Aƀaơ, ntung trong nkual miền Trung – Tây Nguyên tĭng kơn dơi ntuh kơl, lơn lah ăp njăr trong cao tốc Bắc – Nam n’hanh ăp trong nthoi Đông – Tây đah Tây Nguyên đah duyên hải. Âk ntŭk nchrăp ƀư trong dơi an ƀư kơt Quy Nhơn – Pleiku, Khánh Hòa – Buôn Ma Thuột, Gia Nghĩa – Chơn Thành… dơi mpŏng pơk tay ntŭk hun hao, rhuăt glêh mông hăn n’hanh nta trong dơh an pâl nđaih, logistics, tăch rgâl.

Yơn lah, tĭng ăp đại biểu, ntuh kơl ntung trong mô dơn n’glĕ ta nău nthoi ăp trong ndeh. Nău khlay lơn lah ân jêng buăt nthoi ăp kôp đah ăp nkual ƀon têh, ndrâm dak lêng, tach ndeh păr, mpông n’har bri, ntŭk rgum logistics n’hanh ăp ntŭk tât pâl nđaih. Wa Nguyễn Trùng Khánh, Cục trưởng Cục pâl nđaih gưl neh dak Việt Nam an lah, ntung trong lah ndơ geh lor bôk năp gay mât dŏng rnoh khlay pâl nđaih:

“Gâp mĭn lah nkô̆ nău khlay lor bôk năp ân nkra ƀư ntung trong, lah mô geh buăt nthoi ntung trong ri ăp ntŭk tât pâl nđaih bol geh âk mpưm, uĕh reh yơn mô dơi nsĭt geh rnoh khlay, mô dơi hun hao di rnoh. Nkoch mpeh ndơ dŏng mô dơi lah ntung trong lah nsum ma hôm lĕ ma ndơ dŏng ta ăp nkual pâl nđaih ri mơ njêng luh rnoh khlay gay năch rlong uănh saơ, n’hao săk uĕh ntŭk tât, n’hao nău dơi tâm rlong bah ntŭk tât”.

Ta tâm nchră, ăp nhih pah kan mât uănh, n’gor n’hanh doanh nghiệp hŏ ndrel tâm ôp mpeh trong n’guăk ntuh kơl, rgum tơm ndơ lam nuĭh, hun hao logistics, n’hao têh ntung trong ndơ dŏng ta ăp nkual, ntŭk pâl nđaih n’hanh n’hao dăng kan nsum đah ăp ntŭk. Ntŭk nsum dơi tâm ban ŭch lah ân rgâl bah nău mĭn hun hao pâl nđaih tĭng n’har neh jêng hun hao tĭng ntŭk têh hvi n’hanh ndru wăr.

Đah Gia Lai, lôch rnôk n’glăp nsum dak lêng n’hanh bri neh têh hvi, n’gor geh ndơ jêng rêng ndơ geh ƀư tĭng njăr trong “dak lêng – bri dâng – dor yôk – bri neh têh hvi”. Groi Kruanh UBND n’gor Gia Lai Nguyễn Thị Thanh Lịch an lah, ntuh kơl ntung trong ntêng lêng nkual nkre lah mâng ntrôl an lĕ ma miền Trung-Tây Nguyên hun hao let năp tay, nkre n’glêh an tât hun hao 2 mbrô bah ăp n’gor tâm let năp tay:

“Rnôk pơk hvi ntŭk mhe tâm nê geh ndơ dŏng pâl nđaih mô dơn Gia Lai hun hao 2 mbrô ma ăp n’gor jêng ndrel tâm kơl mpeh nău hun hao nsum”.