Kêng măng nđaơ (20/11), Groi Thủ tướng Chính phủ Hồ Quốc Dũng lĕ tât Khánh Hòa, na nê̆ uănh nđôi nu nău mih dak lip, ntĭm rđău trong kan wơt kơl ƀon lan n’hanh mkra khuch khat. Uănh lah prêh nuih n’hâm bah nuĭh ƀon lan n’hanh nău nsrôih bah ăp rmôt kan bôk năp, Groi Thủ tướng djôt dơn n’gor Khánh Hòa lĕ rgŏ jă dŭt n’hâm rmôt nuĭh, tâm nĕ Bộ Tư lệnh Nkual 4 Hải quân dŏng ca nô hăn măng nar ndơ̆ hăng rhiăng nuĭh ƀon lan luh nkual phit klach. Rmôt tahen, công an n’hanh tahen đặc công dak dơi ntop tay tât ăp xă hôm e nkhah êng. Bôl rnoh dak ta du đêt ntŭk dôl rhoăt, yơn dak lip hôm e geh jêr jŏt, bri hôm mih, âk trong hăn dak băm mô lah pĭch rlâm. Groi Thủ tướng đă nuĭh ƀon lan gŭ tay ta ntŭk dêr đăp mpăn, mô plơ̆ sĭt êng jay rnôk mô hŏ geh nău mbơh bah n’gâng kan ƀon lan.

Tât kêng măng lơ  20/11 mih ta mpeh luh nar-ba dâng Nam Trung bộ n’hanh Tây Nguyên lĕ bah ir. Ntŭk geh dŭt âk mih ta rlău 350mm, hŭch du n’gul đah rnoh mih dŭt têh bâh lơ 19/11. Dak bât pă điênj Sông Ba Hạ lĕ hŭch rnoh m’ơk n’hanh dak buk ta ăp dak me ta Gia Lai, Đăk Lăk lĕ hŭch âk. Quốc lộ 20 hăn let nhâp nar n’hanh mpeh luh nar Đăk Lăk lĕ geh mbơh hŭch. Quốc lộ 29 hăn let Tây n’hanh peh luh nar Đăk Lăk lĕ dơi hăn n’hanh âk mpôl vơt kơl lĕ geh nsĭt âk ndeh klư, ndơ sông sa, dak si ndơ dŏng, jur mpeh luh narr kơl an ƀon lan ta ntŭk dak buk. Rnoh mbơh njrăng mbơh bâh mbrô 3 bâh nar aơ lĕ jur ba dâng 1 tâm 2 nar tay. Ta Lâm Đồng, ntŭk mih dŭt têh geh lĕ bah oi, dŭt âk lah ăp xã Dral, Đơn Dương...ba dâng dak bât pă điện Đa Nhim, lĕ geh rlet rlau nău njrăng ndal, 1500 rnăk ƀon lan dôl geh rgum ndâk nsơm nău tât. Lôch dak rhoăt, nuih ƀon lan n’hanh n’gâng kan ta ntŭk rgum ndâk nsơm nău tât. nău kan vơt kơl ta nkual dak buk mpeh luh nar ba dâng trung bộ n’hanh Tây Nguyên hôm nha ngăch ndal n’hanh âk nău jêr.

Ta Lâm Đồng, yor rnoh pơk djoh dak bah Công ty Thủy điện Đa Nhim-Hàm Thuận-Đa Mi rlău bâr Đơn Dương hao na nao tâm măng 19/11, geh rnôk hao tât 2.580 m3/s, ăp xă bah dâng dak me Đa Nhim-tâm nĕ geh xă D’ran-lĕ băm jru tâm dak. N’gor lĕ an rgŏ rmôt nuĭh, ndeh rklư, duk mpan gay trơn rlău 1.500 nuĭh ta xă D’ran tât ntŭk đăp mpăn. Tĭng rnoh kơp bôk năp, geh bơi 750 rnăk jay geh dak băm, khuch hô; 5 rnăk jay geh rlâm; nklăp 1.320 ha biăp bum geh khuch khat. Mih têh hôm ƀư âk ntŭk pĭch rlâm, rluh neh ta ăp trong bah n’gor.

Rlău ma ntŭk pĭch rlâm ta yôk Mimosa-ta Quốc lộ 20-ƀư trong chah đang trong, âk trong thôn ƀon geh khuch djơh hô. Trong hăn bah xă Đan Phượng hăn xă Tân Thanh (aƀaơ ta xă Tân Hà-Lâm Hà) geh pĭch rlâm, trong hăn bâp kol. Kruanh UBND n’gor Lâm Đồng đă n’gâng kan ƀon lan ăp xă n’hanh rmôt kan dơi kan trơn nuĭh ƀon lan luh nkual phit klach, pă ntŭk gŭ đăp mpăn, tŏng ăp ndơ sông sa, dak ngêt, mŭng nah n’hanh ndơ dŏng.