Du ôi ta thôn 1, xã Krông Ana.Một buổi sáng ở thôn 1, xã Krông Ana. Ta ntŭk tăm sêt hvi klâp ma bar pe jât met, nô Dương Huỳnh Linh dôl ndrel đah I ur rlơk rhe, ndum sêt gay ma nchrăp an rơh sêt chăt mhe. Ƀô sêt nse ndrel tâm rhe l’ĭt, lam ta ntŭk jay. Nô Linh lĕ bên đah nău kan tăm sêt lĕ 14 năm aơ hôm, ntơm bâh bar pe jât ntŭk tăm jê̆, aƀaơ nău tăm sêt bâh nô Linh mô dơn nsĭt tay nău geh đăp mpăn ma hôm nha nta pă nău kan ƀa ƀơ an âk nuĭh pah kan ta ntŭk. Nău nkoch ntơm njêng nău kan bâh nô lĕ trĕ lam nău gơih nđơr an âk rnăk nănh rgâl kan-săch ƀư kan tuch tăm kloh ueh, bah ir geh nău tât khuch.

 “Lĕ ma rnăk vâl bâh bar ding mpeh ur sai mpôl rnoi aƀaơ hun hao bâh tơm sêt da dê. Kăl e nơh rnăk hên ach o ngăn yơn bâh tơm sêt aơ ma tŏng sa tŏng nsoh”.

Ta nkual neh nĕ đŏng, rơh mom dôl geh ndơn tay tĭng trong kan êng bâh nơm n’hanh geh dŏng công nghệ ueh mhe. Đah nô Huỳnh Đức Cường, 30 năm deh, tă nti Đaị học kỹ thuật ta nkuăl ƀon têh Hồ Chí Minh, nău kan tăm sêt mô dơn lah rnoh nău rêh, ma hôm nha lah du nău kan tuch tăm tâm pleh dŭt ueh blău, nkre dăch bên đah ntŭk gŭ rêh, nkre n’hao nău geh ndơ tuch tăm ta ntŭk.

 “ Nău kan aơ nkre ma nta nău kan an ƀon lan gŭ ngai, tal 2 lah pă nău geh âk tâm ban. Ntĭt lah kơt jay gâp geh 10 ntŭk tăm sêt rĭ nău geh n’hâp lĕ prăk kan du khay hôm nha bâh 20 tât 30 rkeh prăk đŏng, păng hôm nha geh knơm âk ta rnoh khlăy tăch sêt đŏng. Gâp saơ lah dŭt ueh ngăn, lĕ lah du nău kan tâm pleh bâh ntơm rhe he rek ba ta lŏ he ƀư ndum jêng geh sêt, lôch nĕ he njôt rhe tă tăm sêt nĕ he poh an cà phê, tiu, sầu riêng, dŭt ueh ngăn”.

Tĭng nău kơp bâh ta ntŭk, bâh bar pe rnăk rlong ƀư, tât aƀaơ lam xã Krông Ana lĕ geh rlău 1 rbăn ntŭk tăm sêt pah kan ăp khay ăp năm, pă nău kan an rlău 2 rbăn nuĭh. Mô dơn kơl an ƀon lan geh nău geh đăp mpăn, nău kan tăm sêt hôm nha bah ir geh su rhe, mât ueh ntŭk gŭ rêh n’hanh hôm nha geh dŏng lĕ ndok ndơ tuch tăm . Wa Huỳnh Đức Phúc, tă kan Kruanh Hội Nông dân xã, an git.

 “Nău dơi geh ta aơ lah ntŭk tăm ba lŏ bâh Krông Ana, bâh geh ntŭk ba lŏ aơ rĭ ƀon lan mơ geh rhe gay nti tăm sêt gay ma tâm kơt nti nău kan tăm sêt rhe an hun hao nău rêh. Râng geh ăp rnăk  geh dŭt đê̆ lah 2 ntŭk tăm, geh rnăk 10 ntŭk tăm, 20 ntŭk. Ƀon lan dŭt knơm ta nău kan tăm sêt rhe aơ. Bôk năp lah nău kan tăm kloh, ntŭk tăch dŭt đăp mpăn an ƀon lan mât tăm”.

Bâh ăp nchăp rhe lôch rek ba, nuĭh ƀon lan Krông Ana, n’gor Đăk Lăk lĕ njêng du trong hăn mhe nâp nâl, rgâl ndơ ndok tuch tăm jêng nău pah kan wăng sa tuch tăm kloh ueh.

Nam Trang/VOV Tây Nguyên