Bah lơ 1/3, Ban Rnâng kan Ủy ban MTTQ Việt Nam n’gor Đắk Lắk ƀư ăp rƀŭn nchră mâp nuĭh ƀon lan đah ăp nuĭh săch đại biểu Quốc hội khóa 16 n’hanh đại biểu HĐND ăp gưl năm kan 2026-2031. Ta ăp rƀŭn nchră, ăp nuĭh săch nkoch bôk nău kan đah nuih n’hâm lĕ đah nău kan, rgum tâm ăp nău nuĭh ƀon lan uănh tât kơt hun hao nâp nâl hăn ndrel đah wăng sa kloh uĕh; mât uănh, dŏng săk rnglăy neh ntu; ntuh kơl ntung trong, điện, dak ta ƀon lan; n’hao uĕh ntĭm nti, mât uănh săk soan ƀon lan; ntrôl dăng rgâl hành chính, rgâl mrô. Âk nuĭh dơi săch mĭn lah mbra mât rjăp đah ƀon lan, ƀa ƀơ djăt n’hanh lah ngăn nău ŭch mpŏng bah nuĭh ƀon lan. Ăp rƀŭn nchră ƀư ƀon lan ƀư tơm, sŏng dăng, wăch rgum âk nuĭh ƀon lan râng. Âk nuĭh ƀon lan uănh lah prêh nchrăp rjăp, uĕh lăng bah ăp nuĭh dơi săch.

Wa Võ Tấn Bằng, cán bộ rlu ranh ta phường Sông Cầu uănh lah dăp hao nuĭh dơi săch rơh aơ dŭt tâm di, geh nău tâm rgop đah ăp nuĭh âk nău blău n’hanh rơh cán bộ mom dơi ntĭm nti uĕh.

Mpeh dăp năm deh, nuĭh dơi săch âk năm ngăn lah 53 năm, nuĭh mom ngăn 43 năm. Tâm 5 nuĭh dơi săch ta ntŭk geh 3 nuĭh geh học hàm, học vị tiến sĩ, ƀư tĭng nău nti way kan n’hanh nău blău pah kan âk. Mpeh bôk nău ƀư đah trong nchrŏng dŭt na nê̆ an năm kan 5 năm tât. Nkô̆ nău rgum tâm nău rƀŏng hun hao wăng sa-rêh jêng nâp nâl, rgum jêt tâm ƀah đah nkual dơh n’hanh nkual jêr jŏt, uănh tât âk lơn tât nău rêh bah nuĭh ƀon lan.

Ndrel đah nău djăt, âk nuĭh ƀon lan nchih nkô̆ nău bôk nău kan bah tĭng nuĭh dơi săch gay geh nkô̆ nău uănh lah di lor rnôk săch. Wa Phạm Thị Hạnh, ta xă Ea Khăl, n’gor Đắk Lắk an gĭt:

Mpŏng ŭch jêh săch, ăp đại biểu tĭng đah ƀon lan, djăt nău ŭch mpŏng bah nuĭh ƀon lan, djôt nău dơi geh tât đah ƀon lan, n’hanh lơn lah uănh kơl tât ƀon lan ntŭk ma he săch.

N’gor Đắk Lắk geh 2.118 rmôt săch ta 2.119 nkual nklăch phiếu mpeh tâm 102 xă, phường. Nău nchrăp rjăp bah ăp nuĭh dơi săch ndrel nuih n’hâm ƀon lan ƀư tơm, lĕ đah nău kan bah nuĭh ƀon lan dôl jêng n’gŭr răm ta năp nar rgum têh, nsing nơm n’hanh mpŏng kâp tâm ăp đại biểu tŏng ăp nuih n’hâm, rgop ndâk njêng Đắk Lắk hun hao nâp nâl tâm năm kan mhe./.