Xã Đam Rông 4, n’gor Lâm Đồng geh njêng bâh nău nglăp nsum 3 xã:  Dà Tông, Dà Long ( Đam Rong ơm) n’hanh xã Dơng K’Nơh bâh nkuăl Lạc Dương ơm, ntŭk kan hành chính công geh an ta xã Dà Tông ơm. Xã geh rlău 90% rnoh nuĭh lah ƀon lan rnoi đê̆, kơt Bunong, K’Ho, Mạ..wa Dà Cắt Tư rnoi Bu Nong – nuĭh geh nău knơm bâh ta ntŭk ngơi. “ƀư tĭng nău kan n’gâng kan 2 gưl gay ma dăch ƀon lan lơn, kơl an ƀon lan ueh lơn. Rnôk geh leo ƀư nău kan n’gâng kan 2 gưl rĭ ƀon lan mbra geh dơn âk lơn nău kan, kơt mô sŏk prăk nti an oh kon se, mât chăm săk soan an ƀon lan, ngăn lah nuĭh âk năm deh kơt hên geh mât kơl ueh lơn. Mpôl hên way geh knơm n’hanh mĭn ŭch kơt nĕ.

Xă Bảo Thuận n’gor Lâm Đồng ndâk njêng tĭng ntŭk kan nglăp nsum 3 xă Đinh Lạc, Bảo Thuận n’hanh Tân Nghĩa, geh rnoh nuĭh bơi 30 rbăn nuĭh, bơi n’gul ƀon lan rnoi mpôl đêt K’Ho, Raglai, Mạ... Jêh 2 khay mbơh ƀư ntrong kan n’gâng kan 2 gưl, nău ƀư bah n’gâng kan xă djôt dơn ăp săk rnglăy uĕh. Nău kơt dŏng công nghệ thông tin an ƀĭt joet, mât uănh nsĭt tay săk rnglăy rhŏ an nuĭh ƀon lan. Bu ranh ƀon K’Brệp ta thôn Kala Kròt, xă Bảo Thuận, n’gor Lâm Đồng nkoch: "Nău nglăp nsum n’gâng kan 2 gưl, gưl n’gor n’hanh gưl xă lah ngoăy tâm âk nău kơl an lor bah Ngih dak gay ndâk njêng n’hanh hun hao ƀon tơm ƀon lan nar lơ uĕh lơn. Ƀon lan nar lơ hun hao lơn, ndrŏng têh lơn, uĕh lăng lơn. Kônh wa nsing nơm n’hanh nău nglăp nsum n’gâng kan ƀon lan 2 gưl bah Ngih dak kơl ƀon lan nơm rgâl uĕh lơn.

Ta xã gôl yôk Kon Chiêng,n’gor Gia Lai, nău n’huch n’gâng kan hành chính lĕ kơl ntrôl dăng săk rnglăy mât uănh, nkre lah nta nău dơh nơih gay ma rơh cán bộ mom n’hao nău dơi. Wa Rưm, tă ƀư kruanh UBMTTQ xã Kon Chiêng an lah, nău kan n’gâng kan 2 gưl mô dơn kơl n’huch rnoh mbrô nău kan, ma hôm nha ntrôl nău nchrăp cán bộ mom geh nău blău kan ta n’gâng kan, njêng nău rgâl mhe săk rnglăy pah kan. “Gâp knơm an lah rơh mom geh nău gĭt blău âk lơn, geh ntĭm nti âk lơn, nti tât Đaị học mbra geh pah kan ueh. Bâh nău ngăn, gâp saơ khân păng lĕ mpơl nău dơi kan, nău gĭt vât bâh nơm, dŏng công nghệ, máy tính an tâm di blău âk nău mhe…jêng lah gâp knơm rơh mom mbra kơl an ueh lơn an ƀon lan, ntop rdâk njêng neh dak ăp nar lơ ma hun hao lơn”.

N’hêl na nê̆ an saơ, nău rgâl ntrong ƀư n’gâng kan ƀon lan 2 gưl lĕ rgop nâp nâl nău nsing nơm bah nuĭh ƀon lan, n’hao săk nglăy ƀĭt joet, ăp samƀŭt hành chính dơi mkra ngăch, kloh rah wah lơn, tŏng uĕh nău ŭch bah nuĭh ƀon lan. Nô U ưm, nuĭh Bahnar, 28 năm ta ƀon Chrơng, xă H’ra, n’gor Gia Lai an gĭt: "Aƀaơ dơi tâm pă tŏng cán bộ ntĭm ƀư samƀŭt jêng dŭt ngăch, kônh wa tât ƀư samƀŭt ngăch đêt, mô hôm mbrơi kơt bah năp tay. Săk gâp bah xă H’ra ơm hăn ta aơ ƀư samƀŭt an rnăk wâl, mhe tât lĕ dơi ntĭm na nê̆ bah sŏk mrô, tât ăp samƀŭt ŭch ntop tay, ƀư dŭt ngăch, di nar ton, mô ƀư jêr jŏt, ƀư r’ai...

 Xã Phú Thiện, n’gor Gia Lai geh njêng bâh nău nglăp nsum nkuăl têh Phú Thiện n’hanh ăp xã Ia Sol, Ia Piar n’hanh Ia Yeng. Aơ lah nkual neh geh nău dơi mpeh hun hao tơm ba, tao n’hanh mât rong sur ndrôk. Wa Nay Keng, kruanh thôn Plơi Rbai,xã Phú Thiên an gĭt.“Bâh ntơm nar nglăp nsum ăp xã n’hanh n’gâng kan rgâl kan 2 gưl, nău doh rklaih ăp nău kan hành chính lĕ ngăch, dơh lơn. Nău ngăn, bâh ntơm tât ntŭk kan ƀư săm ƀŭt, ƀon lan lĕ geh ntĭm na nê̆, kơl mbơh na nê̆, nău kan geh rhoăt ngăch, mô hôm geh jêr kơt ntơm. Aƀaơ, tâm nău kan bâh n'gâng kan rnoh mbrô, ăp ntil công văn, sƀ bâh ba lơ lĕ geh ndơ̆ rgâl bâh ntŭk Zalo ta ntŭk kan, mô hôm geh nău jêr ƀư săm ƀŭt kơt ntơm, bâh nĕ, ăp rơh rƀŭn nchră bah ir âk đŏng"”

Gĭt saơ đah săk rnglăy bah ntrong ƀư n’gâng kan ƀon lan 2 gưl jêh 2 khay pơk dŏng, wa A Ly-Groi Bí chi bộ, kruanh thôn Pâ Cheng, xă Đăk Pxi, n’gor Quảng Ngãi, rhơn an gĭt, nău ƀư n’gâng kan ƀon lan 2 gưl ngăn ngên tâm di nuih ƀon lan. Nău kan lĕ dơi pă gưl sĭt ƀon lan ƀư, kơt dŏng công an mât uănh, jêng ăp samƀŭt rhăch nău mkra ngăch. "Jêh rnôk nglăp nsum ăp xă, aƀaơ uĕh rhŏ an nuĭh ƀon lan tă bah ăp nău kan ndâk njêng n’hanh n’hao săk rnglăy bah ntŭk rhŏ Hành chính nsum dŭt lah uĕh n’hanh săk rnglăy. Ta aơ, ăp samƀŭt hành chính dơi mkra du mpông, mbơh rah wah, mkra nău kan dŭt ngăch, kơl nuĭh ƀon lan ntêm nkrem mông nar, n’hâm soan an kônh wa dŭt lah rhơn. Nklang xă ta êp jay nta nơih an kônh wa dŭt âk. Rmôt cán bộ đêp rmên, ntĭm dŭt n’hâm, jêng saơ uĕh rnôk nuĭh ƀon lan tât tâm rgâl nău. Nău ntrôl dăng công nghệ thông tin kơl joi, ndơ̆ samƀŭt rhăch nău n’hanh dơi jêh ƀư ngăch, dơh.