Nău ƀư nuĭh djôt bôk gưl xă na nê̆ tăch ndơ lŏ mir ndrel ƀon lan lĕ pơk du nău mbơh chính trị ngăch ngar: n’gâng kan ƀon lan mhe mô knŭng “luh nghị quyết”, ma lĕ hăn ndrel đah nău ƀư. Bí thư Đảng ủy xă Ngô Thị Minh Trinh mô prêng dâk bah năp măy quay, ndrel kônh wa nkoch tĭng play sầu riêng, rblang trong nkra njêng n’hanh jao ndơ. Bah meng nĕ lah u 70 năm deh rơh bôk năp djôt micro livestream, ntô̆ n’hao đah nău răm dơi n’gâng kan ƀon lan ntop kơl tăch ndơ. Lĕ nar pơk nău ngơi wăch rgum hang rbăn nuĭh uănh, rhiăng samƀŭt nchăm ndơ, n’hanh nău khlay lơn-du nău mĭn mât uănh mhe dơi djôt dơn. Kruanh HTX Lŏ mir kloh uĕh Krông Pắc-wa Mai Đình Thọ uănh lah prêh trong ƀư aơ:

Du hê bur Bí thư nkre jru hvi, nkre dăch êp, ngăn ngên hăn ndrel ƀon lan kan lŏ mir. Aơ lah nău rgâl nău mĭn dŭt na nê̆, bah ntĭm rđău tât hăn ndrel.

Nuĭh ƀon lan ta Nam Trung Bộ-Tây Nguyên nsing nơm n’gâng kan ƀon lan 2 gưl mhe mô di tă bah du nău kan, ma tăm trong kan, trong rgâl mhe; uănh saơ nău rgâl na nê̆ tâm nău ngăn.

Ta xă Ia Băng n’hanh Mang Yang (n’gor Gia Lai), n’gâng kan ƀon lan gưl xă dơi “Jao nău dơi’ râng jru tâm trong kan trok neh, sŏk neh an nău nchrăp ƀư trong têh Quy Nhơn-Pleiku. Du nău nchrăp ƀư khlay rlău 43.70 rmen prăk, hăn rlău 17 xă, khuch rlău 3.000 rnăk, di lah tĭng gưl n’gor. Yơn rơh aơ, xă nchrăp lor ƀư rƀŭn ƀon lan, djăt nău rgop, tâm rgop đah ntŭk kan mbơh ntĭm gay ntăm n’gâng n’har, kơp uănh tĭt mét neh, tĭng rnăk trơn ntŭk gŭ. Kruanh UBND xă Mang yang-Wa Võ Lê Xuân Thiện-nkoch:

Mpôl hên geh ơm neh ntêm ntŭk gŭ mhe êp trong. Rnôk xă dơi râng jru lơn, nău rgŏ jă kônh wa dơh lơn yor nuĭh ƀon lan djăt xă lơn djăt nuĭh bah ntŭk êng tât.

Nău mĭn “dăch ƀon lan gay ƀon lan djăt, yor ƀon lan gay ƀon lan kơl” dơi saơ tă bah nău n’gâng kan gưl xă lăp mro ntơm bôk năp, nchrăp lor ndrel dôh rklaih jêr jŏt bah nuĭh ƀon lan. Wa Lê Thị Liên, nuĭh ƀon lan thôn 3, xă Ea Bung, n’gor Đắk Lắk an gĭt: du đêt rnăk tâm thôn lĕ tâm pit rbông dak âk năm bah năp, ƀư an geh dak ma âk yan ba hôm e khĭt kro. Yơn rnôk n’gâng kan xă mhe an hăn dŏng, jŭr tât thôn djăt ăp ding, nău tâm pit âk năm lĕ dơi mkra knŭng tâm du nar.

Kruanh xă dŭt n’hâm đŏng, dăch ƀon lan, lah uĕh kruanh xă khân pơng kơl an he, dăp an he gay an he uĕh lăng, aƀaơ nâm ơm hôm, pơk dak nâm ơm hôm.

Tâm rnôk gưl xă ƀư nuih n’hâm dăch ƀon lan, n’gâng kan gưl n’gor ndrel ƀư nuih n’hâm hăn ndrel, na nê̆ nsrôih nsum chính trị tĭng trong hăn têh. Ta Gia Lai, tâm khay bôk năm nglăp nsum dâl n’hanh nău ƀư tĭng ntrong ƀư n’gâng kan ƀon lan 2 gưl xă lĕ ndơ̆ an âk trong nchrŏng mhe: ntrôl ngăch sŏk neh ƀư trong ndeh têh, ndâk ƀư mpông n’har bri Lệ Thanh jêng “mpông n’har bri uĕh mhe, dŏng măng nar tâm pơh” n’hanh đă ƀư bôk nău rgop an tâm nchră hun hao dak bât khlay 17.000 rmen prăk. Bí thư n’gor ủy Gia Lai, Hồ Quốc Dũng mĭn lah:

An ndăn dăn đă trong ƀư uĕh ngăn gay mbơh ƀư ngăch nkual tŏ. Cán bộ mât uănh nău ƀư lŏ mir an ơm ndơ̆ an dăn đă na nê̆ mpeh nău aơ. Bôk năp mĭn kơp an saơ, lah ntuh kơl ta nkual Gia Lai (ơm) đăp mpăn geh nkual tŏ têh, dĭng lĕ prăk ntuh kơl dơi hao tât nklăp 17.000 rmen prăk yơn an ntĭm luh ntuh kơl tĭng lvang. Rlău ma tơm prăk bah Trung ương, Gia Lai mbra râng tâm pă prăk, nkre dơi mĭn tât trong ƀư jêng du nău nchrăp ƀư mhe gay manh prăk ODA. Lah tâm 5 năm tât, Gia Lai mô dơi mkra nău dak tŏ an ăp nkual dôl mô tŏng, nĕ ngăn ngên geh tih đah kônh wa ƀon lan.

Jêh nglăp nsum đah Dak Nông n’hanh Bình Thuân, Lâm Đồng jêng n’gor hvi têh ngăn lam dak, geh âk ngăn ndơ tâm nkual, yơn hôm e âk nău jêr. Ăp nău nchrăp ƀư têh đah ntung trong, khoáng sản, mâp wăk kol bah âk năm, bơi 100 xă mô tŏng cán bộ way nău kan ta âk ntil nău. Gay mkra, n’gor lĕ đă hang rhiăng cán bộ n’gor jŭr xă, n’hanh rgum lĕ soan dôh rklaih wăk kol ta ăp nău nchrăp ƀư. Wa Lê Trọng Yên, Groi Kruanh UBND n’gor an lah, an janh ƀư, janh dơn trok nău kan.

Tĭng nău ŭch bah nuĭh ntuh kơl, manh prăk gay ƀư nău mkra nău mâp, dăn đă N’gâng kan prăk kaih ƀư tơm n’hanh ntŭk kan geh tât mbơh ntĭm, ndâk ƀư rƀŭn gay tâm nchră na nê̆. Tĭng pháp luật yơn trong ƀư an dơh ngăch, ơm jao an nuĭh ntuh kơl gay khân pơng mbơh ƀư. Kơt nĕ ri mư dôh rklaih jêh, hôm lah mô ƀư tĭng luật ntuh kơl nsum bah lvang 2025-2030 ri dŭt jêr, mô dơi nchrăp lor, mô tâm di nău đă bah nău nchrăp ƀư.

Ntrong ƀư n’gâng kan ƀon lan 2 gưl ta Tây Nguyên dôl tâm lvang “ŭnh rlong lŭ”. Nău mbơh ƀư ăp nău kơl ta lvang aơ mâp mô đêt jêr jŏt. Yơn lah, ăp nău ƀư dŭt n’hâm gay rlet rlău, mbra n’glơi an nău uĕh jŏ jong. N’gâng kan gưl xă dŭt n’hâm tâm ăp nău ƀư ngăn kơl ƀon lan. N’gâng kan gưl 2 n’gor mô rlu joi nău rblang an ăp nău mĭn kơp têh. Nău ntop bah 2 gưl n’gâng kan ƀon lan dơi mât đah nuih n’hâm “mô ƀư tât aƀaơ ma ƀư tât lĕ nău”-dôl geh nuih n’hâm hao jêng an Tây Nguyên tâm lvang mhe.