Tâm ăp năm rlău aơ, wăng sa- rêh jêng kon nuĭh ta nkual rnoi mpôl đê̆ ta n’gor Bà Rịa- Vũng Tàu nar lơn ma hun hao. Dơi geh nău nê lah nơm geh nău mât uănh khlay bah ăp gưl ủy Đảng, n’gâng kan ndrel nău nsrôih nsan hao jêr jŏt bah ƀon lan, tâm nê geh nău rgop suan bah ăp nuĭh geh nsing nơm. Khân păng mô dơn lah laih ti nthoi jong bah n’gâng kan ma hôm lah ntŭk nsing bah ƀon lan rnoi mpôl đê̆.

Ta nkual ƀon lan rnoi Châu Ro ta ấp Tân Thuận, xã Long Tân, nkuâl Long Đất, lĕ dĭng nuĭh gĭt wa Nguyễn Thị Xuân (wa Bảy Xuân)- Kruanh Ban mât bôk kan ấp n’hanh lah nuĭh geh nsing nơm, krêp dêh đah ƀon lan Châu Ro da dê. Wa Bảy Xuân nkoch, păng deh luh n’hanh têh jêng ta nkual Tân Thuận jêng ntơm bah jê̆ hŏ saơ dơi nău krit jêr bah ƀon lan. Rnôk druh têh, păng mpŏng rgop rgâl nău rêh an nuĭh ƀon lan, lơn lah druh ndăm, wa Xuân hŏ râng nău kan Đoàn, lôch nê dơi sơch ƀư Bí thư Đoàn ấp Tân Thuận. Lôch nê, păng rgâl jêng pah kan bu ur, mặt trận, mât bôk ấp n’hanh năm 2022 păng jêng Kruanh Ban mât bôk ấp n’hanh lah nuĭh geh nsing nơm tâm ƀon lan. Đah lĕ nuih n’hâm đah nău kan, nău gĭt blău n’hanh nău tâm gĭt wât bah he, wa Bảy Xuân ndrel n’gâng kan xã n’gluh âk trong ntĭt leo hun hao wăng sa - rêh jêng kon nuĭh tât đah ƀon lan rnoi mpôl đê̆ Châu Ro, rgŏ jă nuĭh ƀon lan rgâl nău gĭt êng, rvê pah kan jan sa, ntlơi jăng nău way rluk mâl ơm...:

Tă bah kônh wa gĭt blău hôm đêt jêng nău gĭt êng dŭt jêr jŏt. Kăl e nơh kop ji mô ŭch hăn tât bác sĩ, dơn joi tât bu hŭm proh, tĭng nău đing dơm, tât ăp năm 2017-2018 nha hôm geh ăp ntil nău mô hôm tâm di. Yơn lah, ntơm bah năm 2021 tât aƀaơ ri kônh wa ƀon lan tĭng ƀư trong nchrăp dŭt uĕh, ntlơi jăng ăp nău rluk mâl ơm. Aƀaơ deh nse, kop ji lah hăn tât nhih dak si, ntlơi jăng lĕ nău way rluk mâl ơm).

Mô dơi mbơh năn ngăch ăp trong nchrăp bah Đảng, trong kơl bah Ngih dak, nuĭh geh nsing nơm hôm rgâl nău way bên tuch tăm, dŏng rgâl mhe khoa học kỹ thuật tâm nău kan mir ba đŏng. Nô Đào Văn Tâm, 50 năm deh, ta thôn Lồ Ồ, xã Đá Bạc, nkuâl Châu Đức an gĭt, ntơm nơh kônh wa nkual neh Lồ Ồ dơn tăm ba 1 tơ̆ tâm năm dơm. Gay n’hao săk geh, kah uĕh ndơ tuch tăm, n’gâng kan ta ntŭk n’hanh nuĭh nsing nơm tâm ƀon lan rnoi mpôl đê̆ hŏ ntrŭt nsôr kônh wa nănh ntuh kơl máy rgâl an ndrôk, rpu, n’hoch dak lăp tâm lŏ sre gay tăm 2 tơ̆. Nơm geh kơt nê ma kônh wa ƀon lan rnoi mpôl đê̆ n’hao nău geh wăng sa, rgâl kloh:

Năm 2000 kônh wa ƀon lan ta aơ dơn ƀư lŏ du tơ̆ tăm du năm dơm, mô tŏng sa, jêh aơ nơh nănh manh prăk ngih dak rvăt máy rpăt ba, máy cày dŏng gay năn ban năm khay tuch tăm. He ƀư saơ ngăch yach ntĭm nti kônh wa ƀư tĭng he đŏng, tât rnôk dja kônh wa hŏ gĭt tăm 2 tơ̆ ba hŏ 25 năm aơ hôm.

Bà Rịa-Vũng Tàu aƀaơ geh 46 nuĭh nsing nơm tâm nkual ƀon lan rnoi mpôl đê̆. N’gor geh bơi 3% rnoh nuĭh lah ƀon lan rnoi mpôl đê̆ ( 31.722 nuĭh). Tĭng ăp n’gor geh âk ƀon lan rnoi mpôl đê̆ gŭ rêh, nuĭh nsing nơm hŏ râng nsrôih uĕh n’hanh geh nău rgop tâm nău an ƀư ăp bôk nău kan, đề án, trong kơl bah n’gor Bà Rịa – Vũng Tàu, lơn lah ăp bôk  nău  kan ntop kơl hun hao wăng sa- rêh jêng kon nuĭh, n’hŭch ach o, rdâk njêng ntŭk ntô ndơ dŏng. Wa Đào Thị Dương, 63 năm deh, nuĭh geh nsing nơm tâm ƀon lan rnoi mpôl đê̆ Châu Ro ta thôn Lồ Ồ, xã Đá Bạc, nkuâl Châu Đức an gĭt, rnôk ngih dak an ƀư pơk hvi trong bah trị trấn Ngãi Giao lăp tâm xã Đá Bạc, trong hăn rlău thôn Lồ Ồ n’hanh rnăk păng lah rnăk lor bôk năp rong neh ƀư trong. Saơ păng leo lor, âk rnăk tâm ƀon lan Châu Ro tâm nkual rong êng neh sre tơm tăm gay an neh ƀư trong. Wa Dương an gĭt, geh trong mhe lâng uĕh, kônh wa ta aơ dŭt rhơn, rgum hun hao wăng sa rnăk wâl, mô hôm kâp nơm, nsing gư tay tâm ngih dak:

Tâm nkual geh âk nuĭh mô ŭch rong neh ƀư trong, jêng gâp n’hanh âk kônh wa ta aơ rgŏ jă khân păng n’hanh jêng kơt nê mơ ƀư trong dja. Lôch geh trong, kônh wa dơi kơl an ndơ mât, dơi manh tơm prăk ntuh kơl tuch tăm, wăng sa n’hanh rdâk njêng jay an kônh wa. Aƀaơ nău rêh bah kônh wa rgâl mhe dŭt âk, mô hôm kâp nơm n’hanh nsing gư tay tâm ngih dak ma wăng sa đăt êng, jêng tât muh măt bah Lồ Ồ hŏ rgâl. 

Wa Đỗ Chí Khởi, Groi kruanh UBND nkuâl Châu Đức an gĭt, nuĭh nsing nơm hŏ ntik n’hao nău khlay kan ma nău ngơi, nău kan bah he, jêng ntung njŏ khlay kơl nđơn trêng tay trong nchrăp, gung trong bah Đảng, trong kơl, pháp luật bah Ngih dak tât đah ƀon lan năn ngăch n’hanh geh nău tam:

Ndrel rdâk njêng n’gâng kan đŏng, aƀaơ ƀon  lan rnoi mpôl đê̆ râng tâm pah kan mât bôk kan đŏng. Lơn lah, ta ăp nhih nti hŏ geh ăp hiệu trưởng lah nuĭh rnoi mpôl đê̆ Châu Ro, mpeh pah kan xã hội ri khân păng râng tâm ăp Trung tâm văn hoá. Ta gưl nkuâl ri nuĭh rnoi mpôl đê̆ geh cán bộ chính sách, rnôk geh khân păng râng ri ăp trong kơl dơi an ƀư uĕh tât nuĭh ƀon lan.

He mbra dơi lah, âk năm aơ nuĭh geh nsing nơm tâm ƀon lan rnoi mpôl đê̆ ta Bà Rịa - Vũng Tàu lah du ndơ khlay tâm nău hun hao bah ƀon lan rnoi mpôl đê̆ ta ntŭk. Nău ntik n’hao nău khlay kan bah khân păng mbra rgop tâm nău tĭng ƀư ăp rnoh tât kan hun hao wăng sa- rêh jêng kon nuĭh, n’hao nău rêh drăp ndơ, nuih n’hâm an ƀon lan rnoi mpôl đê̆ n’hanh mât ndray săk tơm văn hóa ƀon lan rnoi mpôl đê̆.