Dak Ea Tuôr yan hao hao têh, n’hoch êp jâng lŭ têh mbrĭng. Tâm nâm tơm n’har jŏ ma rhiăng năm, wa Wa Y Wer Ktul, Kruanh ƀon Tuôr, xã Hòa Phú rhơn ngăn yor ƀon lan nơm geh nau rgâl mhe ngăch. Nŭih ƀon lan tâm ƀon ntơm nơh mơng ma nau kan ƀư lŏ, ƀư mir cà phê, tiêu, ma nrôk aơ blau ƀư nau kan pâl n’aih nsum mpôl rnoi Rđe nơm. Đah nau kan ƀư mhe, kônh wa rnôk aơ nkre hun hao văng sa, mât nau vay ơm ƀon lan, gay ma ntrh vhĭng, mprơ tăng mro tâm ƀon lan Tây Nguyên:

‘Bah năp lor dăn lah ueh ma Ngih dak hŏ pơk trong kơl an ân ƀon lan hên. Mpeh nau kan tâm rnglăp xã, gâp ŭch tâm rơh tât gưl xã, gưl n’gor kơl an ntuh kơl nkra trong hăn ân ƀon lan ân nơih ueh, ndrel ndâk ntŭk trong hoch dak tŏ tơm tăm ndrel hun hao pâl n’aih. Pơk trong ân kônh wa pah kan tâm leng Drai Nur, leng Gia Long, gay kơt tĭng nti nau blau ƀư kan pâl n’aih. Ŭch xã lŏ gưl an du gưl tơm prăk hun hao pâl n’aih, gay bu năch tât pala uănh ân bu saơ ƀon lan nơm nar lơn ma hun hao sâm geh lơn”.

Tâm rnôk rnăk wâl Y Wer dôl mô su ma nau ndâk ngih jong, tă geh I u khân păng lơi an gay ma ƀư ntŭk vơt năch tât, ri ƀah ma nê đê̆ nhoat jâng, rnăk yuh H’Belly Êban kŏ pơk nau ƀư Homestay tâm ngih jong bah nơm. Bôk năp, yuh mĭn nau ƀư pâl n’aih jêr ngăn, yơn rnôk ƀư nau kan, yuh saơ ueh ngăn, tâm dăch đŏng:

“Lah ueh Ngih dak pơk trong nơihb ân hên geh vơt năch tâm dak ndrel dak ba dih. Homstay Kathy ŭch nmbơh tâtb dĭng lĕ ăp nŭih, nkoch ma ăp nŭih tă geh ngih jong ri ân mât ân uehm ƀư Homstay nkoch mbơh ân bu năch bu tât uănh, gĭt tât nau ơm ueh bah rnoi Rđe nơm. Gay kon sau nơm gĭt ndrel mât nau ơm yeh bah u che nơm tă bah kăl e lah ngih jong, tanh njuh, lah nau ngơi me deh nơm. Gâp rhơn yor geh vơt năch pâl n’aih tâm homstay Kathy, khân păng ngơi nau Rđe, njoh nah ao bah rnoi nơm đŏng”.

Xã Hoà Phú geh njêng tă bah nau tâm rnglăp 3 xã: Hoà Phú, Hoà Khánh, Hoà Xuân rnoh neh hvi rlau 109km vuông, rnoh nŭih bơi tât 50.000 nŭih, lah ntŭk gŭ âm tă bah jŏ bah ăp ƀon rnoi Rđe, geh dak krong Sêrêpôk drel geh ăp dak jăng têh hoch êp nê, geh nau dơi têh mpeh hun hao pâl n’aih. Jêh rnôk tâm rnglăp, dăp rgum tay rmôt kan hành chính, xã năl nau kan mra nchrăp joi tât ƀon lan, nchrăp tĭngh djăt nau ŭch, nau mĭn, nau đă, nau mbơh bah ƀon lan…ndrel rlau ma nê lah ndrel kônh wa tâm nchră nau kan gay hun hao đah nau dăng, nau dơi geh. Wa Đỗ Xuân Hiếu, Groi Kruanh UBND xã Hòa Phú, mbơh:

‘N’gâng kan rnôk aơ lah n’gâng kan kơl an ƀon lan, rgâl ma nau knŭng kâp nŭih ƀon lan ri n’gâng kan mơ tât ma ƀon lan, ntŭk kan. Nchrăp mât tâm dăch nau ŭch bah ƀon lan, ntŭk kan gay ma nơm ndâk nau kan, ndŏ luh ăp nau nchrăp, bôk nau kan gay ma tŏng dơi nau ŭch bah ƀon lan”.

Ndrel ma hun hao nau kan pâl n’aih, ƀư nau kan êng, tâm năm kan mhe aơ, Đảng bộ xã Hòa Phú kŏ nchrăp nau ntrơn ngăch nau kan văng sa jêng công nghiệp, ndâk nkra, gay ntơm njêng ntŭk ntu ƀư nau kan ueh mhe, nâp nâl. Bah nê, ơm rklaih luh bah nau nsing ngăn tâm nau kan pâl n’aih kơt rnôk aơ, ndrel njêng nau kan tơm nâp gay jêng đô thị công nghiệp tâm năm 2035.

Wa Phạm Tiến Hưng, Bí thư Đảng uỷ xã Hoà Phú, ngor Dak Lak, nkoch, đah nau rƀŏng ndrel ntrong kan mpeh công nghiệp, nau kan tuch tăm prêh mhe, xã Hòa Phú nsôih huch nau nsing tâm tơm prăk bah n’gor, Trung ương, rƀŏng tât nau nchrăp tŏng mpeh tơm prăk, njêng jêng nau dơi hun hao bah n’gor Dak Lak:

“Nau jêr ngăn bah xã Hòa Phú nê lah mhâm ƀư tâm 5 năm tât ntrong dơi mpeh ntŭk ntu, nau rêh bah ƀon lan ân geh nau rgâl mhe ăp ntil, gay ƀư ân rjăp mpẻh nau kan ndâk njêng n’gâng kan 2 gưl bah Trung ương lah nau ueh ndrel ân geh săk tam”.

Ntơm bah du xã tuch tăm, Hòa Phú rnôk aơ dôl ndŏ luh âk nau dơi dăng bôk năp jêng ntrong kan đô thị công nghiệp, ƀư nau kan âk ntil nau vay ơm, lah n’gâng tơm bah nau nsôih dăng kan mpeh ba dâng bah n’gor Dak Lak. Ntrong kan nê ngăn lah hôm âk ngăn nau jêr, yơn đah nau mpŏng hun hao, nsôih nau kan chính trị nâp n’hêl ndrel nau tâm ban bah ƀon lan, Xã Hòa Phú dôl mpoh ang nau rnơm mhe tâm nau pah kan săk tam bah n’gâng kan tâm nkuăl 2 gưl, tâm di, năn ndrel tâm ban ma nau ŭch bah ƀon lan./.