Mpông đah dak ba dih Lệ Thanh êp trong Quốc lộ 19, ntoi ma ndrâm dak lêng Quy Nhơn (235 km) ndrel ăp n’gor Tây Nguyên, nơih ân nau nchuăn rdeng ndơ. Ntŭk kan văng sa tâm dăch ma n’gor Ratanakiri (Campuchia). Mpông aơ tâm pe dak hun hao Việt Nam-Lào-Campuchia, geh nau dơi jêng ntŭk kan tăch rgâl rloh rlau nkuăl n’har bri.

            Kơp tât lôch khay 8 năm 2025, rnoh tăch ndơ luh dak ba dih bah mpông Lệ Thanh, geh 155 rkeh đola. Tâm nê, tăch luh gehj 63 rkeh đôla ăp ntil ndơ tơm kơt lah loih, phân, ndrôk; nau kan rlet trong, ngăn lah prit, hao 59% rđil rơh aơ năm e. Rnoh ndơ dŏng ndrel năch hăn ro kŏ hao âk. Yơn lah, tĭng ăp ntŭk kan, nau kan tăch rgâl bah mpông aơ kŏ hôm âk nau nkol, jêr, geh: nau ân luh lăp, soay ndơ hôm nkol jêr; prăk dŏng ân ntŭk ân prăp ndơ rnôk aơ kŏ bah dih mpông trong, ƀư jêr ân tăch ndơ tuch tăm. Mpeh ntŭk ntu, 5 ntŭk ân ndơ rnôk aơ kŏ lah ntŭk kan, jêr ân logistic; yan tăch rgâl âk ri mô geh ntŭk. Mông ƀư nau kan mô tâm ban đah mpông trong luh lăp Lệ Thanh (8h măng) ndrel Oyadav (5h30) kêng măng kŏ ƀư nkol ndơ.

            Wa Bùi Nhân Trí-Groi Tổng giám đốc THILOGI (Công ty TNHH nchuăn rdeng ndơ dak ba dih Trường Hải) mbơh nau:

            ‘Geh du nau ƀư kan bol ma jê̆, yơn lah ƀư tta nau kan bah ntŭk pah kan geh mbrơi. Nê lah nau kan mêt uănh ndoh ndơ. Tĭng nau ntrŭnh, săm ƀŭt kơp dơn ndoh ndơ ri Campuchia pă tâm Phnom Penh. Tâm dak nơm ri ân geh săm ƀŭt tơm. Yơn tă bah Phnom Penh tât mpông trong Lệ Thanh ri roh 2 tât 3 nar, tâm rnôk ăp nar kŏ geh nau đă ƀư. Dăn đă ma ntŭk kan mêt uănh ndơn bản scan bah trong điện tử tâm dak lor, pơk trong ân ngăch nơih ân ntŭk kan. Yor hên tăch luh prit, lah kâp 2 tât 3 nar ri mbrơi ngăn”.

            Wa Phạm Anh Tuấn, Groi Bí thư n’gor uỷ, Kruanh UBND n’gor Gia Lai đă: ăp ntŭk kan ân ndal kơp, uănh, rklaih ăp nau đă bah ntŭk kan; nkre ntrŭt dăng nau kan rgâl hành chính, rgâl nuih n’hâm pah kan tĭng nau kơl an. Mpeh jŏ jong ri n’gor mra ƀư nâp tay ta mpông Lệ Thanh ndrel ƀư jêh bôk nau kan hun hao ntŭk kan mpông trong; nkre pah kan ma n’gor Ratanakiri (Campuchia) tâm khay 10 năm 2025 gay doh rklaih nau nkol.

            Kruanh UBND n’gor Gia Lai kŏ kuăl jă ntŭk kan ân nchrăp mĭn ntŭk, pơk trong hăn mhe, ngăn lah nau ê nkra jru tă bah nkuăl tăm tâm dak ndrel Capuchia.  Wa Phạm Anh Tuấn ton n’gâng kan n’gor mra hăn nsum, pơk trong nơih, rƀŏng tât nkô̆ leo nau kan tăch luh ndơ bah mpông Lệ Thanh ntơm 2-3 rmen đôla tâm năm 2030:

            ‘Mpeh ntŭk kan, gâp đă kan nkre, đăng ký nkre. Ntă nŭih ŭch logistic, ntă nŭih ƀư ndơ ê nkra tuch tăm, đă dŭm âk ha, moh ƀư, ntŭk nkuăl tăm? Nuih n’hâm lah ân rgum nkuăl tâm ntŭk aơ ndrel ăp n’gor bah Capuchia, rgum snĭt, nkra jru, jêh nê tăch tĭng trong jâng Quốc lộ 1, tât mpông dak jru Phù Mỹ, ndrâm Quy Nhơn. Đă ăp ntŭk geh nau khlay, mpeh nau nkra, ndơ soay, tơm prăk. Ntŭk kan mra ndrel kan nsum đah n’gor tâm nau rgum, ndâk tay ntŭk văng sa mpông dak ba dih Lệ Thanh tâm rơh tât”.

            Đại hội Đảng bộ n’gor tal bôk năp, năm kan 2025-2030 mra geh ntơm lơ 2 khay 10 tât lơ 4 khay 10, Đảng bộ ndrel ƀon lan Gia Lai nsôih leo Gia Lai jêng n’gor hun hao. Năm kan 2025-2030 geh năl lah rnôk hun hao rjăp đah nkô̆ nau hun hao rlau 10%/năm.

            Wa Hồ Quốc Dũng, Uỷ viên Trung ương Đảng, Bí thư n’gor uỷ Gia Lai mbơh, gay dơi geh nkô̆ nau tâm năm 2025-2030 leo Gia Lai jêng du n’gor hun hao, n’gor năl “5 n’gâng tơm, 4 nau rgâl”, tâm nê geh hun hao logistic mpông dak lêng ndrel ma mpông trong ndrel trong hăn ngăch Quy Nhơn-Pleiku, mpông đah dak ba dih Lệ Thanh, mpông đah dak ba dih Quy Nhơn:

            ‘Tal bôk năp hun hao công nghiệp, ngăn lah công nghiệp ê nkra, nkra nsing tâm nau dăng, nau dơi bah n’gor. Tal bar lah hun hao nau kan pâl n’aih, dŏng nau dơi geh bah nkuăl yôk prêh, nkuăl dak lêng, nau dăng bah ntŭk geh ơm yau, nau ueh ndrel ntŭk ƀư âk nau kan geh dơi gay leo Gia Lai jêng du ntŭk tât ueh bah nkuăl ndrel lam dak. Leo Gia Lai jêng du ntŭk tât ueh tâm nkuăl neh pâl n’aih bah lam dak ndrel nkuăl. Tal pe lah hun hao nau kan Logistic mpông dak lêng đah ntrog hăn ndrel ntrong hăn Quy Nhơn-Pleiky, mpông n’har Lệ Thanh, mpông n’har Quy Nhơn, njêng trong Logisic trong Đông tây gay njêng ngoai tâm ăp n’gâng tơm hun hao bah n’gor”./.