Lĕ rnoh ntuh kơl 7 ngih nti lah 1.516 rmen prăk, rdâk njêng mhe tâm ban 212 jrô nti n’hanh ăp ntŭk leo kan n’hanh ndơ dŏng kĩ thuật. ăp nău kan mbra geh njêng nău kan nti an nâp nâl, an rlău 7 rbăn kon hoc ta n’har bri n’gor Gia Lai, dŭt âk lah kon hoc rnoi đê̆. Ntoh ngơi ta rơh ntơm ƀư, Groi Thủ tướng Hồ Quốc Dũng lah na nê̆ nău kan geh nău khlăy ngăn đah nkual n’har bri kơl an hun hao rnoh nuĭh kan, ndâk nsơm nău tâm rnglăp n’hanh mât rnă njrăng ngih dak. Groi Thủ tướng Hồ Quốc Dũng đă n’gor Gia Lai an geh nchrăp tŏng na nê̆, mât uănh n’hanh leo ƀư kan mât đăp mpăn, di nău kan. Nkre lah, đă n’gâng kan ntĭm n’hanh nti ƀư lôch ăp trong kan, nău kơl kan kơl an kon hoc rnoi đê̆, ngăn lah ăp nău kan kơl an geh tât ntŭk gŭ ntŭk sa hăn nti nti ren.

 Tâm nar naơ đŏng 16/11, UBND n’gor Quảng Ngãi geh ƀư rơh ntơm rdâk njêng 4 ngih nti Phổ thông Nội trú bar gưl Tiêủ học- Trung học cơ sở ta ăp xã n’har bri Dục Nông, Sa Long, Rờ Kơi n’hanh Mô Rai. Ntoh ngơi ta rơh ntơm ƀư, Groi Thủ tướng Nguyễn Hoà Bình lah na nê̆, ăp nău kan mô dơn lah ntŭk nti ren an kon hoc ma hôm nha lah nău knơm, nău nsrôih hun hao n’hanh nău tâm rnglăp đah nkual ba dâng n’hanh ba lơ, đah ƀon lan lam dak đah ƀon lan n’har bri. Nău ntơm ƀư ăp nău kan ngih nti phổ thông nội trú 2 gưl ta n’har bri n’gor Quảng Ngãi lah nău kan dŭt khlăy, mpơl nău dơn kan bâh Đảng, Ngih dak đah nău kan ntĭm nti n’hanh ƀon lan nkual njônh ngai, nkual n’har bri.