Aơ lah du nău kan dŭt khlăy mpeh chính trị, rêh jêng n’hanh tâm kơl na nê̆ mpơl nău rŏng “Lam dak mpŏng đah n’har bri, yor nău rêh oh kon ƀon lan ăp mpôl rnoi”. Thủ tướng Chính phủ Phạm Minh Chính râng rơh ntơm ƀư ta ntŭk tâm mâp: ngih nti nôị trú 2 gưl Tiêủ học n’hanh THCS xã Yên Khương, Thanh Hoá. Lah na nê̆ Đảng, Ngih dak he way geh uănh khlăy nău ntĭm nti lah nău kan bôk năp, đah nău kan dŭt khlăy ngăn, njêng nău ntrŭnh mât nău dơi, Thủ tướng an git, n’gâng kan Chính trị lĕ dơn ngoăy n’hanh rgum leo kan ntĭm đă nău ntrŭnh ntuh kơl rdâk njêng ăp ngih nti phổ thông nội trú 2 gưl tiêủ học n’hanh trung học cơ sở ta 248 xã n’har bri neh kơh. Gay ma mât đăp mpăn ndơ̆ ăp ngih nti mhe lăp pah kan ngăn ngên kơl an năm nti mhe 2026-2027, Thủ tướng đă n’gâng kan ntĭm n’hanh nti, nuĭh leo kan ăp ntŭk an geh ƀa ƀơ hăn tât ntŭk kan, ngăch doh rklaih ăp nău jêr jŏt, kŏ văk, kơl an ăp nuĭh ntuh kơl têh, ntŭk kan nsum, mbơh tơih uănh năl geh nău dơi pah kan ueh, ƀư tĭng nău kan rdâk njêng ngih nti đah nău nsrôih, nău mĭn kan ueh, lĕ rngôch kơl an kon hoc, yor nău hun hao bâh ƀon lan ăp mpôl rnoi n’har bri têh khlăy bâh neh dak.

Ta Dak Lak, Groi Thủ tướng Chính phủ Mai Văn Chính lĕ râng ntơm ndâk ƀư Ngih samƀŭt PT Nội trú 2 gưl Tiểu học n’hanh Trung học cơ sở ta xă n’har bri Ia Rvê, n’gor Dak Lak. Ta nar ƀư, Groi Thủ tướng Mai Văn Chính lĕ đă ntơm ndâk ƀư ngih samƀŭt n’hanh an ndơ an kon hŏk n’hanh nai, ntrŭt đă nsrôih rlet rlău jêr jŏt, mât rwê ntĭm uĕh-nti uĕh. Ndrel đah ndơ ƀư ta Ia Rvê, tâm rơh aơ n’gor Dak Lak hôm ntơm ƀư 2 ngih samƀŭt nội trú 2 gưl êng lah: Ngih samƀŭt phổ thông 2 gưl nội trú xă Ia Lốp geh rnoh prăk ntuh kơl 105 rmen prăk, Ngih samƀŭt phổ thông 2 gưl xă Buôn Đôn dơi ntuh kơl rlău 158 rmen prăk. Ăp ngih samƀŭt têh bah 900 tât rlău 1.000 kon hŏk.

Ta  Lâm Đồng, Groi Thủ tướng Chính phủ Hồ Đức Phớc râng rơh ntơm ƀư Ngih nti Phổ thông nội trú 2 gưl  tiêủ học n’hanh Trung học cơ sở Thuận An. Ngih nti mhe têh kloh ueh mbra lah ntŭk nti, mât rong rlău 1 rbăn oh kon rnoi đê̆ ta xã n’har bri Thuận An, n’gor Lâm Đồng geh rdâk ƀư ta rnoh neh hvi 5ha, lĕ rnoh prăk ntuh ƀư rlău 225 rmen prăk. Ntoh ngơi ta rơh ntơm ƀư, Groi Thủ tướng Chính phủ Hồ Đức Phớc lah na nê, Đảng, ngih dak way uănh ntĭm nti lah nău kan bâh ngih dak bôk năp, ngăn lah ta ăp nkual dŭt jêr jŏt rĭ lơ ma mât uănh. Groi Thủ tướng đă n’gâng kan ntĭm n’hanh nti ndrel đah n’gor Lâm Đồng n’hanh ăp ntŭk kan geh tât an geh mât uănh leo kan, ntĭm đă, mât njrăng uănh nđôi mhâm ƀư an ngih nti geh rdâk ƀư tâm di, ueh n’hanh ăp nău geh tât ngăn lah nuĭh kan, rnoh prăk gay ma dơi geh dŏng kan săk rnglăy, nâp nâl tât rhiăng năm.