Phŭt mbrô 13 (Kalmaegi) ntô̆ rlău hŏ lơh khuch khat jru mpeh wăng sa, lơn lah đah ăp rnăk mât tui ka ta nkual dak lêng Sông Cầu, n’gor Dak Lak (thị xã Sông Cầu, n’gor Phú Yên ntơm nơh). Lôch bah phŭt, n’gâng kan ta ntŭk kan nsum đah ăp mpôl an manh tơm prăk n’hanh mpôl kan dơi kan ndăn ngăch ra uănh tay, nchih rgum khuch khat n’hanh an ƀư ăp trong ntop kơl, gay kônh wa ơm đăp mpăn nău rêh.

Ur sai yuh Trương Thị Tuyết Vân, ta Tổ dân phố Từ Nham, phường Sông Cầu, hŏ krêp dêh đah nău mât tui bŭng ư̆r rlău 15 năm aơ ta nkual dak lêng Hòn Mắm. Yuh Vân an gĭt, ntơm bah nar tĭng mât tui, mô hŏ geh trôk nar tât ndal krit nji kơt phŭt mbrô 13 (Kalmaegi) rơh dja. Lĕ rngôk rlău 60 gŭk mât đah rlău 1.500 tui an tăch n’hanh 3.000 tui ntil geh phŭt lơh lĕ, âk gŭk mpun tât aƀaơ nha mô hŏ joi saơ. Rnon rhiăng rkeh prăk manh ngân hàng gay ntuh kơl, tơm prăk nơm geh tâm gŭk tui bơi tăch, aƀaơ hŏ geh klôr rdu tĭng phŭt sial.

“Roh huach âk ngăn, yor gŭk mpun ƀư nsum đah  ăp rnăk, yơn geh klôr rdu lĕ hôm, tâm rnôk nê rnăk dôl rnon ngân hàng 500 rkeh prăk ntuh kơl, bơi tât nar trok rnon. Ur sai hên mpŏng Ngih dak ntop kơl gay mât tay tui bŭng ư̆r, lah mô mât mô gĭt moh ndơ ƀư. Mpôl hên mpŏng ngân hàng ntop kơl njong rnon, n’hŭch deh prăk kon n’hanh lah dơi ri an manh tay tơm prăk gay ntuh kơl mât tay, joi prăk trok rnon.”

Wa Nguyễn Thị Sáu, ta thôn Phú Mỹ, phường Sông Cầu, nha hôm hŏ bah phit nuih n’hâm lôch phŭt djơh đŏng. Rlău 120 gŭk mât tui đah rlău 2.000 tui bŭng ư̆r an tăch bah rnăk wâl, ƀă ma geh klôr rdu, ƀă ma sat lĕ jal ƀư tui klaih luh bah dih, kơt lah roh dơm lĕ. Wa Sáu rngot an gĭt, di lah n’gul khay 11 dja mbra tăch gay trok rnon 1,5 rkeh  prăk manh ngân hàng, yơn phŭt tât ndal hŏ klôr rdu lĕ hôm.

“Roh huach ri mô hŏ gĭt na nê̆, yơn nklăp rnăk hên roh lĕ du n’gul rnoh tui mât. Tui dja rhă 5 - 7 nar đŏng lah tăch hôm trok rnon ngân hàng ri phŭt tât ndal. Tui ri roh nuĭh khĭt ndrel đŏng. Rnăk mpŏng ngân hàng njong rnon, jut jăng deh prăk kon gay plơ̆ ntuh kơl tay, trok rnon mbrơi.”

Meng dak lêng phường Sông Cầu lah nkual mât tui ka dak lêng khlay bah n’gor Phú Yên ơm, aƀaơ mpeh n’gor Dak Lak, đah ăp ntil ndơ kah khlay kơt tui bŭng, ka sĭm n’glang, ka mú. Êng nkual Hòn Mắm, Vũng Chao aƀaơ geh rlău 92.800 gŭk mât tui ka, lơn âk lah tui bŭng ư̆r bah nklăp 720 rnăk ƀon lan.

 Wa Huỳnh Đình Quang, Groi kruanh UBND phường Sông Cầu, nkoch phŭt mbrô 13 (Kalmaegi) ntô̆ rlău dŭt dăng, bol mô lơh khuch khat mpeh nuĭh yơn hŏ an tay roh huach dŭt âk mpeh wăng sa, lơn lah đah ăp rnăk mât tui ka meng dak lêng. Aƀaơ UBND phường dôl ndăn ra uănh tay, nchih rgum khuch khat roh huach n’hanh dăn đă nhih pah kan dơi kan ơm an trong ntop kơl nuĭh ƀon lan. Wa Huỳnh Đình Quang lah:

“Mât tui ka lah nsum n’hanh tui bŭng ư̆r lah êng ri roh huach dŭt âk. Mpôl hên dôl ndăn ngăch ra uănh tay, nchih rgum tĭng mông, tĭng nar gay geh ntŭk nsing pah kan đah ngân hàng, dăn đă khân păng n’gluh trong an njong rnon, ntop kơl tay tơm prăk ntuh kơl an kônh wa. Bah meng nê, mpôl hên hŏ nchih săk na nê̆ gay dăn đă UBND n’gor Dak Lak dŏng tơm prăk ntop kơl bah tơm prăk nkrem Njrăng, n’gang trôk nar lơh gay ntop kơl du gâl roh huach an ƀon lan.”

Gay ntop kơl ăp rnăk mât tui ka, ăp mpôl kan an manh tơm prăk ta phường Sông Cầu hŏ nta trong dơh an rlău 600 năch manh tơm prăk ntuh kơl ƀư njêng, tăch rgâl. Êng Agribank gŭ kan ta Sông Cầu - Phú Yên geh rlău 300 năch manh đah lĕ rngôch rnoh rnon 150 rmen prăk. Wa Hoàng Vũ Phi Phong, Giám đốc ntŭk gŭ kan, an gĭt nhih  pah kan dôl kan nsum đah ăp nhih pah kan dơi kan an ƀư âk trong ntop kơl năch rdâk tay nău kan ƀư njêng. Wa Phong nchŏng kloh du đêt trong kơl mbra dŏng ntop kơl an năch manh mâp rmoh rman phŭt mbrô 13 lơh mhe aơ.

“Đah ăp rnăk mô hôm geh ndơ ma dŏng kan, mpôl hên mbra dŏng trong tĭng ƀư njong rnon tĭng nău way bah Ngân hàng Ngih dak. Ăp rnăk I mô hŏ tât rnoh njong rnon, mpôl hên mbra mĭn uănh an manh tay, mô lah  dăp rgum tay rnon, njong năm trok rnon n’hanh lĕ ma deh prăk kon đŏng, gay năch manh geh mông nar rdâk tay nău kan ƀư njêng tăch rgâl. Bah meng nê, mpôl hên dŏng trong kơl njong rnon n’hŭch deh prăk kon an manh gay kônh wa n’hŭch đêt prăk dŏng ntuh kơl mât tay tui ka.”

Nău an ƀư năn ngăch ăp trong kơl an manh tĭng quy định kơt njong rnon, ntoch rnon, n’hŭch deh prăk kon an manh hŏ ntop tay suan nđơr gay an kônh wa nkual geh phŭt sial lơh nsan hao. Nău du nuih n’hâm ndrel hăn bah n’gâng kan ta ntŭk n’hanh mpôl an manh tơm prăk mô dơn kơl nuĭh ƀon lan dâk tay lôch roh huach trôk nar lơh, ma hôm njêng suan ntrôl gay khân păng ntuh kơl tay, rdâk tay nău kan mât rong. Tĭng gŭk mât tui ka mbrơi dơi rdâk tay, nsĭt nkre nău mpŏng mpeh du khay dak lêng mhe đăp mpăn lơn, hơm răm lơn./.