Jêh rơh mih têh jŏ jong na nao tâm ăp nar bah năp ƀư âk ntŭk tâm nkual Nam trung bộ n’hanh Tây Nguyên geh dak lip hô. N’gâng kan ƀon lan ndrel nuĭh ƀon lan nsrôih mkra khuch khat, ơm đăp mpăn nău rêh. Xă Yang Mao, n’gor Dak Lak lah ngoăy tâm âk ntŭk khuch hô bah dak lip. Tĭng rnoh kơp bôk năp, jêh rơh mih têh rơh aơ, lam xă Yang Mao geh nklăp 80 jay geh dak băm, tâm nĕ 2 jay rlâm lĕ rngôch n’hanh 5 jay geh dak klôn rdu.

Âk trong hăn tâm thôn geh pĭch rlâm, nkhah êng trong hăn du đêt nkual. 2 ntung ta ta trong Đông Trường Sơn khuch djơh, Tỉnh lộ 12 nkhah êng jêr jŏt an nău hăn tât n’hanh wơt kơl. UBND xă lĕ rgŏ jă lĕ rngôch rmôt ta ntŭk, geh công an xă, dân quân tự vệ n’hanh ăp rmôt, rgum ntop kơl nuĭh ƀon lan kaih rwăch ngih wâl, trơn tât ntŭk đăp mpăn. Nkre, tâm rgop đah ntŭk kan ndâk ƀư ndăn soih trong hăn ăp ntŭk pĭch rlâm gay rdêng ndơ ntop kơl n’hanh ndơ dŏng.

Ăp nar rlău aơ, mih têh  ntoch jong ƀư dak tu hao têh ngăch, ƀư âk nkual ta xã Krông Bông, n’gor Đắk Lắk geh băm jru, khan yơt êng. Tâm nê, thôn 27 lah ngoăy tâm ăp ntŭk geh tât khuch jru. Tĭng UBND xã Krông Bông, tât kêng măng 17/11, puăn thôn: 27, 28, 29 n’hanh 30 đah rlău 500 rnăk hŏ geh khan yơt êng lĕ rngôch. Ndrel đah nê, âk ntŭk klach rvê ntoh pĭch rlâm. N’gâng kan ta ntŭk hŏ hop ndal Ban njrăng n’gang ƀon  lan, n’hao nuĭh gŭ kâp ndăng măng nar, drăng rse nkah njrăng lor, gŭ nking ta ăp ntŭk băm jru, nkre ntrơn nuĭh ƀon lan tât ntŭk gŭ đăp mpăn. Rlău 100 cán bộ, công an, dân quân ndrel mpôl kan ta ntŭk dơi rgum du măng rsol; xã hŏ dŏng ca nô n’hanh duk mpan bah doanh nghiệp gay ntop kơl đŏng.

Mih têh jŏ jong, âk ntŭk ta Khánh Hòa dak băm jru, trong hăn nkhah êng. Ta yôk Khánh Lê (QL27C), pĭch rlâm hô ƀư âk nuĭh khĭt. Mih têh na nao ƀư taluy trong Quốc lộ 27C pĭch rlâm, âk lŭ têh  jŭr măt trong. Ôi 17/11, nău pĭch rlâm hô ƀư ăp rmôt wơt kơl geh nkhah êng. Tât 11h, lĕ rngôch 15 cán bộ, tahen lĕ dơi ndơ̆ luh nkual klach. Ngih pah kan dơi kan lĕ rgŏ jă ndeh măy mŏk rli, nkra neh lŭ gay tât nkual pĭch rlâm. Ta Bắc Nha Trang, ăp trong 23 khay 10, Nguyễn Khuyến, 2 khay 4... dak băm jru; nkual mper dak me Cái Nước hao tât măt trong. Ta Cam Ranh n’hanh Cam Lâm, âk nkual ƀon lan gŭ geh dak băm, geh rnăk an hao chor jay kâp wơt kơl. Rmôt kan dơi kan ƀư ntŭk kâp mbơh njrăng, trơn nuĭh ƀon lan luh ăp nkual rđŭng, nkual mô nâp.