Wa Đặng Gia Duẩn, Bí thư Đảng uỷ Phường Ea Kao, ân lah, ndrel ma nau năl ăp nau kan pâl n’aih ƀư tơm, nau ntrŭnh ân ntop tay nau dơi ân du đê̆ nkuăl jêng ntŭk pâl n’aih tơm bah n’gor. Êp nê, ntoh măt aơ đă ăp nau ntrŭnh kan ân geh ƀư jru, geh nsum ma kon nŭih ndrel nau geh dơi, tâm nê ân ƀư ăp ntrong điện tâm 14 đô thị, kŏ kơt lah ntrŭt dăng nau rgum ƀư mpông tach ndeh mpar Buôn Ma Thuột jêng mpông lam ntur neh:

            ‘Mpeh ntŭk ntu ri nơm ân geh bar nau mĭn, ngoai lah mpeh ntŭk ntu đô thị ân geh nau kan ƀư ăp trong điện ăp trong đô thị bah n’gor. Tal bar lah tach ndeh mpar, đah nau dăng dơi bah n’gor mhe rnôk aơ ndrle nơm geh 2 tach ndeh mpar ri gâp đă ân geh rgum gay leo mpông tach ndeh mpar Buôn Ma Thuột jêng mpông trong đah lam ntur neh ri nơm mơ geh hun hao ngăch rgâl”.

            Ntơm bah nau uănh ăp nkuăl, wa Lữ Ngọc Tân, Kruanh rnâng kan mât nau kan nkuăl văng sa Phú Yên, lah rjăp nau ŭch ntuh kơl ntŭk ntu pă điện gay dŏng ƀư ân tam nau geh dăng dơi bah ŭnh nar njêng mhe âk tâm mpeh ba lơ, kơl an hun hao công nghiệp êp dak lêng.  Wa Tân kŏ đă mĭn nau ntrong trong hoch tă bah mpông ndrâm Bãi Gốc tât Tây Nguyên jêng trong hăn ngăch Đông-Tây, gay huch ngăn nau leo dŏng logistic ŭnh nar ndrel njêng nau nsôih ân nthoi nkuăl:

            ‘Ŭnh nar ndâk njêng mhe tâm mpeh ba dâng âk ngăn, mpeh ba lơ ndrel ăp nkuăl duyên hải ŭch geh điện ân nau dơi dăng bah ŭnh nar gay têk leo điện gay kơl an ân hun hao công nghiệp lah nau khlay. Êng nê, ntŭk ntu điện nê ri hôm geh ntrong ntŭk ntu nơm nkra geh ndơ dŏng. Nơm tâm rgop ntuh kơl rnglăp dĭng ŭnh nar tă bah ba lơ hăn tât ba dâng njok tĭng trong hăn ngăch aơ ri prăk ntuh kơl păng dêh đê̆. Nơm ân nthoi trong dĭng đah trong jong 150km. Tơm prakư ƀư nau kan aơ ê âk yơn lah săk tam ri âk ngăn”.

            Tâm nau kan mpeh tâm dâng, wa Huỳnh Ngọc Oánh, Groi Bí thư Rnâng kan Đảng uỷ Phường Tuy Hoà, lah rjăp nkô̆ nau ân hun hao bar tŏ nau geh dơi du hê bôk nŭih bah n’gor tâm năm kan mhe. Gay doi geh, tĭng wa, ân geh ntuh kơl rjăp tâm ntŭk ntu trong hăn, ngăn lah trong hăn ngăhc, nkre ƀư ueh nau dăng dơi nau kan văn hoá, pâl n’aih; dah lêng mpeh ba dâng nthoi đah yôk bri mpeh ba lơ, njêng nau dăng rgum nsum mpeh văng sa ndrel rêh jêng:

            ‘Gay dơi geh dŏng ân nâp nau dăng dơi bah n’gor ri ân geh nau ntuh kơl mpeh ntŭk ntu ƀư nau kan đah ntrong hun hao nkuăl lah du nkuăl dak lêng ndrel gôl yôk. Mô di knŭng hun hao mpeh công nghiệp ma mpeh nau ơm yau tĭng nau ntrŭnh ri gâp ân lah nê lah nau dăng mpeh ba dâng lah dak lêng, tâm rgop ăp nau ơm ueh nau vay ơm ndrel nthoi đah mpeh ba lơ ri yok nor têh jêng âk, ma nau hôm nkol bah nơm rnôk aơ lah ntŭk ntu gung trong, ngăn lah trong hăn ngăch’.

            Ăp nau rgop đă aơ lŏ ân saơ nuih n’hâm ƀư nau kan, nau mpŏng ŭch ndrel nau nsôih rgâl mhe, rƀŏng tât hun hao Dak Lak jêng ntŭk kan ngăch blau bah nkuăl Tây Nguyên ndrel Duyên hải Nam Trung bộ tâm rnôk mhe./.