Tĭng Khay Công nhân n’hanh Khay kan mpeh đăp mpăn kloh uĕh ndơ sa, mât kloh uĕh ntŭk luh kan năm 2025, ta Gia Lai dôl geh âk nău kan mât chăm nău rêh an công nhân n’hanh nuĭh kan. Nô Siu Pôp (rnoi Jarai) ta ƀon Anh, xã Ia Bang, nkuâl Chư Prông, n’gor Gia Lai, lah công nhân Nông trường Hòa Bình, Công ty Cao su Chư Prông an gĭt đơn vị geh rlău 260 công nhân lah nuĭh rnoi mpôl đê̆, âk bơi 92% lĕ rngôch rnoh nuĭh kan bah nông trường. Tâm “Khay công nhân” năm 2025, Công ty hŏ ƀư âk nău kan khuh n’gôr, ngăn ngăn gay mât chăm nău rêh an nuĭh kan.

“Ntơm bah rnôk lăp ƀư công nhân cao su, dơi ntop kơl n’hanh ntĭm nti bah kruanh rđău kan, mpôl hên tĭng ƀư di rêng kan n’hanh nsĭt tay nău geh đăp mpăn. Aƀaơ, nău rêh bah công nhân cao su âk rlău; ntơm bah prăk sa, gŭ rêh tâm rnăk wâl dơi rgâl geh. Muh măt ƀon lan aƀaơ rgâl geh, điện mpoh ang geh ăp tŏng. Aƀaơ trong hŏ dơi tuh bê tông, tuh nhựa lĕ. Ntơm nơh ri jêr jŏt ngăn, nhih jay nsuet nkêng, yơn aƀaơ nhih jay hŏ têh uĕh, nău rêh hŏ êng ngăn hôm”.

Dơi gĭt, tâm “Khay công nhân” năm aơ, Liên đoàn Lao động n’gor Gia Lai hŏ an prăk ntop kơl rdâk njêng, nkra 25 mblâm jay "N’hŭt răm Công đoàn" an nuĭh kan geh nău rêh jêr jŏt.