Rơh dak buk mhe rlau ƀư ngâm 34 xã, phường bah n’gor Dak Lak, tâm nê geh nau khuch jâk ngăn lah ăp nkuăl Đông Hoà, Hoà Xuân, Hoà Thịnh, Hoà Mỹ...rnôk dak rhuăt, nŭih ƀon lan ndrel rmôt tahen, công an, rmôt kan bah nkuăl nơm ngăch ntơm leo lăp ƀư ăp nau kan kơt rep dak bŏk, mpuh n’hât kman, rgum ndŏk, ndâk tay nau pah kan, gay ơm đăp mpăn tay nau rêh. Tĭng nau kơp mhe ngăn bah UBND n’gor mbơh, lam n’gor geh 55 nŭih khĭt, 10 nŭih roh, rlau 150 rbăn ngih geh dak băm jru, rlau 120 ngih geh băm jru tâm dak mô lah djơh lĕ; rnoh ăp nau khuch geh rlau 5.500 rmen. Bí thư n’gor uỷ Lương Nguyễn Minh Triết lah rjăp, dak bŭk lĕ tâm ăp nkuăl mpeh ba lơ, N’gor uỷ đă ăp rmôt kan hăn kơl an ƀon lan, tâm rgop ma ƀư nau pă nau kan hăn kơl an bah âk nŭih, nkre ƀư rep kloh ntŭk ntu, ngăn lah ngih săm ƀŭt, ngih dak si gay ơm kơl an ƀon lan nâm ơm./.

Kêng măng 23/11, ta Ndrâm dak lêng Quy Nhơn, âk cán bộ, tahen Hải đội Biên phòng 2 n’hanh Pôih tahen n’har bri mpông n’har dak lêng Quy Nhơn ndăn nchoăn 120 tấn phe yor Ntŭk ntêm nkrem Ngih dak pă ntop kơl nuĭh ƀon lan Gia Lai geh khuch yor dak băm. Ndrel rnôk, ta xă Ngô Mây n’hanh Cát Khánh, 20 cán bộ, tahen Pôih tahen n’har bri Cát Khánh tâm rgop n’gâng kan ƀon lan rdêng, pă 15 bôk ndeh rdêng ndơ dŏng tât ăp thôn Chánh Hữu, Chánh Định, Chánh Hội n’hanh Vân Trim, đăp mpăn ngăch, di nuĭh. Tâm rơh dak băm mhe rlău, âk rbăn cán bộ, tahen ta Quân khu 5, Quân đoàn 34 n’hanh N’gâng kan ntĭm rđău tahen n’gor Gia Lai lĕ rgŏ jă dŭt âk tahen, ndeh rklư tâm rgop đah Công an, n’gâng kan ƀon lan ta ntŭk ƀư wơt kơl hang rhiăng rbăn nuĭh luh nkual phit klach, wơt kơl âk rbăn nuĭh tâm rnôk mih dak lip geh jêr jŏt.

          Măng 23/11, rmôt dân quân xã D’ran, n’gor Lâm Đồng lŏ kơl an ƀon lan ntrơn leo ntŭk gŭ đăp mpăn, nkre nchuăn rdeng lĕ drăp ndơ luh bah nkuăl geh nau khuch rlâm. Bah năp nê, nklăp 3h kêng măng, n’gâng kan xã D’ran saơ klơ yôk Ba Lá Xanh, thôn Lạc Thiện 2 geh ntŭk chah đah jong 300m, hvi 20-50 cm, geh ntŭk băm jri bơi tât du met, njok êp jâng yôk, mkra geh nau khuch rluh neh hô. Ndrel rnôk nê, êp meng trong mpeh 2 đah meng trong ƀon lan gŭ lŏ rluh neh, ƀư âk jêt khối neh lŭ rlâm tâm nkuăl ƀon lan gŭ.

Jêh ndơn nau mbơh nê, n’gâng kan bonh đă âk jêt rnăk ƀon lan rêh tâm êp jâng yôk ntrơn hăn du ndal, pă ntŭk gŭ đăp mpăn. Lam rmôt dân quân, công an, rmôt ƀon lan tâm n’gor rgum nau kơl an hăn ntrơn leo ndoh ndơ, ndơ dŏng gay ma n’huch nau nau khuch khat ndrel đăp mpăn nau rêh ân nŭih ƀon lan./.