Ndơ̆ sau tât nti nar bôk năp ta Ngih samƀŭt Mầm non Sao Mai-ndơ ƀư yor Bình đoàn 15 (N’gâng kan Mât njrăng bri dak) mhe jao an oh kon xă Ea Krêl, bu ranh ƀon Rah Lan Vọng ta ƀol Ngol Le mô dơi mpôn nău răm. Ngih samƀ ŭt mhe kloh uĕh, 5 jrô nti tŏng ăp; ndrel nkual jay sông sa, jrô ntĭm nti thể chất, jâng gung pâl, gara... tŏng ntŭk ntô an 300 kon se pâl rlưn, nti nsơm. Ndrel đah ngih wâl, ngih samƀŭt hôm dơi năp bơi kơt lĕ rngôch ndơ ntĭm nti, ndơ pâl, lah nău ŭch bah kon se ăp ƀon nkual n’har bri. Bu ranh ƀon Rah Lan Vọng an gĭt, aơ mô knŭng lah nău ŭch bah ăp oh jêt ma lĕ n’ăp nuĭh têh, yor dơi đăp mpăn njuăl kon gay đăp mpăn pah kan, rgop mât nâp đăp mpăn nkual n’har bri.

 Ngih samƀŭt dŭt têh, kloh, uĕh, kon sau mpôl hên dơi nti nsơm uĕh, tât lôch tât dŭt, bah kơi aơ têh jêng rhŏ an neh dak. Mpôl hên dŭt rhơn n’hanh nsing nơm tâm Đảng n’hanh Ngih dak, yor lĕ mât uănh, uănh kơl tât ăp mon, dŭt lah uĕh an rgŏ nău ăp mon bah kơi aơ.

Mô knŭng ta Ia Krel, ta 7 xă Ia Mơ, Ia Pŭch, Ia Pnôn, Ia Nan, Ia Dom, Ia Chia n’hanh Ia O, n’gor Gia Lai lĕ ntơm nău nchrăp ƀư Ngih samƀŭt Phổ thông nội trú 2 gưl Tiểu học n’hanh THCS đah têh 212 jrô, dĭng lĕ rnoh  ntuh kơl 1.516 rmen prăk. Tĭng ê nkra, ăp ngih samƀŭt dơi ndâk ƀư rĭng đah tŏng ăp nău dŏng n’hanh ndoh ndơ kỹ thuật, jêng ntŭk ntô nti nsơm đăp mpăn an rlău 7.000 kon hŏk, dŭt âk lah oh kon ƀon lan rnoi mpôl đêt. Oh Rơ Châm Lan Thúy, kon hŏk jrô 8D Ngih samƀŭt THCS Phan Bội Châu (xă Ia Nan) nkoch:

Oh saơ dŭt răm yor bah kơi aơ oh dơi nti nar măng. Ngih samƀŭt hôm geh ăp jrô ntil ăp ntil ndơ, oh dơi răm pâl rlưn n’hanh râng ăp nău rlong ƀư hóa học, vật lý, hôm dơi sa nŭng nar, dơh lơn an mê̆ bơ̆ oh dơh hăn ndơ̆ wơt.

Aƀaơ, Gia Lai geh bơi 200.000 kon hŏk rnoi mpôl đêt dôl tĭng nti ta ăp gưl nti, dŭt âk lah oh kon phung mpôl Jarai, Bahnar, Hrê.... wa Phạm Văn Nam-Giám đốc N’gâng kan Ntĭm nti-an gĭt gay n’hao uĕh ntĭm nti ta nkual rnoi mpôl đêt n’hanh nkual n’har bri, n’gor dôl jêh lĕ rngôch ngih wâl ndoh ndơ ntĭm nti n’hanh ndâk ƀư trong kơl tâm di an rmôt nai, đăp mpăn tŏng ăp nău geh êng ta ntŭk. Ndrel đah nĕ, êp tât, N’gâng kan mbra mbơh an Hội đồng nhân dân n’gor an nău kơl ntop an kon hŏk nkual dŭt jêr jŏt; nkre rgâl trong kơl an gay nai đăp mpăn tĭng jŏ jong đah nkual jru, ngai. Tâm ban đah ăp trong mkra, n’gor dôl mbơh ƀư Bôk nău rgop an tâm nchră n’hao uĕh nâp ngih samƀŭt phổ thông dân tộc nội trú n’hanh ban trú lvang 2025-2030, gay mât uĕh rnoh kon hŏk n’hanh pơk hvi dơi nti nsơm an kon hŏk ach o, êp ach o.

Aơ lah nău ntrŭnh geh trong uĕh têh bah Đảng n’hanh Ngih dak n’hao prêh ƀon lan nti nsơm, ntĭm nti nuĭh pah kan ta ntŭk, ngăn lah nuĭh kan an nkual rnoi mpôl đêt, nkual n’har bri. Tă bah aơ n’hao uĕh nâp trong chính trị ta bah dâng, nâp nâl nău kơl rnoi mpôl đêt, mât uĕh tâm rnglăp, mât nâp đăp mpăn n’hanh tŏng ăp ta nkual n’har bri.

Ăp ngih samƀŭt têh uĕh ta nkual rnoi mpôl đêt n’hanh nkual n’har bri an saơ nău mât uănh ntĭm nti nkual jêr jŏt bah đảng n’hanh ngih dak he. Aơ lah ntŭk nsing nâp kơl kon se rnoi mpôl đêt dơi nti tŏng ăp, rgop ndâk njêng nkual n’har bri nar lơ đăp mpăn, hun hao nâp nâl ta n’gor Gia Lai.