Ndrel đah ntrong kan ntrơn ƀon lan, phường Sông Cầu lĕ nchrăp tŏng ăp ndơ rgum, nchrăp ndơ sông sa, dak kloh, mpôl kan dak si, nkre lah pă dăp mpôl kan kâp chăm 24/24 ta nkual duk mpan kâp chăm n’hanh nkual ƀon lan gŭ. Ăp ntŭk duk mpan ta dak lêng geh ƀư mô an ƀon lan gŭ tay ta nĕ. Tât râng kan ta Tổ dân phố Từ Nham, wa Đỗ Hưũ Huy, groi Bí thư n’gor Uỷ Đăk Lăk uănh nă ăp ntŭk dak hao têh, tât ôp khâl ƀon lan ta nkual nde der phŭt n’hanh ntĭm đă mô hăn nsong n’hanh ntrơn lĕ ăp rnăk hôm e. N’gor Đăk Lăk lĕ geh kuăl đă nuĭh ƀon lan mô plơ̆ ta jay lôch rnôk phŭt mô hŏ bah, ƀư tĭng nău đă mô dơi hăn ta dak lêng n’hanh tĭng nău mbơh njrăng bâh ntŭk kan, mât đăp mpăn săk soan an ƀon lan tâm 48 mông mih têyh sial dăng.

Kơp tât nung nar 6/11, lam n’gor Gia Lai lĕ jêh nău trơn rlău 100.000 rnăk, tât ăp ntŭk gŭ ndê đăp mpăn. Hang rhianưg ngih samƀŭt, ngih văn hóa n’hanh ngih pah kan dơi mpla dŏnbg ƀư ntŭk dêr phŭt. Ăp ntŭk prăp ndơ dŏng, pring xăng, dak si dơi pơk hvi pă an; rmôt điện lực, viễn thông, ngih dak si pă kâp măng nar gay đăp mpăn nău tâm ôp tâm ngơi, mât uănh săk soan n’hanh nău ŭch khlay an nuĭh ƀon lan. Ta năp nu nău jêr bah phŭt, wa Phạm Anh Tuấn-Kruanh UBND n’gor Gia Lai; ntĭm rđău kruanh N’gâng kan ntĭm rđău Tiền Phương, lĕ ƀĭt joet pơk trong rdâng njrăng gưl 5 ta 58 xă, phường nkual Gia Lai Đông (n’gor Bình Định ơm). Nău ntĭm rđău ngăn bah n’gor lah đăp mpăn nău rêh bah nuĭh ƀon lan lor bôk năp; môa n nuĭh ƀon lan gŭ nkual phit klach. Ăp khuch khat geh yor thơ tha, nuĭh djôt bôk ta ntŭk an trok na nê̆.

Năm aơ, ƀon lan nkual dak lêng Khánh Hoà mô dơi bân thơ. Rlău 42 rbăn ntŭk rong tui ka đah rbăn nuĭh kan ta njônh dak lêng Vân Phong n’hanh nkual dak lêng Nha Trang lĕ geh đă hao ta kơh. âk rnăk kât nâp duk mpan đah rse cáp têh, ƀư nâp ntŭk ndưp nde, geh rnôk lah an ngâm du đê̆ duk mpan ta dak jru gay ma bah rdul dak lêng ƀư chah đang. Ta 6 ndrâm dak  nhup ka n’hanh ntŭk kât duk rgŏ dạk lêng, klâp ma geh 5 rbăn duk joi ka lĕ geh mât đăp mpăn. Ta  lam n’gor, 9 rmôt kan gưl n’gor geh UBND n’gor Khánh Hoà njêng, tât ta ntŭk geh nău tât gay ma ntĭm đă n’hanh ntĭm tâm rdâng. ăp mpôl kan geh pă jao mât uanh đăp mpăn ntŭk  dak bât, trong rse điên n’hanh ntŭk mbơh nău, leo ndơ dŏng, nuĭh kan tâm rdâng đah mih sial, dak rchoh n’hanh rluh neh, mât đăp mpăn an nuĭh ƀon lan.