Lôch dak bŭk ta Dak Lak, Gia Lai, Khánh Hòa dôl rgum mpôl ntop kơl nuĭh ƀon lan rgum kuaih kloh uĕh, rdâk tay ntŭk ntô, đăp mpăn srăch se, njrăng n’gang nuh srê, ngăch đăp mpăn nău rêh n’hanh nău kan tuch tăm ƀư njêng lôch bah dak bŭk.

Dak Lak lah ntŭk geh tât khuch dŭt hô dak bŭk mhe aơ nơh, đah nchih rgum bôk năp an saơ lam n’gor geh 55 nuĭh khĭt, 10 nuĭh roh, rlău 150.000 mblâm jay geh dak băm jru, lĕ rngôch khuch khat nchroh rlău 5.500 rmen prăk. Aƀaơ dak hŏ rhuăt ta lĕ rngôch ăp xã, phường mpeh luh nar n’gor, nta trong dơh gay ăp mpôl kan ndăn ntop kơl nuĭh ƀon lan. Bí thư Tỉnh ủy Lương Nguyễn Minh Triết đă ntĭm nti ăp mpôl hăn kơl êng ndơ phăt ndơ dŏng sa khlay di ntŭk, di nuĭh; du rơh luh rgum kuaih kloh uĕh ntŭk gŭ rêh, lơn lah ta nhih nti, nhih dak si gay ơm rdâk tay nău kan rhŏ dŏng an ƀon lan. Sở Nông nghiệp n’hanh Phát triển nông thôn, Sở Tài nguyên n’hanh Môi trường, Công an n’gor n’hanh Bộ Chỉ huy Quân sự n’gor hŏ rgum mpôl kan kơl ƀon lan rgum kuaih ndŏk mbrâm, dak bŏk, nkra ntŭk ntô ndơ dŏng, nsrôih ơm nsĭt tay nău rêh kơt ơm.

Kruanh UBND n’gor Dak Lak Tạ Anh Tuấn mhe tât ăp nkuăl geh nau khuch khat jâk ngăn gay mêt uănh nau kan kơl an ndrel rklaih nau khuch khat jêh dak bŭk lơh yor N’gâng kan rđau tahen n’gor ntrunh ƀư. Rnôk aơ, ma rhiăng cán bộ, tahen bah Trung đoàn 584 ndrel Trung đoàn 888 dôl kơl an ƀon lan rep kloh dak bok, nkơng tay ndoh ndơ, nkra tay ngih săm ƀŭt, ngih dak, ntrŭnh ƀư nau kan “Ngih ŭnh tahen, ƀon lan” gay đăp mpăn mông sông, đăp mpăn nau rêh ân kônh wa nkuăl dak lip lơh. Kruanh UBND n’gor đă ăp rmôt kan lŏ mât ân tâm dăch tâm ntŭk, mô ân ƀon lan ji ngot, nkre đă ăp n’gâng kan, ntŭk kan tâm rgop nsum ma rmôt tahen tâm nau rklaih ntŭk ntu, răk kloh tu dak, kơp uănh rnoh khuch khat ndrel kơl an ndâk tay nau ndâk pah kan jan sa, ơm ngăch đăp mpăn nau rêh, đăp mpăn n’hâm soan ndrel nau rêh jŏ jong ân ƀon lan jêh geh nau khuch bah dak lip lơh.

Ta Gia Lai n’hanh Khánh Hòa, pah kan njrăng n’gang nuh srê lôch bah dak bŭk dơi an ƀư ndăn ngăch gay mât njrăng n’hâm suan nsum mpôl. Sở Y tế ăp n’gor hŏ đă bar pe cán bộ, nuĭh kan jŭr tât ăp xã gay dak băm jru puh kloh uĕh ntŭk gŭ rêh, ndjăt rsang dak dŏng, ntĭm nti nuĭh ƀon lan mât srăch uĕh săk jăn nơm, rgum ndŏk, bah ir ntưp rêng nuh srê. Bah năp nê, Bộ Y tế hŏ rgum bơi 10 tấn dak si puh nkhĭt kaman dak n’hanh hang rbăn thŭng dak si dŏng tâm rnăk wâl ntop kơl Khánh Hòa, Gia Lai, Đắk Lắk lor nchrăp rdâng lơh lôch dak bŭk. N’gâng kan dak si njrăng đă nuĭh ƀon lan mô dŏng dak mô hŏ ndjăt rsang, n’hao dăng mât kloh uĕh nhih jay, mpông mpêr, nkre kan nsum đah nhih pah kan dơi kan tĭng groi nđôi n’hanh ơm năl saơ nău tât ndal.