Ta rơh rƀŭn nchră, wa Hồ Quốc Dũng, Bí thư n’gor Ủy Gia Lai an gĭt, lôch geh ƀư tĭng pă dăp tay ntŭk kan hành chính n’hanh rgâl jêng nău kan n’gâng kan 2 gưl, tât aƀaơ, n’gâng kan ta Gia Lai lĕ pah kan đăp mpăn ueh. N’gor lĕ pă an gưl xã 1.065 nău kan. Nuĭh ƀon lan rnôk geh nău ŭch doh rklaih ăp nău kan hành chính kanŭng an tât ta xã, dŭt âk ƀư tĭng nău kan bâh mạng, njêng nău dơh nơih n’hanh mpêt nkrem mông nar. Tâm let năp tay, n’gor mbra geh pă tay nău dơi kan âk lơn an xã. Yơn lah, aƀaơ hôm nha geh du đê̆ nău mô tâm di an geh ngăch ndăn rgâl nkra, ngăn lah mpeh nău blău kan, nău dơi kan bâh du đê̆ nuĭh cán bộ xã. Aƀaơ, mpôl cán bộ gưl xã ta Gia Lai dŭt âk geh 3 rmôt, cán bộ bâh n’gor sĭt, cán bộ bâh nkuăl tât n’hanh cán bộ ta ntŭk. Du đê̆ cán bộ ê hŏ geh nău kan ngăn. N’gor dôl ƀư nti nău kan kơl an cán bộ gưl xã ngăch tâm di đah nău kan mhe.