Nău nchrăp ƀư ntuh kơl ndâk ƀư trong têh hăn ngăch Bảo Lộc-Liên Khương hăn rlău 10 xă, phường bah n’gor Lâm Đồng, khuch tât rlău 5.400 rnăk n’hanh 14 rmôt kan, đah dĭng lĕ rnoh neh sŏk bơi 600ha, tâm nĕ geh neh gŭ, neh lŏ mir, neh bri, neh mât njrăng n’har bri.

Dơi ntơm ƀư tâm lơ 29/6, tâm lvang rgâl tay pơk dŏng n’gâng kan ƀon lan 2 gưl n’hanh ƀư tĭng nglăp nsum n’gor, nău nchrăp ƀư rdâng đah âk jêr jŏt, wăk kol. Ta xă Ninh Gia, ntŭk geh rlău 100 rnăk ƀon lan geh khuch yor nău nchrăp ƀư, wa Võ Hữu Xuân, Kruanh UBND xă an gĭt, jêr jŏt bôk năp ma xă geh tât lah mô tŏng cán bộ way kan gay ƀư tĭng trong kan trok neh, sŏk neh:

Dăp mpeh công chức way kan bah Jrô kan wăng sa dăp mô tâm ban oh nô mhe gĭt tât nău kan. Tâm rnôk tâm ôp tâm nchră mbơh ƀư nău kan dăp rgum kơt rnoh khlay neh geh jêr jŏt. Aƀaơ wăk dăp rgum nsum bah ăp xă jêng mô hŏ dơi mbơh ƀư nău kan tay gay ndâk ƀư nău nchrăp ƀư nkual ntŭk gŭ mhe.

Tĭng wa Nguyễn Thanh Chương, ntoh măt Ban mât uănh nău nchrăp ƀư ntuh kơl ndâk njêng n’gor Lâm Đồng, jêh rlău du khay nău nchrăp ƀư dơi ntơm ƀư, lah rlău 1 khay pơk dŏng n’gâng kan ƀon lan 2 gưl, du đêt nău ntrŭnh geh tât trong kan sŏk neh mô hŏ dơi nkoch; tâm pă n’har hành chính ta ntŭk nău nchrăp ƀư hăn rlău geh rgâl; nău uănh năl rnoh khlay neh na nê̆, trong ƀư trok neh, ăp nkual ntŭk gŭ mhe... mbrơi da dê. Wa Nguyễn Thanh Chương an gĭt, ndrel đah wăk kol ăp nău mpeh tâm nău kan bah ƀon lan, n’gor Lâm Đồng dôl dăn đă Trung ương kơl lor mât tay nău kơl êng mpeh ntŭk khoảng sản gay đăp mpăn ngăch ndâk ƀư trong têh hăn ngăch Bảo Lộc-Liên Khương:

Ta trong Bảo Lộc-Liên Khương lĕ dăp rgum 11 ntu trôm lŭ choih, tâm nĕ geh 4 ntu neh rli bŭl, 1 ntu choih n’hanh 6 ntu neh n’hanh lŭ gay mbơh ƀư an nău nchrăp ƀư. 11 ntu aơ lĕ ndơ̆ tâm Nghị quyết 106 geh tam tât lơ 30/6, UBND n’gor Lâm Đồng geh dăn đă đah Chính phủ n’hanh Quốc hội an ntoch jong Nghị quyết 106 mbra ngăch lơn ƀư tĭng Luật khoáng sản.

Tĭng trong nchrăp bah n’gor Lâm Đồng, năm ndâk ƀư trong têh hăn ngăch Bảo Lộc-Liên Khương lah 30 khay. Gay đăp mpăn ngăch n’gluh an, kruanh UBND n’gor Lâm Đồng ƀa ƀơ hăn uănh, uănh nđôi, ntĭm rđău dôh rklaih wăk kol an nău nchrăp ƀư. Nkre n’hao cán bộ way kan gưl n’gor jŭt ntop kơl gưl xă; ndăn ndâk njêng Ban Mât uănh nău nchrăp ƀư Ntung trong n’gor; Ntŭk kan Hun hao neh n’gor; Ban Mât uănh nău nchrăp ƀư lŏ mir n’gor... gay ƀư tĭng ăp nkô̆ nău way kan. Wa Hồ Văn Mười, Groi Bí thư N’gor ủy, Kruanh UBND n’gor Lâm Đồng, an gĭt, đah ăp nău nchrăp ƀư khlay bah n’gor, tâm nĕ geh nău nchrăp ƀư trong têh hăn ngăch Bảo Lộc-Liên Khương, sŏk măt neh dơi mĭn lah trong mkra khlay.

Mpôl hên mĭn rwê mro nău aơ. Trong mkra nĕ lah trong kan nkoch trêng, rgŏ jă an kônh wa wât ăp nău ƀư khlay, ăp trong têh hăng ngăch aơ mbra nsĭt tay nău geh an nuĭh ƀon lan rnôk trok neh, sŏk neh an tâm di, tâm ŭch. Mpôl hên lĕ dăn đă kruanh N’gor ủy an ndâk njêng Ban ntĭm rđău ăp ndơ ƀư khlay, tâm nĕ geh ndâk njêng Ban ntĭm rđău sŏk neh n’hanh dăn đă đồng chí Bí thư N’gor ủy mbra lah Kruanh Ban aơ n’hanh mbra dăn đă ăp đồng chí tâm Ban Thường vụ N’gor ủy, ăp đồng chí Tỉnh ủy viên tĭng nuih n’hâm du đồng chí an dơn lĕ đah nău kan uănh nđôi, groi uănh rgum ntĭm rđău trong kan sŏk neh lâng.

Mkra jêr jŏt, wăk kol tâm lvang rgâl tay, pơk dŏng n’gâng kan ƀon lan 2 gưl, n’gor Lâm Đồng dôl rgum dôh rklaih wăk kol an ăp ndơ ƀư, nău nchrăp ƀư khlay gay ntrôl wăng sa-rêh jêng hun hao. Êng đah Nău nchrăp ƀư ndâk nkra trong têh hăn ngăch Bảo Lộc-Liên Khương, ăp n’gâng kan, nău kan bah n’gor n’hanh 10 xă, phường ntŭk trong hăn rlău dôl rgum âk an trong kan sŏk neh lâng. Ntoh măt Nuĭh ntuh kơl trong têh hăn ngăch Bảo Lộc-Liên Khương an gĭt, tât khay 10 tât aơ tay mbra jêh trong kan joi uănh phah bom mìn. Trong kan hăn uănh ndâk nkra, săch nuĭh ndranh mbra jêh tâm khay 11 n’hanh ntơm ƀư ndâk nkra trong têh hăn ngăch ta ntŭk ngăn.