Ta Bắc Kinh, Uỷ viên Bộ chính trị Trung ương Đảng Cộng sản Trung Quốc, groi Uỷ viên Kruanh Uỷ ban rnâng kan Đại hôị Đại biểu nhân dân lam dak (Nhân dân đaị lam dak) Trung Quốc Lý Hồng Trung lĕ geh vơt groi kruanh Uỷ ban Trung ương Mặt Trận Tổ quốc Việt Nam, Bí thư tal 1 Trung ương Đoàn thanh niên Cộng sản Hồ Chí Minh, kruanh mpôl nti mom ndăm Việt Nam Buì Quang Huy dôl tât khâl, pah kan ta Trung Quốc. Ntoh ngơi ta rơh vơt, wa Lý Hồng Trung lah na nê̆, 2 ding an geh ƀư tĭng răng dăng nău ntĭm đă bâh nuĭh leo kan gưl têh 2 Đảng, 2 dak mpeh n’hao nău tâm nđur mom ndăm Trung- Việt, ntrŭt đă  mom ndăm 2 dak tâm rgop săk soan nơm ta nău rdâk njêng ntŭk rêh jêng tâm mbơh nău rêh let năp tay bâh Việt Nam-Trung Quốc geh nău khlăy tơm jŏ jong. Bí thư tal 1 Trung ương Đoàn TNCS Hồ Chí Minh Bùi Quang Huy lah na nê̆, ntrong kan “gŭr, mĭn uănh mĭn nău nti” mpơl nău nsrôih, nău dơn kan n’hanh nău kan hăn lor bâh mom ndăm tâm nău mât rbăy, ndâk nsơm n’hanh mô rlu hun hao nău tâm boh kan ndrel tâm kơl kan lĕ rngôch đah 2 dak Việt Nam- Trung Quốc, mpŏng tât rdâk njêng ntŭk rêh jêng tâm kơl tâm let năp tay geh nău kan jŏ jong. Bí thư tal ngoăy Bùi Quang Huy knơm an lah, bâh bôk nău kan aơ, ăp đaị biêủ mom mbra geh rơh tâm nđur, tâm mbơh, tâm kơt nti, bâh nĕ n’hao nău gĭt vât, bun dăp nău tâm rnglăp n’hanh pơk hvi ăp rơh nkhêp tâm kơl tâm let năp tay đah mom ndăm bar dak.