Măng (04/08), ta Nhih pah kan Chính phủ, Thủ tướng Chính phủ Phạm Minh Chính ƀư tơm rơh hop lor bôk năp bah Ban rđău đă gưl neh dak an ƀư Nghị quyết mbrô 68 bah Bộ Chính trị mpeh hun hao wăng sa êng bah dih ngih dak. Lôch 3 khay n’gluh an dŏng Nghị quyết 68, ring tam dŭt kloh lah nău rgâl uĕh, rgâl tâm nău mĭn nău gĭt êng bah lam rêh jêng kon nuĭh, bah trung ương tât tâm dâng, mpôl kan, hiệp hội, nuĭh ƀon lan, mpôl doanh nghiệp, rnăk tăch rgâl. Rlông tât ntơm njêng nău kan hao dăng. Khay 6/2025 năl geh rnoh âk doanh nghiệp njêng mhe tât rlău 24 rbăn doanh nghiệp. Khay 7 lam dak geh rlău 61 rbăn rnăk tăch rgâl njêng mhe, hao âk rlău bar tơ̆ rđĭl đah năm bah năp nơh.

Ta rơh hop, Thủ tướng Phạm Minh Chính lah rjăp, tĭng ƀư jăp ăp rnoh tât kan hŏ n’gluh ta ăp Nghị quyết bah Bộ Chính trị, Quốc hội, Chính phủ n’hanh nău dăn đă bah ăp doanh nghiệp, nê lah n’hao doanh nghiệp bah dih ngih dak jêng suan ntrôl dŭt khlay tâm hun hao wăng sa neh dak. Thủ tướng đă ntrŭt ntrôl nkra ăp kô̆ yơn kol khan gay doanh nghiệp tât đah tơm ndơ mpêt khlay, loih kông, ntĭm nti tơm nuĭh kan, khoa học công nghệ, rgâl mbrô... Rdâk njêng tay trong koh n’hŭch dơh glêh siƀŭt, ntrôl ngăch tâm pă gưl, tâm pă nău dơi kan an ăp n’gor. Thủ tướng đă ăp n’gor kơi ntop, ƀư wat jêh dăp rgum trong nchrăp kan mhe, nkre rgum rdâk njêng rmôt trong ntop kơl doanh nghiệp jê̆ n’hanh dah găp mpeh ndơ dŏng kơt điện, manh neh, prăk nkhôm, prăk rngleh. N’hao âk tơ̆ tâm dâl nău, djăt nău rgop gay rdâk njêng trong tĭng, trong kơl bah ƀon lan, doanh nghiệp, rnăk tăch rgâl.