Tâm khuh n’gôr rhơn Tết Trung thu, ăp nar dja âk mpôl kan, nsum mpôl ta Dak Lak hŏ nsrôih rgŏ jă tơm ndơ gay ƀư nău  kan pâl rlưn, pă nklâm ndơ an hang rbăn kon se ach o, kon se quet nte tâm n’gor, kơl ăp kon se năl dơi lĕ rngôch nău rhơn tâm măng bŏng khay.

Nar kêng dŭt pơh, ta jâng gung nhih nti Trường mầm non Bình Minh, xã Ea Na, n’gor Dak Lak khuh n’gôr nău nteh gơm ngơi. Ăp kon se nđơr dơi uănh njroh mprơ, sa trung thu n’hanh dơn nklâm ndơ. Mon H’Jun Hie Ksơr, 5 năm deh, kon se nti lớp Lá, nkoch:

“Nar aơ gâp dŭt rhơn yor geh ăp kônh yơ phăt bánh kẹo an mpôl hên. Mpôl hên lah uĕh ăp kônh, ăp yơ”

Bôk nău kan ƀư trung thu đah nkô̆ “Khuh n’gôr nău nteh gơm ngơi – tâm pă nău tâm rŏng” tă bah jrô nti Trung cấp lý luận chính trị A55A, Nhih nti Chính trị n’gor Dak Lak ƀư, hŏ kơl an 210 nklâm ndơ an kon se ta nhih nti. Wa Nguyễn Thị Lệ Nga, Hiệu trưởng Nhih nti mầm non Bình Minh an gĭt:

“Kon se nti ta aơ lah nuĭh rnoi mpôl đê̆ da dê, lơn âk lah kon bah nuĭh ji phŭng sa. Ăp mon său geh nău rêh rnăk wâl jêr jŏt, ăp nklâm ndơ dja lah tơm ndơ kơl an nuih n’hâm rhơn dŭt têh đah nai ntĭm kon se nti bah nhih nti”.

Ndrel rnôk dja, ta buôn Tuôr B, xã Ea Na, nău kan Trung thu an kon se tă bah Thanh tra n’gor Dak Lak kan nsum ƀư hŏ ndơ̆ kơl 75 nklâm ndơ an kon se jê̆ n’hanh rnăk wâl ach o.

Mô dơn ta xã Ea Na, âk ƀon lan ta Dak Lak ăp nar dja khuh n’gôr nău nteh goh gâr múa lân, lơp chreng lồng đèn đŏng. Ta xã Ea Mdroh, 300 nklâm ndơ hŏ dơi ndơ̆ tât kon se buôn căn cứ ma bôk nău kan Lồng đèn mpoh ang nău wơl. Hôm ta buôn Cư Kŏ Êmông, Đoàn druh ndăm xã Dang Kang kan nsum ndrel đah ăp câu lạc bộ kơl êng ƀư múa lân, gâm bún riêu, kreh sŏk n’hanh an kho ao, ndơ dŏng nti, nklâm ndơ trung thu an bơi 700 kon se jê̆ bah 2 buôn Cư Păm n’hanh Cư Kõ Êmông. 40 nklâm ndơ dŏng sa khlay dơi njuăl tât ăp rnăk ach o đŏng.

Nău rhơn Trung thu hôm tât đah ăp kon se ta Ntŭk rgum ntop kơl lam rêh jêng kon nuĭh n’hanh kon se n’gor Dak Lak ma bôk nău kan măng bŏng khay tă bah Sở Y tế n’gor ƀư đŏng. Ăp kon se dơi râng tâm rlong ƀư lồng đèn, njroh mprơ, sa n’hang n’hanh dơn nklâm ndơ, học bổng đŏng. Wa Nguyễn Xuân Quý, Giám đốc Trung tâm, an gĭt:

“Năm aơ Sở Y tế ƀư du bôk nău kan ta Ntŭk rgum ntop kơl lam rêh jêng kon nuĭh n’gor Dak Lak n’hanh du ntŭk rgum pêt mât ƀon lan njêng êng, đah âk nău kan kơt tâm rlong ƀư đèn lồng, njroh mprơ, sa ndơ trung thu. Bôk nău kan dơi geh du đêt nuĭh lŏng nuih n’hâm hăn ndrel, pă nklâm ndơ, học bổng an kon se klaih rlău ach o nti blău đŏng. Bah nê ŭch rŏng mbra rêng lam tât lĕ rngôch ăp kon se ndrel klaih rlău ach o nsan hao, jêng kon mbleh nti blău, său prăl Wa Hồ n’hanh lah nuĭh uĕh an nău rêh”.

Tâm nău nteh gâr lân khuh n’gôr, nău nteh gơm ngơi rhơn mƀak nkre đah nău ntroh n’gôr ăp nău kan, nău rhơn mpơl kloh bah lơ muh măt ăp kon se jê̆. Oh Nguyễn Thị Minh Châu nkoch:

“Nchrăp trung thu ri mpôl hên hŏ nti njroh mprơ, ƀư lồng đèn, nti múa lân. Gâp dŭt ŭch lah dơi uănh múa lân, dơi ăp nuĭh pă nklâm ndơ. Djăt ma tât măng trung thu ri gâp dơn geh âk nău uănh khlay bah ăp Mpôl hăn kơl êng, ăp nuĭh tơm kơl n’hanh bah ăp kruanh rđău kan, kơl an gâp ăp nklâm ndơ bol jê̆ yơn đah gâp ri hôm geh nkô̆ hôr dŭt khlay”.

Oh Nguyễn Ngọc Hân rhơn nkoch:

“Ăp năm ri ta aơ ăp kônh wa yơ way hôm ƀư trung thu an mpôl hên đŏng, geh âk bánh kẹo, sa ndơ n’hanh wơt ŭnh đèn. Mpôl hên hŏ krơ̆ an ăp rnăk du ndơ weh ƀư n’hanh ƀư êng lồng đèn gay mbơh rblang nkô̆ hôr. Mpôl hên hŏ nti njroh mprơ, nău njroh mprơ bah  ăp yuh nô têh lah Jă nô sĭt Tây Bắc, hôm nău mprơ bah ăp kon de jê̆ lah Trung Thu jŭr nkual ƀon têh”.

Ăp nklâm ndơ, nău  pâl rlưn ndrel yuh Hằng n’hanh kônh Cuội hŏ kơl kon se jê̆ jêr jŏt, geh nău rêh jêr jŏt mha êng ta Đắk Lắk năl dơi mông nar tâm rŏng n’hanh tâm pă. Mô dơn nsĭt tât nău rhơn, ăp bôk nău kan hôm kơl tay nău nsrôih gay ăp kon se rlău dơi jêr jŏt, jăp gơih, nti blău.