Nar 2/9 lah nkah ndray nar roh bah Kruanh Hồ Chí Minh đŏng- Wa hŏ rđău đă Đảng he, ƀon lan he, neh dak he rlău mô gĭt dah âk jêr jŏt, geh ăp nău dơi têh kuâng tâm rơh rlăch ndăng rklaih luh rnoi nuĭh, mât njrăng neh dak n’hanh rdâk njêng neh dak. Lĕ ma bu ranh, kon se, ŭch kơt nti n’hanh ƀư êng tĭng nău Wa, nsum suan du nuih n’hâm rdâk njêng ƀon tơm neh dak nar lơn ma têh uĕh, geh ndrŏng lơn.

Mbah rhơn nkah ndray 80 năm nar Quốc khánh 2/9, ta ƀon Chưp, xã Lơ Pang, n’gor Gia Lai, kônh wa Ba Na ndrel yông cờ neh dak, ƀư âk  nău kan geh nkô̆ khlay mpơl nău rŏng ƀon tơm, neh dak. Aơ lah rnôk gay nuĭh ƀon lan uănh tay du njăr trong rgŭt n’gĭng bah lịch sử rnoi nuĭh n’hanh rƀŏng tât nău rêh let năp tay chrat ang lơn. Wa Đinh Brơi, 67 năm deh, 44 năm Đảng, lah bu ranh ƀon Chưp, xã Lơ Pang, n’gor Gia Lai n’hao êng săk, lah:

“Nar 2-9, nar Quốc khánh, lĕ rngôch nuĭh ƀon lan ta Tây Nguyên rlai lăp nsum tâm nău rhơn nar đăp mpăn đah lam dak. Rnôk hôm jê̆, săk gâp nơm hŏ năl dơi nar khlay mha êng dja, jêng dâk têh ndăm hŏ nsrôih kơt tĭng Anh hùng Núp rnôk lơh Prăng lah mô dơi an bu tŭn jot, mô dơi chuh chŭn, mô ƀư dĭk an phŭng rlăng. Jêng hŏ râng ƀư tahen, rgop suan rnôk neh dak ŭch geh, tâm rnglăp du nuih n’hâm tĭng Đảng, Ngih dak, nơm geh kơt nê tât năm 1975 mơ rklaih luh neh dak. Hôm aƀaơ wăng sa, rêh jêng nar lơn ma hun hao n’hanh lơn ma saơ n’hao êng săk lơn mpeh neh dak Việt Nam he.”

Bu ranh ƀon K’Keo, rnoi K’ho, bơi tât 70 năm, Bí thư chi bộ thôn Hàng Làng, xã Di Linh, n’gor Lâm Đồng mbơh, kơt tĭng ndrel ƀư tĭng nau Wa Hồ, lĕ 16 đảng viên tâm chi bộ mro leo trong hăn lor tâm ăp nau kan, Kơt săk bu ranh, bol ma lĕ ranh yơn hôm nsôih kơt tĭng nti ăp nau kan khoa tâm nau kan tăm cà phê, ba dak...leo geh săk rnglay ueh. Nkre mât nau ơm yau rnoi nơm, bonh đă ƀon lan ndâk njêng nau rêh mhe. Bu ranh K’Keo mbơh:

   ‘Dĭng lĕ ăp đảng viên tâm chi bộ kŏ ƀư kloh nau kan ndrle nau dơi bah đảng viên, mro hăn leo trong leo ăp nau kan hun hao văng sa, ƀư tĭng ueh ăp nau ntrŭnh, ntrong kan pháp luật bah Đảng, Ngih dak; mât nau tâm rnglăp lam ƀon lan, tâm nê geh âk đảng viên mom. Aơ lah ăp nŭih leo trong ang tâm nau ntĭm nti ndrel kơt tĭng nau ueh bah Wa Hồ gay ân ƀon lan kơt tĭng, leo nau nê ƀư mâng veh. Ŭch chi bộ dăng ri rmôt đảng viên ân geh du nuih n’hâm mĭn kan, leo trong tâm ăp nau kan ri mơ ƀư jêh nau kan geh jao ăp năm”.

 Ndrel nău mĭn n’hanh nău kan mpeh nău bu ranh ƀon ntĭt leo an rơh druh ndăm kơt tĭng wa Liêng Hót Ha Kliêng (rnoi K’Ho) nuĭh nsing nơm ta thôn Srê Đăng, xã Tân Hội, n’gor Lâm Đồng, nkoch:  

Kơt nti Wa nê lah nuih n’hâm rŏng dak, tĭng jăp trong nchrăp gung trong bah Đảng, Ngih dak. Bar lah kônh wa ƀon lan he ân mât chăm wăng sa, nkah kon său, lơn lah druh ndăm lơi tĭng tih leh, tih pháp luật, ân der ngai ma túy, mô thơ tha ndrănh djăr. Ân tâm rnglăp, mô ntŭng rmuănh, mô rkhul roh đăp mpăn roh nău tâm rnglăp đah ăp rnoi nuĭh oh nô, nê lah ăp ntil nău ma bu kuâng kơt nti Wa n’hanh ân ntĭt leo lor nău kan uĕh tâm ƀon lan.

Lah nŭih geh nau blau ngăn mhe geh n’gâng kan xã Đăk Tô, n’gor Quảng Ngãi rnê bah năp lơ 2/9, wa Y Xuân, rnoi Xơ đăng, Bí thư nkre Kruanh thôn Kon Hring, rhơn nkoch:

   ‘Gâp mro bonh đă kônh wa ƀon lan ndâk njêng ƀon lan mhe, rgâl nau mĭn, ngih vâl ân geh n’gâng n’gar ân kloh, trong hăn ƀon lan ân tăm nkao ân ueh ân ƀon lan. Gâp bonh đă ƀon lan rgâl nau mĭn, nau kan, jăng lơi ăp nau ƀư văng sa rluk mâl ơm bah năp nơh, ntrơn rgâl tơm tăm ân tâm di ma neh ntu gay n’hao nau geh âk rnăk vâl. Tâm rhôn rnôk aơ rgâl âk ngăn, ngăn lah rơh mom nsôih ngă, gơih pah kan jan sa, tâm rlong ƀư nau văng sa, âk rnăk geh dơi rvăt ndeh hon-đa, ndeh công nông, kĭn cà phê...kơt lah ăp ngih kŏ năp tŏng dnơ kơl an nau kan ƀư mir ba”.

Kơt nti n’hanh ƀư tĭng nuih n’hâm uĕh lŏng, trong gŭ rêh Hồ Chí Minh, bu ur n’hanh druh ndăm xã Čuôr Dăng, n’gor Đắk Lắk hŏ n’hanh dôl rêng lam nuih n’hâm tâm yô̆, tâm kơl nsum mpôl ƀon lan. Druh ndăm H’Xani Niê, rnoi Rđe, lah Groi kruanh Hội liên hiệp bu ur xã Čuor Dăng, an gĭt:

“Hội bu ur n’hanh mpôl druh ndăm ta xã Čuôr Dăng way du nuih n’hâm nsum  suan, way djăt nău ntĭm nti bah Wa Hồ ma trong kuăl jă ăp nuĭh ndrel geh trong nchrăp kơl ƀon lan; ntĭt kơt nsrôih ntop kơl rnăk ach o, ôp khâl ăp rnăk dơi kơl….Mpôl druh ndăm xã n’hanh hội bu ur ndrel kan nsum gay ndrel mât nău kan way ơm bah rnoi nuĭh kơt cheh tanh bok brai, nti mpât mprơ eirei, nti tŭr chĭng goh gong.”

Nô Luy (rnoi Jrai) Bí thư Đoàn xã Ia Băng, n’gor Gia Lai ri ŭch ngăn nau ngơi bah Wa Hồ “Moh nau geh dơi ân ƀon lan ri nơm ân nsôih ƀư, moh nau kan khuch ân ƀon lan di nsôih n’hâm der”. Nô mbơh ăp nau kan bah ndruh ndăm tâm ƀon:

  ‘Nau kan bah phung hên lah ntrŭt dăng nau nkoch trêng gay druh ndăm ndrel kônh wa gĭt, ntơm bah nê rêh ueh, rêh tâm di ma nau ntĭm nti bah Wa Hồ gay druh ndăm ndrel kônh wa gĭt rbăng. Đoàn xã hŏ nsôih râng nau kơl an ƀon lan ƀư săm ƀŭt định danh mrô 2 ndrel rnglăp dŏmng VneID. Bah nê kơl an ƀư ăp nau kan hành chính jêng ngăch lơn, nơih lơn đŏng. Đoàn druh ndăm xã Ia Băng hŏ tâm rgop ndrel ma tahen Quân đoàn 3 ƀư nau rep kloh ntŭk ntu, muih vaih ên kloh ueh, n’hong hoch ueh ndrel kơl an nkra trong hăn tât lŏ, kơl an kônh wa hăn nơih lơn, tuch tăm kŏ nơih lơn đŏng”.

Năm aơ 35 năm deh, yơn nô A Định hŏ geh 10 năm ƀư Bí thư chi bộ nkre ƀư kruanh thôn Đăk Pung, xã Ngọc Tụ, n’gor Quảng Ngãi. Kơt nti n’hanh ƀư tĭng nuih n’hâm uĕh lŏng Hồ Chí Minh, nô hŏ hun hao wăng sa rnăk wâl bah tăm tơm cà phê, cao su, mât sŭr, mât djăr, mât ka; n’hanh rgŏ jă ntĭm nti nuĭh ƀon lan ƀư tĭng. Nău ngăch prăl bah nô hŏ kơl kônh wa Xơ đăng ta nkual jru ngai mbrơi mbrơi ntrôl rŭch ji ngot ach o rluk mâl, tĭng kơn rdâk njêng nău rêh mhe. Nô rhơn n’hao dơi Thủ tướng Chính phủ ntăm an bằng khen. A Định an gĭt:

‘Ăp ntil nău I jêr ri he ân ƀư lor, he ân ntĭt leo lor tĭng nău lah bah Kruanh Hồ Chí Minh ‘’Đảng viên hăn dâk leo lor, ƀon lan kơt tĭng bah kơi’’, tâm nê he ân ntĭm nti kônh wa trong wăng sa, n’hao geh tơm ndơ wăng sa... Kơt aƀaơ nchrăp tât khay kăch rek, gâp ndrel kônh wa luh hăn nkra uĕh trong hăn tâm ƀon lan rsong hăn nchuăn rdeng ndơ tuch tăm dơh ngăch’’.

Nô Y’Săn, tâm ƀon Dak Mâm, xã Dak Săk, n’gor Lâm Đồng mbơh, rmôt druh ndăm tâm ƀon vay ƀư nau rƀŭn rgum, bonh đă ndrel ƀư ăp nau kan kơl an druh ndăm rêh ân ueh ma rnăk vâl, ƀon lan. Ngăn lah ntoh n’hao nuih n’hâm ƀư tĭng nau rêh bah Wa Hồ, gay nau rêh nar lơn ma ueh. Nô Y’Săn, rhơn nkoch:

 ‘Tâm rnăk vâl ri gâp uănh khlay tâm nau kơl an hun hao văng sa, ƀư tĭng ăp nau mhe tâm nau mât chăm cà phê, ƀư lŏ, kơl an ăp druh ndăm geh nau rêh jêrjŏt bah ƀon gay ma ndrel hun hao. Rnôk aơ nau rêh mrô hôm, săk gâp ân nsôih kơt tĭng ăp nau kan tât mhe, nau ueh mhe ngăn gay ma năn tĭng ăp nau ntrơn rgâl mhe nê”./.