, nuĭh pah kan bah n’gor Lâm Đồng dơi nkoch mbơh, tiărr nti dŏng n’gâng tơm, trong dŏng nsum rhŏ an nău kan bah n’gâng kan 2 gưl; dŏng ntop kơl rup, Chat GPT, mkra trong pâl nđaih thông min 4.0; mbơh ƀư trong mbơh neh ntu.