Văn phòng Trung ương Đảng mhe an Nău mbơh n’glôn jêh bah Tổng Bí thư Tô Lâm ta nar pah kan đah N’gâng kan Nội vụ mpeh trong ntŭk kan sự nghiệp công lập ƀư tĭng nău kan ntrŭt nsôr pah kan lŏ mir ta ntŭk rnôk pơk dŏng ntrong ƀư n’gâng kan ƀon lan 2 gưl. Tĭng nĕ, Tổng Bí thư đă mât uănh jăp n’hanh wât tŏng ăp mpeh nău tơm, khlay bahy lŏ mir n’hanh nău kan hun hao lŏ mir tâm hun hao wăng sa, rêh jêng, ndâk njêng thôn ƀon mhe, n’hao nău rêh bah Nuĭh ƀon lan tĭng di nuih n’hâm “Lŏ mir lah nău dơh lam dak, lah n’gâng tơm bah jâng wăng sa”; mĭn lah trong kan ntrŭt nsôr pah kan lŏ mir lah nău kan khlay bah n’gâng kan gưl xă.

Mpeh ntrong ƀư , ta gưl n’gor, nkual ƀon têh mât ăp Ntŭk ntrŭt nsôr pah kan lŏ mir, dŭt âk nău kan ntĭm, tâm pă, ntrŭt đă, uănh nđôi n’hanh ntop kơl gưl xă. Mô ƀư ăp Ntŭk ntrŭt nsôr pah kan lŏ mir nkuâl, ăp xă. Gưl xă ndâk njêng ntŭk kan sự nghiệp công lập ƀư tĭng nău rhŏ an nsum dŭt khlay âk nău kan, âk ntil nău. Tĭng nkô̆ nău cán bộ ntrŭt nsôr pah kan lŏ mir ăp gưl aƀaơ hin, mbra pă sĭt ăp xă tŏng ăp đêt ngăn du xă geh 5-6 cán bộ ntrŭt nsôr pah kan lŏ mir, mô n’hao rnoh biên chế cán bộ ntrŭt nsôr pah kan lŏ mir. Nâp nâl tay, n’hao săk rnglăy nău kan bah ăp rmôt ntrŭt nsôr pah kan lŏ mir nsum mpôl, n’hao nkoch trêng mbơh rblău nău mhe, nău blău ơm nkra njêng, ntop kơl, ntĭm ƀon lan tâm rgop hun hao nkra njêng lŏ mir. Ăp ntŭk mbơh ƀư dăp ndâk njêng ntŭk kan sự nghiệp gưl xă jêh bah năp lơ 30/10/2025.