Ngih samƀŭt Tiểu học-Trung học cơ sở Sa Loong, n’gor Quảng Ngãi aƀaơ geh 36 jrô đah rlău 1.100 kon hŏk, tâm nĕ 90% lah oh kon ƀon lan ăp rnoi mpôl đêt kơt Xơ Đăng, Ca Dong, Giẻ Triêng, Bahnar, Êđê, Mường, Tày... Năm nti tât, têh ngih sambŭt nchrăp hao 40 jrô đah nklăp 1.250 kon hŏk. Ngih samƀŭt Tiểu học-Trung học cơ sở Sa Loong dơi săch ndâk ƀư jêng ngih samƀŭt nội trú 2 gưl, rhŏ an oh kon lam xă. Aơ lah bôk nău kan têh, kơl kon hŏk n’har bri dơi geh nti nsơm uĕh lơn.

Wa Nguyễn Hữu Phượng, Hiệu trưởng Ngih samƀŭt Tiểu học-Trung học cơ sơ Sa Loong an gĭt, aƀaơ ngih samƀŭt geh 70 cán bộ, nai, nuĭh kan. Ngih samƀŭt lĕ ƀư ntĭm nti 2 ôi du nar tâm âk năm bah năp yơn mô tŏng ndơ gay ƀư bán trú an kon hŏk. Ngih samƀŭt dôl tâm rgop đah UBND xă Sa Loong n’hanh ăp n’gâng kan, nău kan geh tât pơk hvi neh nkrem an nău ndâk ƀư ngih samƀŭt 2 gưl, nội trú tĭng nău ntrŭnh bah N’gâng kan kan ntĭm nti đah rnoh neh đêt ngăn 5 ha.

Jêh rnôk geh nău mbơh bah lơ 3/11/2025 mbra ƀư ntơm ndâk nkra, jêng ăp ban, nău kan, ăp gưl dôl ndăn nkra n’hanh an nău ntrŭnh gay ƀư tĭng di ngăch trong ƀư. Aƀaơ, jrô nti bah ăp mon hôm e mô tŏng; nău ndâk ƀư mbra dơi ƀư ta gưl neh dơi ntop tay, mô khuch tât nău nti bah kon hŏk. Ăp nuĭh mpŏng nău ntrŭnh ơm dơi mbơh ƀư gay kônh wa dơi geh dŏng nău kơl bah Ngih dak an nkual n’har bri.

Tĭng wa Nguyễn Ngọc Thái, Giám đốc N’gâng kan ntĭm nti n’gor Quảng Ngãi, ƀư tĭng nău ntrŭnh bah Chính phủ, n’gor Quảng Ngãi ndâk ƀư 9 ngih samƀŭt tiểu học n’hanh THCS nội trú ta 9 xă n’har bri bah n’gor. Tâm lvang 1 (năm 2025), n’gor mbra ntơm ndâk ƀư ta 9 xă geh Dục Nông, Sa Loong, Rờ Kơi n’hanh Mô Rai; dĭng lĕ prăk ntuh kơl rlău 1.000 rmen prăk. Wa Nguyễn Ngọc Thái an gĭt tay, tâm năm 2025, Chính phủ lĕ pă an n’gor 117 rmen prăk, hôm ƀa ƀă mbra tâm pă tâm năm 2026.

Nău aƀaơ dôl kol yơn lĕ rngôch ăp n’gâng kan, nău kan kơl da dê. Lah nsum lah neh bah xă ri lĕ yơn tâm pă gưl an ntĭm nti ri mô hŏ pă. Jêng aƀaơ an nkra di, ntop tay dăp rgum m’hâm ƀư gay pă neh, ntơm ndâk ƀư ngih samƀŭt tâm khay ơm ngăn.

N’gor Lâm Đồng geh 5 xă n’har bri neh kơh lah Tuy Đức, Quảng Trực, Thuận Hạnh, Thuận An, Dak Wil. Tâm nĕ knŭng geh du ngih samƀŭt phổ thông dân tộc nội trú. Ƀư tĭng ntĭm rđău bah UBND n’gor, N’gâng kan  ntĭm nti Lâm Đồng dôl tâm rgop đah ăp nău kan n’hanh n’gâng kan ƀon lan 5 xă, mbơh ƀư nău rgop an tâm nchră ndâk ƀư du xă 1 ngih samƀŭt nội trú 2 gưl.

Tĭng wa Lê Thị Bích Liên-Giám đốc N’gâng kan ntĭm nti n’gor Lâm Đồng, lĕ geh 2 xă n’har bri, lah xă Thuận An n’hanh Quảng Trực dôl nsrôih nchrăp ăp ndơ n’hanh mbra ƀư dâl tâm năm 2025 aơ. Du ngih samƀŭt geh têh 30 jrô nti, tŏng ntĭm nti an nklăp 1.000 kon hŏk. Wa Lê Thị Bích Liên rhơn răm, ăp ndơ ƀư aơ dơi mpŏng kâp mbra kơl kon hŏk nkual n’har bri geh ntŭk gŭ, ntŭk sa nti nsơm đăp mpăn, rgop hun hao nuĭh kan n’hanh nâp nâl mât njrăng bri dak-rnă njrăng nkual n’har bri.

Ta xă Quảng Trực n’hanh xă Thuận An dơi N’gâng kan ntĭm nti tâm săk ndơ ƀư ntuh kơl, prăk lah 114 rmen prăk n’hanh đă rdâk ƀư bah năp lơ 19/12/2025. Tât aƀaơ, xă Thuận An lĕ tŏng ăp ndơ n’hanh Ban mât uănh nău nchrăp ƀư 3 dôl ƀư ăp samƀŭt rhoăch nău, samƀŭt gay mbơh an, nsrôih dŭt khay 10 jêh n’hanh bôk khay 11 tât mbra ntơm ƀư. Hôm xă Quảng Trực dôl ƀư nău sŏk neh lâng, nsrôih dŭt khay 12 mbra ntơm ƀư.

Ƀư tĭng nău ntrŭnh bah Bộ Chính trị mpeh ndâk ƀư trong ngih samƀŭt an ăp xă n’har bri, tâm năm aơ, Dak Lak mbra ntơm ƀư 3 nău nchrăp ƀư ngih samƀŭt phổ thông nội trú 2 gưl đah dĭng lĕ prăk ntuh kơl rlău 290 rmen prăk. Ăp ngih samƀŭt aơ dơi ƀư ta 3 xă n’har bri Ia Lôp, Ia Rvê n’hanh Buôn Đôn n’hanh mbra dơi ƀư rĭng tâm bôk khay 11 tât.

Bí thư N’gor ủy Dak Lak Lương Nguyễn Minh Triết an lah, Ia Lôp lah ngoăy tâm 7 xă mô nglăp nsum bah n’gor, geh êng nkual n’har bri jêng  nkre geh dơh, nkre rdâng đah âk ntŭl rlong yor ntŭk hvi, nuĭh ƀon lan đêt, rnoh rnăk ach o n’hanh êp ach o âk. Bí thư N’gor ủy đă ƀon lan  năl na nê̆ nău geh, mkra ntŭk mô nâp, rgâl mhe nău mĭn gay hun hao nâp nâl tâm lvang mhe.

Kon nuĭh nĕ đŏng, xă nĕ yơn ndoh ndơ, nu nău rnoh âk, đă nău kan aƀaơ hao âk ngăn đŏng, nău kan bah năp đaơ bah xă ơm knŭng 197 nău kan aƀaơ hao 1065 nău kan. Jêng an mĭn tay ntŭk gŭ, nuih n’hâm hao bah nơm bâh nĕ gay mĭn tay trong rƀŏng pah kan, trong ƀư nău kan, trong uănh n’hanh nău mĭn bah nơm. Nău mĭn an lam ntŭr neh, trong uănh an lam dak n’hanh nău ƀư ri ta ntŭk ri ăp đồng chí mư dơi gĭt tât nău đă rgâl aƀaơ.