Kêng măng (24/2), ta Nhih pah kan Chính phủ, Groi Thủ tướng Trần Hồng Hà ƀư tơm rơh hop 31 Ban rđău đă gưl neh dak mpeh njrăng n’gang lơh joi tui ka mô tâm di, mô mbơh tĭng di quy định (Ban rđău đă gưl neh dak mpeh IUU). Rơh hop pơk sŏng dăng let năp tay đah ăp n’gor meng dak lêng. Tĭng nău mbơh bah Bộ Nông nghiệp n’hanh Môi trường, Bộ hŏ nchrăp hăn ôp uănh ta 15 n’gor tơm khlay ntơm bah aơ tât 9/3/2026, đah nkô̆ n’hanh trong ƀư na nê̆ tâm ban kơt EC mbra hăn ôp uănh tay ta ăp n’gor.

Nkre, ăp n’gor, nkual  ƀon têh meng dak lêng rgum hăn ôp uănh pah kan njrăng lơh joi tui ka tih IUU ta n’gor, nchrăp pah kan đah Mpôl Thanh tra tâl 5 bah Ủy ban châu Âu. Bộ Nông nghiệp n’hanh Môi trường an gĭt đŏng, ăp tơm ndơ phần mềm rhŏ dŏng an pah kan mât uănh duk mpan lơh joi ka ăp kôp, mbluh rloh. N’glôch jêh rơh hop, Groi Thủ tướng Trần Hồng Hà dăn đă ăp n’gâng kan, ăp n’gor ra uănh tay, kơp uănh tay lĕ rngôch siƀŭt mbơh rblang ăp nkô̆ Ủy ban Châu Âu (EC) uănh khlay. Lah rjăp hôm 2 pơh tay đŏng Mpôl hăn ôp uănh Ủy ban Châu Âu tât hăn ôp uănh, Groi Thủ tướng đă an ƀư tay trong nchrăp rơh ôp uănh nău tĭng ƀư njrăng bah lơh joi tih IUU, nkre tâm pă nău kan na nê̆ an ăp n’gor lam dak, nkre đah nău dơn kan bah ăp n’gâng kan Trung ương.