Mông nti Nău Anh ta jrô 11A4 bah nai Phan Mạnh Tiến âk mpưm răm. Nău nti dơi tĭng đah nău pâl, nău tâm ngơi, tâm nchră, nău ôp n’gŭr răm... Oh Trần Tú Tài, jrô 11A4 an gĭt, bah rnôk nti ngih samƀŭt THPT Thực hành Cao Nguyên, gâp mư dơi râng ăp mông nti Nău Anh uĕh kơt aơ, kơl wât kăr dơh n’hanh ngăch lơn.

 Gưl nti ri nai pă kloh bôk nău n’hanh hăn tĭng bôk nău gay kơl mpôl oh gĭt kloh lơn tĭng gưl. Jêh nĕ nai mbra geh nău ntĭm prêh lơn, ntop kơl an oh geh nău nti n’hao prêh n’hanh nai hăn ndrel, uănh nđôi n’hanh nkra an oh gay oh dơi rgâl tĭng nar.

Tâm rnôk ăp kon hŏk THPT gơih nđơr đah ăp trong ƀư nti Nău Anh bah nai mom Phan Mạnh Tiến yor kơl n’hŭch ŏk r’ah nti, n’hao uĕh răm nău wât, ri ăp sinh viên Đại học Tây Nguyên kiến tập ta aơ, lĕ dơi saơ du nău mhe tâm nău kan bah nơm. Băl Phạm Thị Thu Hà, sinh viên khoa ngoại ngữ, Đại học Tây Nguyên, nkoch:

Oh nti tay geh âk nău blău ơm bah nai gay bah kơi aơ dơi kơt dŏng tâm nău ntĭm nti.

Đah kon hŏk ngih samƀŭt THPT Thực hành Cao Nguyên, nai Tiến mô knŭng lah nuĭh ntĭm rplay samƀŭt ma hôm nuĭh gĭt djăt, nkoch. Âk kon hŏk joi tât nai kơt du hê nô têh gay nkoch bri, dơi nchrŏng trong tâm lvang têh săk geh âk nău rgâl. Oh Lê Sỹ Trọng, jrô 11A5 nkah tay ƀư ngăn râng tâm rlong rdâk njêng nău kan mĭn ƀư mhe:

Nai Tiến lah nuĭh hăn ndrel đah mpôl oh, ntop kơl mpôl oh dŭt n’hâm tâm nău nchrăp ƀư mât djăr m’ơk lêng tâm n’gar đah dak si. Nai dŭt n’hâm tâm ăp nău, nai ntĭm an mpôl oh hăn mĭn joi, nta nuih n’hâm an ăp nuĭh. Jêh đêt khay ƀư tĭng nai ntĭm n’hanh lĕ dơi geh, rơh bôk năp ma he dơi ƀư nău nĕ ri dŭt ŭch nđơr, dơi geh nău rƀŏng ri oh saơ dŭt răm.

Tâm ban đah ntĭm nti, nai Phan Mạnh Tiến hôm lah Bí thư Đoàn ngih samƀŭt dŭt gơih, ngăch prăl. Rlău 10 năm pah kan ta ngih samƀŭt, nai lĕ mbơh ƀư dŭt âk nău kan kơl nuĭh tâm n’hanh bah dih ngih samƀŭt. Yơn tâm rnôk  srê COVID-19 ƀư nău nti trực tuyến jêng jâk hô, nai tâm ôp tâm nchră ƀư rơh tâm rlong báo tường điện tử đah nău Anh “Ngày hội viên phấn vàng”, wăch rgum n’ăp nai tâm n’hanh bah dih dak râng. Âk bôk nău ƀư kơl nuĭh yor nai rdâk ƀư kơt “Tết yêu thương”, Ntop soan yan tâm rlong”, Mpoh jrêng nkah gĭt”, “Trong hăn sĭt ntŭk chăng”, pah kan ntop kơl n’har bri... lĕ an rhiăng nklâm prăk kơl hăn nti, kơl âk kon hŏk jêr jŏt n’hanh nkoch mbơh âk đoàn viên ntoh lư an Đảng. Wa Nguyễn Tiến Chương, Groi hiệu trưởng ngih samƀŭt THPT Thực hành Cao Nguyên uănh lah:

 Nai Tiến lah du hê nai mom dŭt ngăch prăl đah lĕ 2 ntil nău ƀư ntrong leo n’hanh nău way kan, ndơ̆ nău ƀư ntrong leo đoàn lah êng n’hanh ntrong leo druh ndăm, kon hŏk, sinh viên pah kan dŭt n’hâm. Nai n’hao kơt dŏng AI tâm ntĭm nti; mât câu lạc bộ nău Anh, ƀư rơh tâm rlong Rung chuông vàng tâm ngih samƀŭt, ndơ̆ tay trong nti nău Anh mhe, nti hăn ndrel đah ƀư ngăn, trêng ntĭm an ăp oh ŭch nti nău Anh.

Ăp nău nsrôih mô rlu bah nai mom Phan Mạnh Tiến lĕ dơi djôt dơn tâm di. Năm 2023, nai geh giải nhì nai gĭt blău gưl n’gor. Năm 2024, nai dơi Trung ương Đoàn rnê rhơn lah nai mom ntoh lư lam dak n’hanh lah ngoăy tâm âk nuĭh trêng ntĭm nău ŭch nđơr ta Đại hội “Druh ndăm gĭt blău ƀư tĭng nău Wa” rơh tal 8 năm 2025. Nău ƀư mhe “N’hao rplay nău Anh đah kơt dŏng AI” bah nai geh giải A gưl ngih samƀŭt n’hanh giải C gưl n’gâng kan, dơi uănh lah ntrong ƀư ntĭm nti tâm di trong rgâl mrô tâm ntĭm nti. Nkoch mpeh trong nchrŏng êp tât, nai Phan Mạnh tiến an gĭt:

Gâp an rgâl mhe trong gĭt tât, m’hâm ƀư gay geh âk nău ƀư ma ƀư an ăp oh râng dŭt n’hâm n’hanh dơi geh săk rnglăy. Nti ôp ăp ntrong ƀư gay geh ăp nău ƀư ma ăp oh uănh tât, ŭch ri gâp mbơh ƀư jru hvi. Nsrôih gay ndâk njêng ăp câu lạc bộ ta lam ngih samƀŭt, hun hao tay câu lạc bộ nău Anh, uănh n’gang nău di, câu lạc bộ blău rêh n’hanh câu lạc bộ kon hŏk 3 uĕh.

Đah ăp nău ƀư dơh yơn nâp nâl, nai mom Phan Mạnh Tiến dôl rgopp mât du rơh kơn kon hŏk gĭt tâm rŏng, geh lĕ đah nău kan n’hanh ŭch hun hao săk nơm. Tă bah ăp mông nti uĕh n’hanh n’gŭr răm, nai lĕ trêng ntĭm nău ŭch nđơr gay kon hŏk ŭch tay n’hanh nti ngoại ngữ uĕh lơn./.