Ôi 17/11, mih têh ntoch jong nkre đah dak bŭk êng tĭng ntŭk bah tu dak hŏ lơh khuch khat âk mpeh nuĭh n’hanh ntŭk ntô ntung trong ta ăp n’gor Lâm Đồng - Khánh Hoà n’hanh Dak Lak. N’gâng nchroh lor trôk nar Lâm Đồng an gĭt 90% rnoh neh ta n’gor hŏ bêng dak, geh ma nău dak rchoh ta ăp dak diăng jê̆ n’hanh pĭch rlâm neh ta jâng yôk. Ăp ntŭk kơt Đam Rông, D’Ran, Lạc Dương, Nam Ban, Hiệp Thạnh… ndrel ăp trong sop Quốc lộ 20, 27, 27C, 28B, Đại Ninh, Prenn n’hanh Mimosa gŭ tâm săk nkah njrăng lor mha êng.

Hôm ta n’gor Dak Lak, tĭng n’gâng nchroh lor trôk nar n’gor, âk nkual ƀon lan gŭ rđŭng dêh, ta Dak Lak ntơm băm dak; du đêt trong mbluh hăn xã, mbluh hăn thôn ntơm geh khan yơt êng. Pĭch rlâm neh geh ta âk nkual sop prêh ta Khánh Hòa- Lâm Đồng. Rlău ma pĭch rlâm neh lơh 5 nuĭh khĭt mhe geh ta sop Khánh Lê, ntŭk n’har n’gor Khánh Hoà, bar pe jât ntŭk pĭch rlâm êng ƀa ƀă hŏ dơi năl geh ta sop Ngoạn Mục n’hanh sop Khánh Sơn – nthoi Khánh Hoà đah Lâm Đồng. Mpôl kan dơi kan manh nking sop Ngoạn Mục gay đăp mpăn.