Tĭng dăp rgum trong ndeh lvang năm 2021 - 2030, uănh ngai tât năm 2050, trong cao tốc Quảng Ngãi- Kon Tum jong 136 km, hvi 4 mbor ndeh, ƀư ntuh kơl bah năp năm 2030. Aƀaơ n’gâng kan 2 n’gor Kon Tum n’hanh Quảng Ngãi hŏ rgum hop n’hanh tâm ban ŭch dăn Bộ Xây dựng xây ƀư njăr trong cao tốc đah lĕ rngôch tơm prăk ntuh kơl bơi 35.400 rmen prăk, mpeh rmôt trong nchrăp tơm khlay gưl neh dak.

Tĭng nău dăn đă, cao tốc Quảng Ngãi- Kon Tum hăn rlău 5 nkuâl lah thị xã Đức Phổ, nkuâl Ba Tơ (jong 58km n’gor Quảng Ngãi) n’hanh 3 nkuâl lah Kon Plông, Kon Rẫy n’hanh nkual ƀon têh Kon Tum (jong 78km mpeh n’gor Kon Tum). Trong Cao tốc nchrăp geh 4 mbor ndeh, rnoh ngăch weh ƀư ntơm bah 80 -100 km/h. Ta njăr trong geh 9 bôk chruh, đăp mpăn mbluh đah ăp n’glah trong me, ntŭk rgum wăng sa, văn hóa, chính trị dơh soih. Rlău ma nê, trong cao tốc nchrăp ƀư 60 ntung rhot bah lơ, 10 ntung rkăng n’hanh 3 trong rŭp bah nâm.

Ntơm bah dăn đă bah 2 n’gor, mhe aơ, Bộ Xây dựng hŏ geh nău n’glêh an jao Ban Mât uănh trong nchrăp 85 rmôt njêng siƀŭt mbơh gŭ mĭn an ƀư geh nău dơi nchrăp ƀư trong cao tốc Quảng Ngãi - Kon Tum. Ban mât uănh trong nchrăp 85 lor pah kan đah ăp nhih pah kan, đơn vị geh tât gay dơn lĕ rngôch ăp nău lôch jêh gŭ mĭn hŏ tĭng ƀư gay gŭ mĭn tay, nchih siƀŭt mbơh gay dăn trong nchrăp ntuh kơl, der bah tâm trŭp, mpŭng lir.

Wa Đàm Phúc Tuyên – Groi Giám đốc Sở Xây dựng n’gor Kon Tum, an gĭt: trong cao tốc Quảng Ngãi- Kon Tum, êng gâl đă ntrơn du nchrăp lĕ rngôch rnoh prăk dŏng lah rlău 1.200 rmen prăk. Bar n’gor ton mbra tâm rlak tŏng prăk dŏng ƀư gay ƀư lôch jêh đă ntrơn du, jao neh an ƀư trong tâm năm 2026. Mpeh n’gor Kon Tum nchrăp nklăp 650 rmen prăk an nău đă ntrơn du. Rhuăt luh nău tă ơm gĭt kan bah ăp trong nchrăp êng ƀa ƀă, n’gor hŏ năl gĭt lor ăp nău jêr jŏt gay geh trong nchrăp tĭng ƀư pah kan đă ntrơn du rong neh ƀư trong.

Wa Đàm Phúc Tuyên an gĭt: Nău rdâk njêng trong cao tốc Quảng Ngãi - Kon Tum mô dơn rhuăt glêh trong hăn, ntrŭt ntrôl rsong hăn tăch rgâl, ma hôm lah suan ntrôl gay Măng Đen đăt ndal tâm hun hao pâl nđaih. Lah trong cao tốc dơi ntuh kơl ơm, mbra ƀư Măng Đen jêng ntŭk rgum pâl nđaih bri dak têh bah Tây Nguyên, nkre, kơl Kon Tum n’hanh Quảng Ngãi jêng ntŭk chrat ang wăng sa bah nkual miền Trung - Tây Nguyên.

Nkre, trong cao tốc Quảng Ngãi - Kon Tum hôm rgop jêng ntung trong ăp kôp, jĭr êng đah njăr trong cao tốc njăr rkăng Đông-Tây buăt nthoi đah cao tốc njăr Bắc-Nam; kơl hŭch đêt roh huach prăk nchuăn rdeng n’hanh ndơ̆ ăp ndơ geh ƀư bah nkret njêng si, tơm dak si, cao su, mắc ca, cà phê tât ndrâm dak lêng Dung Quất dơh ngăch. Lơn lah, njăr trong dja hôm rhŏ dŏng uĕh an trong nchrăp rdâk njêng n’hanh mât njrăng, đah n’gor Quảng Ngãi, Kon Tum n’hanh nkual Tây Nguyên, duyên hải miền Trung tâm ban kơt nthoi đah nkual pe njônh hun hao Việt Nam - Lào – Campuchia./.