Aơ lah ntŭk bah năp năm 2018 dơi uănh lah “ntŭk duh” mpeh nuĭh tih ma tuý bah nkual Tây Bắc, yơn aƀaơ hŏ jêng me neh nđik uĕh, wăng sa – rêh jêng kon nuĭh hun hao, ƀon lan geh nău rêh hơm răm, đăp mpăn, wăch rgum năch hăn pâl nđaih tâm dak n’hanh dak bah dih.

Ntơh măt kruanh rđău kan Đảng, Ngih dak, njuăl tât ăp đại biểu n’hanh lĕ rngôch ƀon lan ta ntŭk nău ôp khâl, mbah rhơn dŭt uĕh lăng, Tổng Bí thư, Kruanh dak Tô Lâm lah rjăp, rlău 21 năm, Nar rgum lam ƀon lan mât rnă njrăng neh dak hŏ jêng nău kan ăp năm, geh nkô̆ hôr têh khlay, rgop ƀư âk mpưm tay nău mĭn cách mạng, nău way ơm rŏng dak, nuih n’hâm n’hao êng săk rnoi nuĭh, mpư rnê suan dăng nsum mpôl. An lah, tĭng ƀư nău mât rnă njrăng neh dak lah gay njêng ntŭk gŭ rêh uĕh an hun hao wăng sa – rêh jêng kon nuĭh, Tổng Bí thư, Kruanh dak Tô Lâm dăn đă, Bản Loóng Luông, xã Vân Hồ lah êng, n’gor Sơn La lah nsum ân nsrôih rdâk njêng, pơk hvi ăp ntŭk ntĭt leo tâm hun hao wăng sa- rêh jêng kon nuĭh gay ăp nuĭh ƀon lan geh nău rêh uĕh lơn, geh ndrŏng lơn, nău ŭch lah ƀon lan dơi đăp mpăn, geh nău rêh nar lơn ma geh mbơm oi lơn. Nkhêp geh rnôk dja, Tổng Bí thư, Kruanh dak Tô Lâm ndrel ăp kruanh rđău kan Đảng, Ngih dak hŏ ndơ̆ âk nklâm ndơ gưl ủy, n’gâng kan bản Loóng Luông n’hanh xã Vân Hồ; nuĭh geh nsing nơm, bu ranh ƀon, kruanh thôn geh nău dơi ngăch prăl tâm trong leo mât rnă njrăng Neh dak n’hanh nuĭh râng tâm mpôl mât rnă njrăng ntoh lư ta ƀon; ăp rnăk dơi kơl, rnăk geh nău rêh jêr jŏt.