Bah năp nău tât krit nji bah phŭt mbrô 13 (Kalmaegi), Nam Trung bộ- Tây Nguyên hŏ an ƀư ăp kôp ăp trong rdângh lơh gay mât đăp mpăn săk nuĭh, drăp ndơ bah ƀon lan, nkre njêng Sở Chỉ huy bôk tơm gay rđău đă, ƀĭt juel ăp trong njrăng, n’gang phŭt lam n’gor.

N’gor Gia Lai hŏ nklêh pơk lĕ rngôch ăp trong nchrăp trong rdâng lơh đah phŭt mbrô 13 (Kalmaegi) ta rnoh gưl 5, gưl chông dŭt tâm rdâng lơh đah trôk nar khuch djơh, đah 16 xã meng dak lêng, n’hanh rnoh gưl 4 đah 42 xã hôm ƀa ƀă mpeh nkual luh nar n’gor. Nchrăp, bah năp 12h nŭng nar aơ (6/11), n’gor mbra ƀư wat jêh nău ntrơn du bơi 100.000 rnăk ƀon lan, tâm ban nklăp 350.000 nuĭh, ta ăp nkual geh tât dơh khuch n’hanh meng dak lêng, gay  đăp mpăn lĕ rngôch bah năp phŭt tât ntô̆ rlău.

Sở Chỉ huy bôk tơm n’gor Gia Lai dơi ƀư ta phường An Nhơn, tă bah wa Phạm Anh Tuấn – Kruanh UBND n’gor, Kruanh Mpôl rđău đă njrăng n’gang ƀon lan n’gor – ƀư Kruanh rđău đă. Ăp ủy viên Ban Thường vụ Tỉnh ủy dơi tâm pă na nê̆ nău kan mât uănh, tĭng groi nđôi n’hanh rđău đă pah kan njrăng, n’gang phŭt sial ta tĭng nkual kơt Quy Nhơn, Hoài Ân, Tây Sơn, Hoài Nhơn, Vĩnh Thạnh, Phù Mỹ n’hanh ăp xã mpeh nhâp nar Gia Lai, đăp mpăn ăp mpôl dơi rgum tât dŭt âk tĭng trong rƀŏng “puăn ta ntŭk”, nchrăp rdâng lơh đah ăp nău tât ndal rnôk phŭt mbrô 13 tât dăch neh kơh.

Lam n’gor Dak Lak geh 2.555 duk ka tâm rnoh 10 rbăn 994 nŭih, rnôk aơ dôl tât tâm ntŭk ndrâm đăp mpăn; êng Phường Xuân Đài mât 363 duk ka, tât 4h kêng măng lơ 5/11 dĭng lĕ hŏ hao kơh. Nau kan mât ntrong rong dak lêng têh kŏ geh ndal ƀư đah 536 nong ka tâm 23 rbăn 329 ntŭk rong tui ndrel 252 ntŭk rong Hàu; rmôt kan tâm nkuăl đă ƀư jêh nau rdâng nâp bah năp 10h lơ 6/11. Ndrel ma nê, nau kan mât đăp mpăn ndơ sa ndrel ndơ dŏng kơl an geh ƀư ndal. N’gâng kan Công thương đă ƀư jehe nau mât prăp ndơ sa, dak ngêt, ndơ dŏng, đah rlau 400 tấn phe, rlau 10.350 thùng dak, 72 rbăn thùng mì tôm ndrel rlau 1000 blau ntă nthưp, nkre rgum âk sing viên, ndơ dŏng nchuăn rdeng gay kơl an rnôk tât ndal. Rđau tâm n’gâng kan, Kruanh UBND n’gor Tạ Anh Tuấn đă ăp nkuăl mra  rdâng ma nau tât ndal, mât đăp mpăn ân ƀon lan.

Aƀaơ, lam, n’gor Khánh Hoà geh bơi 7.000 duk lơh joi ka, tâm nê nklăp 900 bôk đah rlău 5.700 nuĭh kan dôl hăn nklang dak lêng, hŏ dơi mbơh n’hanh ôp kuăl sĭt nde ntŭk đăp mpăn. Lĕ rlău  rlău 3.400 gŭk mât ka đah rlău 100.000 gŭk mât tui ka hŏ rlu mât, nuĭh kan sĭt neh kơh der phŭt. Ăp n’glău n’gâr dak n’hanh thủy điện dơi tĭng groi nđôi lhăt, ndjoh tâm pă dak gay wơt lor dak bŭk, đăp mpăn an nkual bah  dâng dak bât. Tĭng nău nchroh bah nhih pah  kan nchroh lor trôk nar, ntơm bah nar 6 tât 8/11, Khánh Hòa mbra geh mih têh tât dŭt têh, sial dăng gưl 10-12, dak lêng nchŏch prêh 3-5 mét. Đah nuih  n’hâm nchrăp lor, lĕ n’hâm suan n’hanh tâm rnglăp, n’gor dôl rdâk njêng “păng khêl” dŭt nâp, đăp mpăn roh huach mbra hŭch dŭt đêt n’hanh đăp mpăn bah ăp nuĭh ƀon lan way dơi n’gluh dâk bôk năp.