Oh Siu Thúy, jrôi 6A, Ngih samƀŭt Tiểu học n’hanh Ngih samƀŭt Trung học cơ sở Chư Đăng Ya, xă Biển Hồ n’gor Gia Lai (xă Chư Đăng Ya nkuăl Chư Păh ơm) mhe jêh rơh kiểm tra nti kỳ 1. Thúy an gĭt, 5 năm na nao rnôk tiểu học oh geh săk rnglăy uĕh ngăn, jêng mô mâp jêr jŏt tâm rơh kiểm tra aơ. Ntop ma nĕ, ta ntŭk ntô  bán trú, dơi nai cô dŭt n’hâm ntĭm đă, jêng Thúy lơ nsing knơm, nsrôih nti uĕh:

Nai ta ngih samƀŭt ri dŭt n’hâm n’hanh uănh tât mpôl oh. Mpôl oh mbra nsrôih nti uĕh lơn, gay mô mê̆ bơ̆ rwê n’hanh jêng nai.

Ndrel đah nău n’hao prêh lĕ rngôch đah ndoh ndơ ngih samƀŭt-jrô nti, uĕh blău ntĭm nti ta nkual rnoi mpôl đêt n’gor Gia Lai dơi hao na nê̆. Oh Rmah H’Ý, nti jrô 5B, Ngih samƀŭt Tiểu học-THCS Chư Đăng Ya an gĭt lĕ dơi dơn nău hăn ndrel bah nai cô, ngih samƀŭt tâm rnôk nti. Mô knŭng ntĭm dơh wât, dŭt n’hâm groi, nai cô hôm ƀa ƀơ uănh tât, mĭn joi nău rêh rnăk wâl gay geh ăp nău ntrŭt đă, ntop kơl ngăch. Bah nĕ, kơl oh nti nar lơ blău.

Nai cô dŭt uănh tât mpôl oh, kơl mpôl oh mro. Rnôk ma mpôl oh mâp jêr jŏt ri nai mbra kơl. Knơm nĕ, săk rnglăy nti nsơm bah mpôl oh hao dŭt âk lơn. Ŭch rŏng bah oh mbra jêng Công an.

Tĭng Wa Rmah H’Ngát ta ƀon Xóa, xă Biển Hồ, n’gor Gia Lai, uĕh ntĭm nti ta ƀon mô knŭng dơi hao knơm ăp ngih samƀŭt têh uĕh n’hanh nai cô rŏng nău kan, ŭch kon se. Uĕh nâp dơi hao bah ăp nău uănh kơl bah Đảng, Ngih dak, ntop kơl ăp mpeh prăk nti, prăk gŭ âm, an phe, ndơ dŏng nti... Knơm ăp nău kơl aơ, ăp rnăk wâl dơh oi mbak jâk, kon se dơi geh tât ngih samƀŭt nti nsơm uĕh lơn. Wa Rmah H’Ngát an gĭt:

 Lah uĕh Đảng, Ngih dak lĕ geh âk nău kơl lor an oh kon mpôl hên dơi geh tât ngih samƀŭt, dơi nti uĕh lơn. Oh kon mpôl hên nti ren nar lơ hao âk, mpôl hên dŭt rhơn.

Wa Nguyễn Chiến Thắng, Hiệu trưởng Ngih samƀŭt Tiểu học-THCS Chư Đăng Ya an gĭt, ngih samƀŭt geh 90% kon hŏk lah nuĭh rnoi mpôl đêt, dŭt âk lah nuĭh Jarai. Ăp nău kơl an, ntop kơl bah Ngih dak an lĕ kon hŏk n’hanh nai cô ta nkual 3, lĕ kơl uĕh ntĭm n’hanh nti bah ngih samƀŭt nar lơ dơi hao:

Yor nău uănh kơl bah ăp nău kơl tă bah Đảng, Ngih dak kơt nĕ, bah nău wât bah me bơ̆ an tât kon hŏk ri tât năm bah kơi lah âk lơn năm bah năp. Nuĭh ƀon lan đăp mpăn njuăl oh kon an ngih samƀŭt, lơn lah me bơ̆ geh nău uănh tât, bôl jêr jŏt m’hâm ƀư an oh kon tât ngih samƀŭt tŏng ăp. Ngih samƀŭt nsing nơm, nsan hao kơt aơ, đêt năm tay nău gĭt blău tâm ƀon lan mbra hao âk, mbra uĕh lơn dŭt âk.

Tĭng wa Nguyễn Đăng Quang, Kruanh UBND xă Gào, ntŭk geh n’gul rnoh nuĭh lah rnoi mpôl đêt, lôch dơi bah ăp nău kơl ntĭm nti đah nkual rnoi mpôl đêt tâm âk năm lĕ n’hao nău gĭt blău nuĭh ƀon lan. Tă bah nĕ, nău kơt dŏng khoa học kỹ thuật tâm nkra njêng nar lơ âk, nău rêh bah kônh wa dơi rgâl na nê̆. Lơn lah, rnoh oh kon ăp ƀon lan dơi nti đại học, cao đẳng mô lah hăn nti nău kan nar lơ âk. Bah nĕ, jêng rmôt pah kan geh nti prêh, rhŏ an hun hao wăng sa, rêh jêng ta ntŭk.

Nău uănh tât ntĭm nti bah Đảng, Ngih dak he dŭt di, lơn lah ta nkual jru ngai, Nti nsơm ri nar lơ dơi hao prêh, ăp mon nti đại học dŭt âk. Mpeh đah ƀon lan ri mpôl hên ndâk njêng rmôt cán bộ ta ntŭk, wơt dơn ăp mon nti đại học sĭt gay ma ndâk njêng rmôt cán bộ ndơn tay ta ntŭk.

Ăp nău kơl di lĕ rgâl têh dăng an ntĭm nti nkual rnoi mpôl đêt ta n’gor Gia Lai lah êng, lam dak lah nsum. Kon hŏk dơi geh tât ngih samƀŭt, nai cô đăp mpăn tĭng đah jrô nti, ndoh ndơ nar lơ uĕh. Knơm nĕ, uĕh blău ntĭm n’hanh nti dơi hao na nê̆, nău nti nsơm nuĭh ƀon lan rgâl tĭng năm. Aơ lah n’gâng tơm khlay gay ndâk njêng nuĭh kan ta ntŭk, rgop ntrôl hun hao nâp nâl nkual jru ngai, nkual rnoi mpôl đêt.