Nô Y Sim Kbuôr, tâm xã Hoà Xuân, nkuăl ƀon têh Buôn Ma Thuột lah nŭih pah kan tâm Công ty Cổ phần Thép ASEAN tâm Khu công nghiệp Hoà Phú ntơm năm 2020. Tâm ntŭk pah kan geh chi bộ Đảng, nô nsôih mô rlu gay geh lăp Đảng ndrel jêng đảng viên tâm khay 9/2024. Nô Y Sim Kbuôr mbơh, aơ lah nau rhơn bah mô êng săk nô nơm ma hôm đah rnăk vâl đŏng:

   ‘Gâp pah kan ta công ty cổ phần tư nhân ma geh lăp Đảng ri rnăk vâl gâp ăp nŭih bu kŏ rhơn ngăn, rhơn ndrel ma ntô̆ n’hao lơn. Lah đảng viên ri nơm ƀư ân ueh nau kan, leo trong lor tâm nau kan”

Ndrel pah kan công nhân ta Công ty Cổ phần Thép ASEAN, đảng viên Y Hoan Ktul hôm geh săch ƀư uỷ viên chi bộ Công ty năm kan 2020-2025. Leo trong tâm ăp nau kan, nô Y Hoan geh chi bộ pă nau ân kơl an du hê nŭih blau gay dơi geh ân lăp Đảng tâm rơh tât:

 ‘Gâp vay nkah đă oh nô tâm rmôt, ngăn lah ăp oh nô rnoi Rđe, ân nsôih chiăr nti, râng ăp nau kan bah công ty, ƀư ân ueh nau kan geh jao, ê nkra tŏng loih gay ma kơl tăch tŏng ndơ. Lah nsôih ân ueh ndrel geh nau ŭch, ri oh nô mra geh dơi lăp Đảng”.

Chi bộ đảng Công ty Cổ phần Thép ASEAN geh ndâk tâm năm 2017, bôk năp geh 5 đảng viên, tât rnôk aơ geh 25 nŭih. Wa Trần Trung Tiến-Bí thư chi bộ mbơh, geh nau kơl an bah rđau kan công ty, nau kan ân lăp đảng mâp nau nơih. Ăp năm êp aơ, ri chi bộ kŏ geh rnglăp 3-4 đảng viên mhe, rlet nau nchrăp luh. Wa Trần Trung Tiến mbơh, chi bộ dôl nsôih hun hao jêng Đảng bộ tâm năm 2026:

 ‘Tâm năm 2025, chi bộ nsôih ân geh ntơm 3-5 đảng viên, tĭng nkô̆ nau bah Đảng uỷ Khối ăp ntŭk kan ndrel ntŭk ƀư nau kan tăch rgâl bah n’gor Dak Lak jao, năl uănh kloh săm ƀŭt kơp dơn ndrel dôl kâp rnơm gay ntơm geh rnglăp tâm 3 khay bôk năm 2025 geh 2 nŭih đŏng”.

 Wa Trần Quang Tân, Groi Bí thư Đảng uỷ Khối ăp ntŭk kan tăch rgâl bah n’gor Dak Lak, mbơh, lam n’gor rnôk aơ geh 11 ntŭk rƀŭn Đảng tâm dâng tâm ntŭk kan bah dih ngih dak ƀư, đah 537 đảng viên. Rơh rlau aơ, nau kan hun hao Đảng tâm ăp ntŭk kan hŏ geh âk nau dơi ueh đŏng, rgop nau kơl an ăp ntŭk kan pah kan ân nâp nâl, kơl an Đảng tâm dăch lơn ma ăp rmôt kan, ăp nŭih ƀư nau kan văng sa. Wa Trần Quang Tân, nkoch:

‘Ăp năm, hên nsôih rnglăp ntơm 16 nŭih đảng viên hao gŏ lơ tâm rmôt ăp ntŭk kan bah dih ngih dak, tâm nê geh ntơm 1-2 nŭih đảng viên lah nŭih mât ntŭk kan. Tât năm 2030, phung hên mra ndâk ntơm 2-3 ntŭk kan Đảng mpeh tâm dâng ndrel 1-2 ntŭk kan êng kơt đoàn druh ndăm, tahen ơm. Đê̆ ngăn 8% ntŭk kan tăch rgâl ƀư êng tâm n’gor mra geh ntŭk kan Đảng ndrel geh đảng viên lah rđau kan ntŭk kan tăch rgâl râng gưl uỷ”.

 Nau kan ân hun hao Đảng tâm rmôt ăp ntŭk kan tăch rgâl êng tâm n’gor Dak Lak geh âk nau dơi ueh, hŏ rgop tâm nau pơk njêng ntŭk ntu pah kan đăp mpăn, săk tam, rgop tâm nau hun hao chính trị, văng sa ndrel rêh jêng bah n’gor Dak Lak lơn ma hao./.