Nchrăp ƀư trong loih ngăch or ta njăr trong me Bắc – Nam lah njăr trong khlay gưl neh dak, geh nkô̆ hôr khlay mha êng đah hun hao wăng sa- rêh jêng kon nuĭh neh dak. Ta n’gor Gia Lai, njăr trong hăn rlău geh rnoh jong nklăp 116km, geh đă ntrơn du tât rbăn rnăk ƀon lan. Tâm rơh aƀaơ, pah kan trok tâm, đă ntrơn du dôl n’gâng kan ta ntŭk an ƀư lĕ n’hâm suan, ngăch ngăr. Ntŭk dŭt njrăng uănh khlay lah nuĭh ƀon lan ta ntŭk tâm ban ŭch âk, kơl đă ntrơn du rong neh ƀư ngăch.

Năl geh ta phường Bồng Sơn, n’gor Gia Lai – ngoăy tâm ăp ntŭk an ƀư dŭt ơm ăp nkual ntrơn du ntŭk gŭ mhe rong neh nchrăp ƀư trong loih ngăch or Bắc – Nam, an saơ nău lăp kan ăp kôp bah n’gâng kan n’hanh nău ngrŏ tĭng uĕh bah nuĭh ƀon lan. lôch geh nkoch trêng, rgŏ jă mpeh trong nchrăp sŏk mplơ̆ neh, âk rnăk ƀon lan ta nkual ƀon lan gŭ rgum Thiết Đính Nam hŏ lor nchrăp kan nsum, mbra jao neh. Rnăk wa Trần Thị Thu lah ngoăy tâm ăp rnăk ơm jao an rlău 1.000m² neh ba n’hanh rhơn dơn prăk trok tâm.

“Aƀaơ Ngih dak sŏk mplơ̆ neh gay ƀư trong ri nsĭt geh an ƀon lan he, he ŭch, he tâm ban nuih n’hâm, lĕ dĭng nuĭh rhơn da dê”.

Nău tâm ban du nuih n’hâm nê mô rngơ̆ ma geh êng, ma tât bah trong ƀư ăp tŏng rêng, dăch ngăn ngăn bah n’gâng kan ta ntŭk. Ntơm bah nău hop ƀon lan, nkoch trêng, rblang trong kơl….lĕ rngôch dơi an ƀư ăp kôp, kloh rvah da dê. Wa Lê Văn Phúc, Kruanh nkual ƀon lan gŭ rgum Thiết Đính Nam, phường Bồng Sơn an gĭt, rnôk nuĭh ƀon lan wât kloh trong nchrăp ri nău an ƀư jêng dơh lơn dŭt âk:

“Phường dŭt uănh khlay, nkual ƀon lan gŭ rgum ri ƀư nkoch trêng, nchrăp lor lôch nê hop leo ƀư. Kônh wa ri tâm ban ŭch âk tâm trong ntrơn du tât ntŭk gŭ mhe rhŏ dŏng an ntŭk nchrăp ƀư trong loih Bắc – Nam. Lĕ rngôch ăp rnăk ƀon lan geh tâm săk đă ntrơn du ri hŏ dơn geh prăk ăp tŏng, uănh nsum lah ƀon lan dŭt tâm ban nău”.

Nuih n’hâm tâm ban ŭch rêng lam ta phường Hoài Nhơn Bắc – ntŭk geh hang rhiăng rnăk ƀon lan geh tât khuch bah trong nchrăp kan đŏng. Rnăk nô Nguyễn Văn Phán, nkual phố Hy Văn hŏ ndơ̆ jao an 2 blah lŏ đah rnoh hvi 1.500m², tâm ban ŭch âk đah trong nchrăp bah Ngih dak:

“Rnăk mpôl hên tâm ban kơt kônh wa ta nkual phố Hy Văn dja đŏng tâm ban ŭch đah trong nchrăp gay đă ntrơn du, dăp rgum nkual dja. Yor ta aơ kônh wa dŭt rhơn yor trong nchrăp hun hao wăng sa- rêh jêng kon nuĭh bah n’gor jêng kônh wa dŭt tâm ban nău ŭch.”

Gay geh dơi nău tâm ban ŭch nê, ăp gưl n’gâng kan n’gor Gia Lai hŏ lor nchrăp an ƀư âk trong nkra ăp kôp, ntơm bah dăp rgum tơm neh an ntŭk ntrơn du mhe tât nchih kơp, trok tâm n’hanh ntop kơl nuĭh ƀon lan. Wa Trần Minh Lâm – Groi Kruanh UBND phường Hoài Nhơn Bắc an gĭt, pah kan nkoch trêng dơi ntrŏng lah rgum tơm rloh rlău an tât rnôk wat jêh pah kan trok tâm, đă ntrơn du rong neh.

“Mpôl hên nkoch trêng tay an nuĭh ƀon lan kloh mpeh ntŭk ƀư tơm khlay bah neh dak gay njêng nău tâm ban ŭch âk bah nuĭh ƀon lan dơn tay n’gâng n’har đah ăp trong me tơm bah trong loih or ngăch. Rgum tơm lah nkoch trêng gay nuĭh ƀon lan tâm ban ŭch n’grŏ tĭng gay pah kan trok tâm đă ntrơn du dơi dơh soih n’hanh ơm jao neh an trong nchrăp gay tĭng ƀư.”

Ta lam n’gor Gia Lai, nchrăp ƀư trong loih or ngăch njăr Bắc – Nam hăn rlău 18 xã, phường, khuch tât bơi 4.000 rnăk ƀon lan, đah lĕ rngôch prăk dŏng đă ntrơn du lah bơi 6.800 rmen prăk. Tât aƀaơ, n’gor Gia Lai hŏ wat jêh dăp rgum 38 nkual ntŭk gŭ mhe, tŏng ăp ntŭk gŭ an ăp rnăk geh tât khuch. Tĭng wa Nguyễn Tự Công Hoàng, Groi Kruanh UBND n’gor Gia Lai, gay đăp mpăn rnoh ngăch nsum, n’gor mât rơh hop mbro gay uănh năl rnoh ngăch, nkre lor nchrăp tơm ndơ, ngăch trok tâm an nuĭh ƀon lan.

“Tâm let năp tay ăp n’gâng kan ta ntŭk ân ƀư lĕ n’hâm suan n’hanh ndăn ngăch lơn đŏng. Ntrŏng gĭt ntŭk I đă ntrơn du lor gay geh neh soih an nuĭh tơm ƀư. ăp n’gâng kan tâm dâng mô kâp ôp uănh lĕ 100% mơ dĭng ndơ̆ rnoh khlay ma kơp nđăp ntŭk tât lah nkrêp rnoh khlay tât ntŭk nê dĭl, trok tâm tât ntŭk nê n’hanh ndơ̆ jao neh ma ƀon lan hŏ lôch jêh dơn prăk trok tâm.”

Đah nău lăp kan ăp kôp bah lam trong kan chính trị n’hanh lơn lah nău tâm ban ŭch bah ƀon lan, pah kan đă ntrơn du nchrăp ƀư trong loih or ngăch Bắc – Nam ta Gia Lai dôl geh ăp nău dơi uĕh. Aơ mbra lah jâng ntơm khlay gay ntŭk nchrăp ƀư tơm khlay gưl neh dak ơm an ƀư, njêng suan ntrôl hun hao mhe an nkual Tây Nguyên n’hanh lam dak./.