Nkah ndray 95 năm Nar way ơm Mặt trận Tổ quốc Việt Nam mhe aơ, Thủ tướng Phạm Minh Chính hŏ tât râng Nar tâm rnglăp lam rnoi nuĭh, đah ƀon lan nkual ƀon lan gŭ Thắng Kiên, xã Đề Gi, n’gor Gia Lai. Tâm rnôk dja đŏng, Groi Thủ tướng Chính phủ Mai Văn Chính hŏ tât râng nar tâm rnglăp lam rnoi nuĭh ta nkual ƀon lan gŭ ntêng lêng thôn Suối Cau - Suối Sâu - Bến Khế, xã Bắc Khánh Vĩnh, n’gor Khánh Hòa.

Rhơn nsum đah kônh wa nkual ƀon lan gŭ Thắng Kiên, xã Đề Gi, Thủ tướng Phạm Minh Chính lah rjăp, nar rgum tâm rnglăp lam rnoi nuĭh ƀư tâm rnôk phŭt mbrô 13 mhe aơ lơh khuch khat mô hŏ tă geh. Tâm rnôk jêr jŏt nê nha hôm geh ntŭk nsing đŏng lah nău rđău đă di bah Đảng; nău lăp kan bah lam trong kan chính trị, bah nuĭh ƀon lan, nău rđău đă bah ăp gưl n’gâng kan; nuih n’hâm tâm rnglăp lam rnoi nuĭh. Mpư rnê, uănh năl ăp nău dơi ma Đảng bộ, n’gâng kan n’hanh ƀon lan n’gor Gia Lai lah nsum, xã Đề Gi lah êng hŏ dơi geh tâm bah ri aơ, rgop tâm nău dơi nsum bah neh dak, Thủ tướng đă gưl uỷ, n’gâng kan ta ntŭk rgum nkra bah khuch khat phŭt mbrô 13 lơh:

"Lor bôk năp ân rdâk tay jay an ăp rnăk geh rlâm ntơm bah aơ tât 15/12 âm lịch; nkra ăp jay geh khuch khat; rdâk tay ăp ntŭk ntô ntung trong, dak si, ntĭm nti; đăp mpăn rdâk tay, mbluh soih trong điện, viễn thông; ngăch kuaih kloh uĕh ntŭk ntô ndơ dŏng; rdâk tay nău kan, tăch rgâl, trong rêh wăng sa an ƀon lan. Tơm nuĭh kan, mpôl tahen, công an, druh ndăm ndrel lăp kơl, ntop kơl ƀon lan nkra bah khuch khat phŭt mbrô 13 lơh; tĭng ƀư jăp lăp dŏng n’gâng kan 2 gưl; hun hao wăng sa- rêh jêng kon nuĭh, nta joi nău kan an ƀon lan.

Thủ tướng đă n’gor Gia Lai dăp rgum tay nkual ƀon lan gŭ, nkual rhŏ dŏng, tăch rgâl bah dih; nuĭh ƀon lan  ân gŭ rêh mpeh tâm trôm gay đăp mpăn. An ƀư nkual ƀon lan gŭ; đăp mpăn ân nchrăp mât chăm Tết an ƀon lan. Uănh khlay n’hao tay nău gĭt êng nkah njrăng lor an ƀon lan bah năp ăp nău mplư rlăm lơh chrai, nsŭk nsôr bah ăp bu êh rkeh nde tâm nô nău. Đăp mpăn rnă njrăng, mât njrăng "xã mô ma túy", "xã mô geh nuĭh tih", "xã mô geh nuĭh ach o".  

Tâm pơh bah năp nơh đŏng, Groi Thủ tướng Chính phủ Mai Văn Chính hŏ tât râng Nar tâm rnglăp lam rnoi nuĭh ta nkual ƀon lan gŭ ntêng lêng thôn Suối Cau - Suối Sâu - Bến Khế, xã Bắc Khánh Vĩnh, n’gor Khánh Hòa. Aơ lah nkual mpeh yôk yang geh âk ƀon lan Raglay, ndrel 9 rnoi nuĭh gŭ rêh ndrel tâm rnglăp, tĭng kơn rgâl mhe muh măt ƀon lan mpeh yôk yang. Ntêng lêng nkual ƀon lan gŭ geh rlău 1.100 rnăk, rlău 4.600 nuĭh lĕ ma rnoi nuĭh Yăn, Raglay, Rđe, Tày, Nùng, Dao, Mường, Hoa, T’Rin… Ăp năm aơ, kônh wa nănh rgâl dăp rgum si tăm, ndơ mât; âk trong ntĭt leo wăng sa ta mir kơt tăm sầu riêng, play bŭng ntô ư̆r, prit nkre đah mât rong, an nsĭt nău geh wăng sa đăp mpăn.

Lah ta Nar tâm rnglăp lam rnoi nuĭh, Groi Thủ tướng Mai Văn Chính lah rjăp, Nar tâm rnglăp lam rnoi nuĭh lah rnôk mpư rnê nău way ơm krêp dêh, lah ntŭk ntơm dâk nău rôih mĭn, nău nđơr nsan hao; lah suan ntrôl gay “rgâl mhe nău mĭn, rgâl mhe trong ƀư, nănh mĭn – nănh ƀư – nănh dơn kan”, njêng suan rđăt hun hao an nkual mpeh yôk yang. Xã ân sơch ntĭt leo lor mpeh tâm dâl nău  lam rêh jêng kon nuĭh, ntĭt leo lor ăp tŏng geh nău rêh ƀon lan, mpôl kan “Khay djăt nuĭh ƀon lan lah”, dŏng bản đồ mbrô ƀon lan rêh n’hanh mât chăm an rnăk ach o, rnăk dăch kêng ach o. Groi Thủ tướng Mai Văn Chính lah kloh:

“Ân ntik n’hao nău way ơm đăp dêh, ngăch ngăr, blău ƀư mhe bah ƀon lan ăp rnoi nuĭh, ntik n’hao săk geh mha êng, nău dơh uĕh mpeh neh ntu, trôk nar, bri dak gay hun hao tuch tăm jŏ jong, tuch tăm âk ntil ndơ gŭ rêh, nkre đah pâl nđaih nsum mpôl lam ƀon lan, pâl nđaih rlong saơ. Uănh khlay mât njrăng bri, mât tơm dak, mât njrăng ntŭk gŭ rêh bri dak – nê lah trong ƀư dŭt ngăn ngăn gay hun hao jŏ jong. N’gâng kan ta ntŭk, Mặt trận Tổ quốc n’hanh ăp nsum mpôl lor nchrăp ntop kơl kônh wa tât đah tơm prăk, kỹ thuật, khoa học công nghệ, dŏng rgâl mbrô tâm nău kan tuch tăm, tăch ndơ geh ƀư, gay “ƀon lan mbrô, thôn ƀon mbrô” jêng ngăn ngăn ta nkual neh bah lơ Khánh Vĩnh”.

Nkhêp geh rnôk dja, Groi Thủ tướng Mai Văn Chính păng nklâm ndơ 2 rnăk geh nău nsing nơm ntoh lư, rgŏ jă kônh wa tâm rnglăp tâm tay, hun hao wăng sa, rdâk njêng nkual ƀon lan gŭ- srăch – uĕh, đăp mpăn, tâm rŏng.