Nkhêp di nkah gĭt 80 năm Cách mạng khay 8 lôch uĕh n’hanh Quốc khánh, lơ 19/8, ta 34 n’gor, nkual ƀon têh ta lam dak ƀư sa nkra, ntơm ƀư 250 nău nchrăp ƀư, ndơ ƀư khlay. Aơ lah ăp nău nchrăp ƀư mpeh tâm ăp ntil nău ntung trong, dak si, ntĭm nti, công viên-di tích n’hanh ăp ndơ ƀư nsum mpôl khlay.

Ăp ndơ ƀư dơi ntơm ƀư n’hanh sa nkra mô knŭng n’hao uĕh nău rêh an nuĭh ƀon lan ma hôm rgop jêh ntung trong kỹ thuật, nta an wăch rgum ntuh kơl n’hanh hun hao nâp nâl an nkual tâm ăp năm tât. Nău ƀư khlay dơi ƀư ta Ntŭk rgum mpla nsơ tăch ndơ Ngih dak (xă Đồng Anh, Hà Nội), nkre boăt nthoi na nê̆ đah 79 ntŭk ƀoh rup ta âk nău nchrăp ƀư, ndơ ƀư ta lam dak, Tổng Bí thư Tô Lâm n’hanh Thủ tướng chính phủ Phạm Minh Chính lĕ an Huân chương Lao động hạng Nhất, 3 an ăp rmôt lĕ geh âk nău rgop an hun hao wăng sa-rêh jêng bah Thủ đô n’hanh neh dak.

Ta nkual Tây Nguyên-Nam Trung Bộ rơh aơ geh 14 ndơ ntơm rdâk ƀư n’hanh sa nkra, tâm nĕ n’gor Gia Lai geh 3 ndơ ƀư, Đắk Lắk 3 ndơ ƀư, Khánh Hòa 4 ndơ ƀư, Lâm Đồng 4 ndơ ƀư.