Kêng măng ntri (25/11), ta Hà Nội, Học viện Chính trị quốc gia Hồ Chí Minh, Ban Tuyên giáo n’hanh Dân vận Trung ương, Hội đồng lý luận Trung ương, Hội Nhà báo Việt Nam, Tạp chí Cộng sản, Báo Nhân dân n’hanh Radio ƀoh rup Việt Nam kan nsum ƀư Tâm nchră n’glôch jêh 5 năm ƀư Rơh tâm rlong chính luận mpeh mât njrăng jâng nsing nău mĭn bah Đảng (2021-2025). Rlău 5 tơ̆ ƀư, suan ring lam bah rơh tâm rlong dja lơn ma lam hvi, đah rnoh âk nău nchih râng năm bah kơi âk rlău năm bah năp. Rơh tâm rlong bôk năp geh 8.129 nău nchih râng tâm rlong, tât năm aơ hŏ hao đah 541.766 nău nchih.

Lah n’glôch jêh tâm nchră, wa Nguyễn Xuân Thắng, Giám đốc Học viện chính trị quốc gia Hồ Chí Minh, Kruanh Ban rđău đă Rơh tâm rlong chính luận mpeh mât njrăng jâng nsing nău mĭn bah Đảng lah rjăp: Neh dak dôl lăp tâm rơh hun hao mhe đah nuih n’hâm nsan hao mhe, đah nău way ơm rŏng dak, nău nđơr geh hun hao, nuih n’hâm tâm rnglăp, nău mĭn nsrôih ndôr êng, nsing nơm, ƀư êng, nsan êng, n’hao êng săk rnoi nuĭh dơi rdâk tay n’hanh ntik n’hao dăng. Gay tŏng đah nău ŭch geh lăp tâm rơh hun hao mhe đah nuih n’hâm nsan mhe, trong nchrăp siƀŭt Đại hội XIV bah Đảng jao Học viện Chính trị quốc gia Hồ Chí Minh ƀư tơm, kan nsum đah Ban rđău đă 35 Trung ương, Ban Tuyên giáo n’hanh Dân vận Trung ương, Ban rđău đă 35 gưl n’gor rgâl mhe trong nkra, trong ƀư Rơh tâm rlong chính luận mpeh mât njrăng jâng nsing nău mĭn bah Đảng.